សិក្ខាកាមសរុបប្រមាណ៥៦រូប ចូលរួមវគ្គបណ្តុះបណ្តាលស្តីពីការគ្រប់គ្រងប្រព័ន្ធទឹកកខ្វក់ និងសំណល់ភក់ សហការរៀបចំឡើងដោយក្រសួងសាធារណការ និងដឹកជញ្ជូន និងអង្គការបូដា-កម្ពុជា ថ្ងៃអង្គារ ៩កើត ខែអស្សុជ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០៤ ខែតុលា ឆ្នាំ២០២២ ឯកឧត្តម សួន ភារិទ្ធ អគ្គនាយកនៃអគ្គនាយកដ្ឋានប្រព័ន្ធចម្រោះទឹកកខ្វក់នៃក្រសួងសាធារណការ និង ដឹកជញ្ជូន និងឯកឧត្តម ស្រេង សុភាព អភិបាលរងខេត្តក្រចេះ បានអញ្ជើញជាសហអធិបតីក្នុងពិធីបើកវគ្គបណ្តុះបណ្តាលស្តីពីការគ្រប់គ្រងប្រព័ន្ធទឹកកខ្វក់ និងសំណល់ភក់ដល់មន្ត្រីក្រសួង និងមន្ទីរ សាធារណការ និងដឹកជញ្ជូន និងរដ្ឋបាលថ្នាក់ក្រោមជាតិ ដោយមានការចូលរួមពីលោក ម៉ង់ ឧបសិទ្ធិ ប្រធានអង្គការបូដា-ប្រចាំនៅកម្ពុជា (BORDA Cambodia) និងមន្ត្រីជំនាញពាក់ព័ន្ធ។ សមាសភាពសិក្ខាកាមចូលរូមក្នុងវគ្គបណ្តុះបណ្តាលនេះមានចំនួនប្រមាណ៥៦ អញ្ជើញមកពីអគ្គនាយកដ្ឋានសាធារណការ អគ្គនាយកដ្ឋានបច្ចេកទេស អគ្គនាយកដ្ឋានផែនការគោលនយោបាយ វិទ្យាស្ថានតេ ជោសែន សាធារណការ និងដឹកជញ្ចូន នាយកដ្ឋានពាក់ព័ន្ធ នៃក្រសួងសាធារណការ និងដឹកជញ្ជូន ព្រម ទាំងមន្រ្តីថ្នាក់ក្រោមជាតិមកពីមន្ទីរសាធារណការ និងដឹកជញ្ជូនរាជធានី-ខេត្ត និងតំណាងរដ្ឋបាលខេត្តផងដែរ។ វគ្គបណ្តុះបណ្តាលនេះមានរយៈពេលពីរថ្ងៃចាប់ពីថ្ងៃទី០៤ ដល់ថ្ងៃទី០៥ ខែតុលា ឆ្នាំ២០២២ សហការ រៀបចំឡើងដោយក្រសួងសាធារណការ និង ដឹកជញ្ជូន និងអង្គការបូដា-កម្ពុជា ក្នុងគោលបំណងផ្តល់ចំណេះដឹង ចែករំលែកបទពិសោធន៍ បច្ចេកវិទ្យាថ្មីៗ និងជំនាញពាក់ព័ន្ធលើការគ្រប់គ្រងទឹកកខ្វក់ និង សំណល់ភក់ដល់ស្ថាប័នពាក់ព័ន្ធតាមរយៈអ្នកជំនាញជាតិ និងអ្នកជំនាញដៃគូសហការមកពីប្រទេសឥណ្ឌា ដែលមានបទពិសោធន៍ច្រើនឆ្នាំលើការងារអនាម័យ និងប្រព័ន្ឋចម្រោះទឹកកខ្វក់។ ថ្លែងក្នុងមតិស្វាគមន៍នាឱកាសនោះ ឯកឧត្តមអគ្គនាយក បានជំរុញលើកទឹកចិត្តឱ្យសិក្ខាកាមទាំងអស់ចូលរួមបញ្ចេញមតិយោបល់ លើកជាសំនួរពិភាក្សាផ្លាស់ប្តូរយោបល់គ្នាឱ្យបានផុលផុស ដើម្បីទទួលបានចំណេះដឹង បទពិសោធន៍ និងការអនុវត្តល្អៗពីគ្រូបង្គោល សំដៅយកទៅអនុវត្តនៅតាមបណ្តាអង្គភាពរបស់ខ្លួនរៀងៗខ្លួនឱ្យមានប្រសិទ្ធភាព ក្នុងស្មារតីជាក្រុមរួមគិត រួមធ្វើ រួមទទួលខុសត្រូវលើកិច្ចការងារ ដែលត្រូវអនុវត្ត។ ឆ្លៀតក្នុងឱកាសនោះដែរ ឯកឧត្តមអគ្គនាយក បានថ្លែងអំណរគុណយ៉ាងជ្រាលជ្រៅដល់សិក្ខាកាមទាំង អស់ដែលបានចំណាយពេលវេលាដ៏មានតម្លៃចូលរួមក្នុងវគ្គបណ្តុះបណ្តាលនេះ និងបានថ្លែងកោតសរសើរ និងវាយតម្លៃខ្ពស់ចំពោះអង្គការបូដា-កម្ពុជា និងក្រុមការងារអគ្គនាយកដ្ឋានប្រព័ន្ឋចម្រោះទឹកកខ្វក់ នៃក្រសួងសាធារណការ និងដឹកជញ្ជូន ដែលបានខិតខំប្រឹងប្រែងរៀបចំវគ្គបណ្តុះបណ្តាលនេះឡើង​។ គួរកត់សម្គាល់ថា៖ សិក្ខាកាមបានពិភាក្សាផ្លាស់ប្តូរមតិយោបល់យ៉ាងផុលផុសជាមួយគ្រូបង្គោលមកពី អង្គការបូដា-កម្ពុជា អំពីប្រព័ន្ធគ្រប់គ្រងឯកសាររបស់ប្រព័ន្ធប្រព្រឹត្តិកម្មទឹកកខ្វក់តាមបែបវិមជ្ឈការ ឬ ហៅថា “ឌីវ៉ាត” Decentralized Wastewater Treatment Solutions (DEWATS) ការបង្កើនប្រសិទ្ធភាពប្រព័ន្ធចម្រោះទឹកកខ្វក់ កាអភិវឌ្ឍប្រព័ន្ធប្រព្រឹត្តកម្មរួមជាក់លាក់ បរិមាណទឹកកខ្វក់សកល បញ្ហាប្រឈម ខ្សែសង្វាក់ វិធាន និងទិដ្ឋភាពទូទៅនៃការគ្រប់គ្រងទឹកកខ្វក់ក្នុងប្រទេសកម្ពុជា និងការកំណត់គោលដៅអភិវឌ្ឍន៍ប្រកបដោយចីរភាពដល់ឆ្នាំ២០៣០៕