ក្នុងពិធីប្រណាំងទូកចំ​នួន២ថ្ងៃ ដែលប្រព្រឹត្តនៅថ្ងៃអាទិត្យ ១៤កើត និងថ្ងៃចន្ទ ១៥កើត ខែអស្សុជ ឆ្នាំខាលចត្វាស័ក ព.ស ២៥៦៦ ត្រូវនឹងថៃ្ង៩-១០ ខែតុលាឆ្នាំ២០២២ លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក និងជាប្រធានគ្រប់គ្រងគម្រោងធ្វើឱ្យប្រសើរឡើងនូវសុវត្ថិភាពចរាចរណ៍ផ្លូវគោក បានដឹកនាំក្រុមការងារទី៤ ផ្នែកអប់រំផ្លាស់ប្តូរឥរិយាបថ ចូលរួមយុទ្ធនាការអប់រំផ្សព្វផ្សាយអំពីសុវត្ថិភាពចរាចរណ៍ផ្លូវគោក និងមានការចូលរួមដ៏ខ្ពង់ខ្ពស់ពី ឯកឧត្តម សុខ លូ អភិបាលនៃគណៈអភិបាលខេត្តបាត់ដំបង ដោយមានការសហការរៀបចំដោយមន្ទីរសាធារណការ និងដឹកជញ្ជូនខេត្តបាត់ដំបង ដែលដឹកនាំដោយលោក ព្រួញ រិទ្ធថា ប្រធានមន្ទីរ សហភាពសហព័ន្ធយុវជនកម្ពុជាខេត្តបាត់ដំបង ដែលដឹកនាំដោយលោកអភិបាលរងក្រុងបាត់ដំបង និង Mr. Kazuo Yumita អ្នកជំនាញជប៉ុន មកពីអង្គការ JICA ។ យុទ្ធនាការអប់រំផ្សព្វផ្សាយអំពីសុវត្ថិភាពចរាចរណ៍ផ្លូវគោកនៅក្នុងពិធីប្រណាំងទូកនៅខេត្តបាត់ដំបងនេះ រៀបចំឡើង ដើម្បីអប់រំផ្សព្វផ្សាយ និងជាការពញ្ញាក់ស្មារតីដល់អ្នកប្រើប្រាស់ផ្លូវទាំងអស់ឱ្យមានការប្រុងប្រយ័ត្ននៅពេលធ្វើដំណើរតាមដងផ្លូវ និងត្រូវចូលរួមគោរពច្បាប់ស្តីពីចរាចរណ៍ផ្លូវគោកឱ្យបានខ្ជាប់ខ្ជួនគ្រប់ៗគ្នា ដើម្បីជៀសវាងឱ្យបាននូវគ្រោះថ្នាក់ចរាចរណ៍ដែលអាចកើតមានឡើងជាយថាហេតុ។ បន្ថែមពីនេះ លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក បានសំណូមពរឱ្យអ្នកប្រើប្រាស់យានជំនិះគ្រប់ប្រភេទត្រូវចូលរួមគោរពច្បាប់ស្តីពីចរាចរណ៍ផ្លូវគោក មិនត្រូវបើកបរលើសល្បឿនកំណត់ ត្រូវគោរពសិទ្ធិអាទិភាពក្នុងពេលធ្វើដំណើរ ជាពិសេសត្រូវបើកបរយានទៅតាមគន្លងផ្លូវរបស់ខ្លួន ត្រូវពាក់មួកសុវត្ថិភាពនៅពេលធ្វើដំណើរតាមម៉ូតូដោយមិនគិតទីជិត ឬទីឆ្ងាយឡើយ។ ក្នុងយុទ្ធនាការអប់រំផ្សព្វផ្សាយនេះបានចែកជូនឯកសារពាក់ព័ន្ធនឹងច្បាប់ស្តីពីចរាចរណ៍ផ្លូវគោក និងមានការរៀបចំកម្មវិធីសួរ និងឆ្លើយសំណួរ សម្រាប់អ្នកចូលរួមយុទ្ធនាការផងដែរ។ ជាលទ្ធផលនៃយុទ្ធនាការនេះ បានចែកមួកសុវត្ថិភាពចំនួន៦០មួក និងឯកសារពាក់ព័ន្ធនឹងច្បាប់ស្តីពីចរាចរណ៍ផ្លូវគោកមួយចំនួនទៀត។ "ខ្ញុំគោរព អ្នកគោរព យើងទាំងអស់គ្នារួមគ្នាគោរពច្បាប់ស្តីពីចរាចរណ៍ផ្លូវគោក” ដើម្បីជាចំណែកក្នងការកាត់បន្ថយគ្រោះថ្នាក់ចរាចរណ៍ក្នុងប្រទេសជាតិយើងមកនៅកម្រិតទាបបំផុត។