[Khmer News Media Center] - រថភ្លើងប៉ះជាមួយរថយន្តរឿងនេះទើបតែកើតឡើងនៅមុននេះបន្តិចនៅលើផ្លូវរថភ្លើងត្រង់ចំណុចខាងកើតផ្លូវចូលវត្តដុងអារ័ញ្ញ
ខេត្តបន្ទាយមានជ័យ ៖ ព្រឹកថ្ងៃ ច័ន្ទ០៩កើត ខែចេត្រ ឆ្នាំច សំរទ្ធិស័ក ព.ស២៥៦១ ត្រូវនិងថ្ងៃទី២៣ខែមេសាឆ្នាំ២០១៨វេលាម៉ោង០៨/៣០នាទីនេះជាលើកទី០៣ហើយដែលមានករណីគ្រោះថ្នាក់ចរាចរណ៍រវាងរថភ្លើងប៉ះជាមួយរថយន្តរឿងនេះ ទើបតែកើតឡើងនៅមុននេះបន្តិចនៅលើផ្លូវរថភ្លើងត្រង់ចំណុចខាងកើតផ្លូវចូលវត្តដុងអារ័ញ្ញ ។ ប្រហែល២៥០ម៉ែត្រស្ថិតក្នុងភូមិនិមិត្ត១សង្កាត់និមិត្តក្រុងប៉ោយប៉ែតខេត្តបន្ទាយមានជ័យ។
ហេតុការណ៍នេះរថភ្លើងបើកបរចេញពីស្ថានីយ៍រថភ្លើងប៉ោយប៉ែតឆ្ពោះទៅក្រុងសិរីសោភ័ណខេត្តបន្ទាយមានជ័យទិសដៅពីលិចទៅកើតដល់ចំណុច កើតហេតុស្រាប់តែមានរថយន្តដឹកដី០១គ្រឿងម៉ាក ហ៊ីណូពណ៌ស បើកបរដោយឈ្មោះ ភួង ពេជ្រ អាយុ ៤៧ ឆ្នាំ មុខរបរបើកបររថយន្តដឹកដីរស់ នៅក្នុងភូមិនិមិត្តថ្មី សង្កាត់និមិត្តក្រុងប៉ោយប៉ែត ខេត្តបន្ទាយមានជ័យបើកបរឆ្លងផ្លូវរថភ្លើង ពីជើងទៅជើងទៅត្បូង ពេលឆ្លង បានជិតផុតផ្លូវ ក៏ត្រូវរថភ្លើងបុកបណ្តាលអោយធ្លាក់ចូលទៅក្នុងប្រឡាយគ្រោះថ្នាក់តែម្តង ។ ករណីនេះបណ្តាលអោយអ្នកបើកបររថយន្តឈ្មោះ ភួង ពេជ្រ (រងរបួស) ត្រូវបានសាច់ញាតិដឹកយកទៅពេទ្យ រថយន្ត (ខូចខាតធ្ងន់) ចំណែករថភ្លើងពុំអាចបន្តរដំណើរទៅមុខបានទេ (ខូចធុងទឹក) ត្រូវការជួសជុល២ទៅ៣ថ្ងៃ ។
លោកវរ:សេនីយ៍ទោ សៅ សារឿន អធិការរងនគរបាលក្រុងប៉ោយប៉ែតទទួលបន្ទុកផ្នែកចរាចរណ៍ក្រុងបានប្រាប់អ្នកសារព័ត៌មានថា ករណីខាងលើនេះលោកបានអំពាវនាវដល់បងប្អូនប្រជាពលរដ្ឋ ទាំងអស់រស់នៅក្រុងប៉ោយប៉ែត សូមកុំមានការធ្វេសប្រហែសក្នុងការបើកបរឆ្លងផ្លូវរថភ្លើង ដែលកំពុងតែចរាចរណ៍ សូមមើលម៉ោងនិងពេលវេលា នៃការចេញ ឬចូល និងសូមឲ្យមានការប្រុងប្រយ័ត្ន ឲ្យបានខ្ពស់ដើម្បីបញ្ជៀសនៃការគ្រោះថ្នាក់ជាយថាហេតុផ្សេងៗកើតឡើង ៕
