ជំនួបសម្តែងការគួរសមពីសំណាក់លោកស្រី Sharon LEWIS នាយិកាកម្មវិធី នៃការិយាល័យអង្គការសហប្រជាជាតិសម្រាប់សេវាកម្មគម្រោង(UNOPS) ប្រចាំកម្ពុជា ទីស្តីការក្រសួង៖ ថ្ងៃព្រហស្បតិ៍ ៣រោច ខែអស្សុជ ឆ្នាំខាលចត្វាស័ក ព.ស. ២៥៦៦ ត្រូវនឹងថ្ងៃទី១៣ ខែតុលា ឆ្នាំ២០២២ ឯកឧត្តមបណ្ឌិត រស់ វណ្ណា តំណាងដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល និងជារដ្ឋលេខាធិការក្រសួងសាធារណការ និងដឹកជញ្ជូន បានទទួលជួបសំដែងការគួរសម និងពិភាក្សាការងារពីសំណាក់លោកស្រី សារ៉ុន ឡឺវ៉ីស នាយិកាកម្មវិធី នៃការិយាល័យអង្គការសហប្រជាជាតិសម្រាប់សេវាកម្មគម្រោង (United Nations Office for Project Services)ប្រចាំកម្ពុជា។ ជំនួបនេះបានលើកឡើងអំពីកាលានុវត្តន៍ភាពនៃកិច្ចសហការធ្វើឱ្យប្រសើរឡើងរវាងក្រសួងសាធារណការ និងដឹកជញ្ជូន និងUNOPS ទាក់ទងនឹងវិស័យអាទិភាពដែលជាការទទួលខុសត្រូវរបស់ក្រសួង ដើម្បី ឆ្លើយតបតាមគោលដៅយុទ្ធសាស្ត្រ និងបេសកកម្មក្រសួង ក៏ដូចជារាជរដ្ឋាភិបាល និងការងារអាទិភាព ចំនួន៤រួមមាន៖ ការងារប្រព័ន្ធទឹកកខ្វក់ ការងារដឹកជញ្ជូន ឡូជីស្ទីក និងការងារផ្លូវសមុទ្រជូន UNOPS ពិនិត្យពិចារណា។ ថ្លែងក្នុងឱកាសនោះ លោកស្រីនាយិកាកម្មវិធី បានថ្លែងអំណរគុណយ៉ាងជ្រាលជ្រៅដល់ឯកឧត្តមទេស រដ្ឋមន្ត្រី ក៏ដូចជាថ្នាក់ដឹកនាំក្រសួង ដែលបានអនុញ្ញាតឱ្យលោកស្រី និងក្រុមការងារUNOPS បានជួបសំដែងការគួរសម និងពិភាក្សាការងារ ដើម្បីបង្ហាញពីបទពិសោធន៍ ជំនាញ និងគម្រោងសំខាន់ៗមួយ ចំនួន ជាពិសេសគម្រោងការបំពុលសមុទ្រដោយផ្លាស្ទិក(Maritime Plastics)។ ឯកឧត្តមរដ្ឋលេខាធិការ បានស្នើឱ្យUNOPS ពិនិត្យលើសំណើរបស់ក្រសួងទាក់ទងនឹង ១) ការបណ្តុះបណ្តាលធនធានមនុស្សសម្រាប់វិស័យគ្រប់គ្រងទឹកកខ្វក់ និងការរៀបចំប្លង់មេ(Master Plan) តាមបណ្តាតំបន់នៃខេត្តនីមួយៗ ២) ការផ្តល់ស្ថានីយបញ្ចូលថាមពលយានយន្តអគ្គិសនី (ប្រសិនបើអាច) ដោយហេតុថាក្រសួង ក៏ដូចជារដ្ឋាភិបាលកំពុងជំរុញការផ្សព្វផ្សាយឱ្យប្រជាពលរដ្ឋប្រើប្រាស់រថយន្ត អគ្គិសនី ៣) ការជួយកសាងច្បាប់ស្តីពីការបំពុលបរិស្ថានសមុទ្រ ដោយផ្អែកលើUNOPS មានគម្រោងសហប្រតិបត្តិការជាមួយអាស៊ានលើ Maritime plastic ព្រមទាំងកិច្ចប្រជុំជាបន្តបន្ទាប់ជាមួយអ្នកជំនាញរវាងស្ថាប័នទាំងពីរ៕