គណៈប្រតិភូក្រសួងសាធារណការ និងដឹកជញ្ជូន អញ្ជើញចូលរួមគោរពវិញ្ញាណក្ខន្ធសពឧបាសិកា ប៉ែន សុផល្លា ត្រូវជាមាតាក្មេករបស់ ឯកឧត្តម វ៉ាស៊ឹម សុរិយា អនុរដ្ឋលេខាធិការ ភ្នំពេញ៖ នារសៀលថ្ងៃសៅរ៍ ១រោច ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០៧ ខែមករា ឆ្នាំ២០២៣ ឯកឧត្តម ស៊ុយ សាន រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូក្រសួង ចូលរួមដាក់កម្រងផ្កា ជាកិច្ចគោរពវិញ្ញាណក្ខន្ធសព ឧបាសិកា ប៉ែន សុផល្លា ដែលត្រូវជាមាតាក្មេករបស់ ឯកឧត្តម វ៉ាស៊ឹម សុរិយា អនុរដ្ឋលេខាធិការ នៅគេហដ្ឋានលេខ ៣E0 ផ្លូវលេខ២១ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។ ឧបាសិកា ប៉ែន សុផល្លា បានទទួលមរណភាពកាលពីថ្ងៃព្រហស្បតិ៍ ១៤កើត ខែបុស្ស ឆ្នាំខាល ចត្វាស័កព.ស. ២៥៦៦ ត្រូវនឹងថ្ងៃទី០៥ ខែមករា ឆ្នាំ២០២៣ វេលាម៉ោង០៧:៥០នាទីព្រឹក ក្នុងជន្មាយុ៨៧ឆ្នាំ ដោយជរាពាធ។ មរណភាពរបស់ឧបាសិកា ប៉ែន សុផល្លា គឺជាការបាត់បង់នូវអ្នកមានគុណ ដែលជាមាតាបង្កើត មាតាក្មេក ជីដូន ជាទីគោរពស្រឡាញ់ដ៏ជ្រាលជ្រៅបំផុត និងប្រកបដោយព្រហ្មវិហារធម៌ដ៏ថ្លៃថ្លា ដែលកន្លងមកឧបាសិកា បានតស៊ូចិញ្ចឹមបីបាច់ថែរក្សា រៀបចំទុកដាក់កូនចៅ និងអប់រំទូន្មានបុត្រធីតា រហូតក្លាយជាបញ្ញវន្ត និងជាធនធានដ៏មានតម្លៃសម្រាប់សង្គមជាតិ។ នៅក្នុងឱកាសដ៏សែនក្រៀមក្រំនេះ ឯកឧត្តមរដ្ឋលេខាធិការ ព្រមទាំងគណៈប្រតិភូ តំណាងឱ្យថ្នាក់ដឹកនាំ មន្ត្រីរាជការ បុគ្គលិក និងកម្មករនៃ ក្រសួងសាធារណការ និងដឹកជញ្ជូន ទាំងអស់ បានសម្តែងនូវការចូលរួមរំលែកនូវមរណទុក្ខ ជាមួយឯកឧត្ដមអនុរដ្ឋលេខាធិការ និងលោកជំទាវ ព្រមទាំងក្រុមគ្រួសារ ដោយសេចក្ដីសង្វេគជាទីបំផុត និងបានលំឱនកាយវាចាចិត្តឧទ្ទិសបួងសួងដល់ដួងវិញ្ញាណក្ខន្ធរបស់ឧបាសិកា ប៉ែន សុផល្លា សូមបានសោយសុខក្នុងសុគតិភពកុំបីឃ្លៀងឃ្លាតឡើយ៕