កិច្ចប្រជុំដំបូងរបស់ក្រុមការងារគម្រោងធ្វើឱ្យប្រសើរឡើងវិញផ្លូវជាតិលេខ៣៣ ពីទីរួមខេត្តកំពត ដល់ ច្រកលក (ព្រំដែនកម្ពុជា-វៀតណាម) ទីស្ដីការក្រសួង៖ ថ្ងៃសុក្រ ១១កើត ខែកត្តិក ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី៤ ខែវិច្ឆិកា ឆ្នាំ២០២២ ឯកឧត្តម ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន និងជាប្រធាន អង្គភាពគ្រប់គ្រងគម្រោង(PMU) បានអញ្ជើញដឹកនាំកិច្ចប្រជុំដំបូងរបស់ក្រុមការងារគម្រោងធ្វើឱ្យប្រសើរឡើងវិញផ្លូវជាតិលេខ៣៣ ពីទីរួមខេត្តកំពត ដល់ ច្រកលក (ព្រំដែនកម្ពុជា-វៀតណាម) ដោយមានការ ចូលរួមពីក្រុមហ៊ុនសាជីវកម្មស្ពាន និងថ្នល់ចិន និងសមាជិកសមាជិកាក្រុមការងារបច្ចេកទេសអនុវត្តគម្រោង(PIU)។ កិច្ចប្រជុំនេះធ្វើឡើងដើម្បីពិភាក្សាលើរបៀបវារៈមួយចំនួនរួមមាន៖ ការប្រកាសសមាសភាពសមាជិក សមាជិកាក្រុមការងារអង្គភាពគ្រប់គ្រងគម្រោង (PMU) និងអង្គភាពអនុវត្តគម្រោង(PIU) ដែល បានកែសម្រួលថ្មី ក៏ដូចជាដើម្បីបង្កើនទំនាក់ទំនងឱ្យបានជិតស្និទ្ធ និងកិច្ចសហការល្អសំដៅជំរុញ ឱ្យការអនុវត្តគម្រោងបានកាន់តែប្រសើរ។ ថ្លែងក្នុងឱកាសនោះ ឯកឧត្តមរដ្ឋលេខាធិការប្រធានអង្គប្រជុំ បានណែនាំឱ្យក្រុមហ៊ុនអនុវត្តគម្រោងត្រៀមរៀបចំការងារមួយចំនួនឱ្យបានរួចរាល់មុនការបើកការដ្ឋាននាពេលឆាប់ៗខាងមុខដូចជា៖ ការ រៀបចំបំពាក់ផ្លាកសញ្ញាចរាចរណ៍ ផ្ទាំងប៉ាណូបង្ហាញការដ្ឋាន ជាពិសេស ការជួសជុលថែទាំផ្លូវដែលកំពុងរងការខូចខាតជាបណ្ដោះអាសន្នដើម្បីបញ្ជៀសការកកស្ទះចរាចរណ៍ និងសម្រួលដល់ការធ្វើដំណើរ និងការដឹកជញ្ជូនរបស់បងប្អូនប្រជាពលរដ្ឋ និងបានជំរុញលើកទឹកចិត្តឱ្យអង្គប្រជុំពិភាក្សាលើកត្តា ប្រឈមដែលអាចកើតមានក្នុងការអនុវត្តគម្រោង បន្ទាប់ពីក្រុមការងារបានចុះត្រួតពិនិត្យស្ថានភាពផ្លូវជាក់ស្តែងចំនួន២លើកកន្លងមក។ បន្ថែមពីលើនេះ ឯកឧត្តមរដ្ឋលេខាធិការ បានសំណូមពរឱ្យសមាជិកសមាជិកក្រុមការងារគម្រោង ទាំងមូលយកចិត្តទុកដាក់ខ្ពស់លើការអនុវត្តតួនាទី និងភារកិច្ចរបស់ខ្លួន ជាពិសេសបន្តទំនាក់ទំនង និងកិច្ចសហការល្អ ដើម្បីគម្រោងស្ថាបនាធ្វើឱ្យប្រសើរឡើងវិញផ្លូវជាតិលេខ៣៣ ពីទីរួមខេត្តកំពត ដល់ច្រកលក (ព្រំដែនកម្ពុជា-វៀតណាម) មានគុណភាពរឹងមាំ អាចប្រើប្រាស់បានយូរអង្វែង៕