ប្រមុខរាជរដ្ឋាភិបាលកម្ពុជា លោកនាយករដ្ឋមន្រ្តីហ៊ុន សែន បានមានប្រសាសន៍ថាក្នុងពេលឆាប់ៗខាងមុខនេះ រោងចក្រដំឡើងរថយន្តតូយ៉ូតា នឹងមានវត្តមាននៅក្នុងតំបន់សេដ្ឋកិច្ចពិសេសភ្នំពេញ។ ប្រមុខរដ្ឋាភិបាលកម្ពុជា បានបញ្ជាក់ថាលោកនាយករដ្ឋមន្រ្តីជប៉ុន ធ្លាប់បានស្នើសុំឱ្យកម្ពុជាគាំទ្រនៅគម្រោងទាក់ទិននឹងការបង្កើតក្រុមហ៊ុនតូយ៉ូតានេះ។ លោកនាយករដ្ឋមន្រ្តីមានប្រសាសន៍បែបនេះ ក្នុងឱកាសអញ្ជើញអបអរសាទរខួប១១ឆ្នាំនៃប្រតិបត្តិការរបស់ក្រុមហ៊ុនមីនេបៀ Minebea(Cambodia) នៅតំបន់សេដ្ឋកិច្ចពិសេសភ្នំពេញ នាថ្ងៃទី០១ ខែធ្នូ ឆ្នាំ២០២២នេះ។ទាក់ទិននឹងការបង្កើតរោងចក្រផ្គុំ និងដំឡើងរថយន្ដតូយ៉ូតានៅកម្ពុជានេះ បើតាមប្រភពពីថ្នាក់ដឹកក្រុមហ៊ុនរថយន្ដតូយ៉ូតានៅកម្ពុជាបានឱ្យដឹងថា មូលហេតុដែលជំរុញឱ្យក្រុមហ៊ុនសម្រេចបង្កើតរោងចក្រផ្គុំ និងដំឡើងរថយន្តនៅកម្ពុជា គឺដោយសារតែក្រុមហ៊ុនមើលឃើញពីតម្រូវការប្រើប្រាស់រថយន្តថ្មីៗ នៅកម្ពុជាពីសំណាក់ពលរដ្ឋមាននិន្នាការកើនឡើងកាន់តែច្រើននៅប៉ុន្មានឆ្នាំចុងក្រោយនេះ។ យ៉ាងណាមិញ កាលពីថ្ងៃទី០៨ ខែកញ្ញា ឆ្នាំ២០២២កន្លងទៅ ក្រុមប្រឹក្សាអភិវឌ្ឍន៍កម្ពុជា CDC បានសម្រេចអនុម័តលើគម្រោងវិនិយោគរបស់ក្រុមហ៊ុនផលិតរថយន្តដ៏ល្បីរបស់ជប៉ុន គឺក្រុមហ៊ុន Toyota Tsusho Manufacturing (Cambodia) Co., Ltd. លើគម្រោងបង្កើតរោងចក្រផ្គុំ និងដំឡើងរថយន្តតូយ៉ូតា នៅក្នុងប្រទេសកម្ពុជាក្រោមទុនវិនិយោគចំនួន ៣៦,៧លានដុល្លារអាមេរិក និងអាចបង្កើតការងារបានចំនួនប្រមាណ ១៥០នាក់។ ជាការកត់សម្គាល់ បច្ចុប្បន្ននេះកម្ពុជាបានទាក់ទាញការវិនិយោគពីក្រុមហ៊ុនផលិតរថយន្តម៉ាកល្បីៗរបស់ពិភពលោកមួយចំនួន ដូចជាក្រុមហ៊ុនរថយន្តតូយ៉ូតា រថយន្ត Ford ម៉ាកដ៏ល្បីរបស់អាមេរិក ដែលមានទីតាំងនៅខេត្តពោធិ៍សាត់ ដែលមានសមត្ថភាពដំឡើងរថយន្តបានប្រមាណ១ម៉ឺនគ្រឿងក្នុង១ឆ្នាំ, ក្រុមហ៊ុនផលិតរថយន្តដ៏ល្បីរបស់កូរ៉េខាងត្បូងចំនួនពីរ គឺ Hyundai និង Daehan ដែលបានបង្កើតរោងចក្រដំឡើងរថយន្ត នៅតំបន់សេដ្ឋកិច្ចពិសេសក្នុងទឹកដីខេត្តកោះកុង និងនៅក្រុងបាវិតខេត្តស្វាយរៀង៕