ថ្លែងក្នុងពិធីសម្ពោធដាក់ឱ្យប្រើប្រាស់ស្ថានីយ៍បញ្ចូលថាមពលអគ្គិសនី ទេសរដ្ឋមន្ដ្រី រដ្ឋមន្ដ្រីក្រសួងសាធារណការនិងដឹកជញ្ជូន លោក ស៊ុន ចាន់ថុល បានលើកឡើងពន្យល់ពីអត្ថប្រយោជន៍ប្រើប្រាស់រថយន្តអគ្គិសនីនៅកម្ពុជា ដែលបានចូលរួមកាត់បន្ថយហានិភ័យបរិស្ថាន និងកាត់បន្ថយចំណាយថវិកាតិចជាង បើធៀបនឹងការប្រើប្រាស់ប្រេងឥន្ធនៈ។ នៅក្នុងរយៈពេល៧ខែ ឆ្នាំ២០២២ នេះ មានរថយន្តប្រើប្រាស់ថាមពលអគ្គិសនីបានមកចុះបញ្ជីនៅក្រសួង មានចំនួន ១៥៥ គ្រឿងមានការកើនឡើងប្រមាណ១៣០០% បើធៀបនឹងរយៈពេលដូចគ្នាកាលពីឆ្នាំមុន ខណៈដែលគោលនយោបាយរបស់រាជរដ្ឋាភិបាល គឺធ្វើយ៉ាងណាជំរុញការប្រើប្រាស់រថយន្តអគ្គិសនីឲ្យបាន៤០% នៅត្រឹមឆ្នាំ២០៣០។ បើតាមលោក ស៊ុន ចាន់ថុល ធ្លាប់បានអះអាងថា កម្ពុជាគ្រោងនឹងដំឡើងស្ថានីយសាកថ្មយានយន្ដអគ្គិសនីនេះ ឲ្យបានលើស១៥ទីតាំងទាំងនៅរាជធានីភ្នំពេ និងតាមបណ្ដាខេត្ត ដោយក្នុងនោះ ក៏មានការសហការជាមួយវិស័យឯកជនផងដែរ៕