ខេត្តកណ្តាល៖ជាថ្មីម្តងទៀតហើយ ស្ពាន ត្សឹបាសា ឫ ហៅថាស្ពានអ្នកលឿង បានរងការបំផ្លាញ ខូចខាតផ្នែកខ្នងកៅស៊ូ ដោយសារតែរថយន្តធំៗ ទំនងដឹកលើសទម្ងន់។ ជាក់ស្ដែង នារសៀលថ្ងៃទី ២០ ខែមេសា ឆ្នាំ២០១៨ម្សិលមិញ រថយន្តធុនធំដឹកស៊ីម៉ងត៍ ១គ្រឿង បានខំរោទ៍ម៉ាស៊ីន បើកឡើងលើស្ពានអ្នកលឿង រហូត ដាច់ទុយោខ្យល់ បណ្តាលឱ្យរេចង្កូតកៀបដាច់ថ្នល់កៅស៊ូ ២កន្លែងនៅលើស្ពាន ត្សឹបាសា ហៅស្ពានអ្នកលឿង នោះតែម្តង។ តាមសេចក្តីរាយការណ៍ ឱ្យដឹងថា រថយន្តនោះជាប្រភេទ យីឌុប ម៉ាកហីយ៉ាន់ដាយ ពណ៌ស្លឹកឈើ របស់កងដឹកជញ្ជូន យីហោ(C.H) ពាក់ស្លាកលេខ ព្រះសីហនុ3A1787 មានដឹកស៊ីម៉ងត៍ពេញរថយន្តតែម្តង។ សេចក្តីរាយការណ៍ បានបញ្ជាក់ថា រថយន្តនេះដឹកស៊ីម៉ងត៍ទំនងលើសចំណុះ ដែលបានកំណត់ ដល់ទៅរាប់សិបតោនឯណ្ណោះ ។ ហើយពេលបើកឡើងស្ពាន ខំប្រឹងរោទ៍ម៉ាស៊ីនឡើងខ្លាំងពេក ធ្វើឱ្យដាច់បំពង់ខ្យល់ ចាប់ហ្វ្រាំងលែងជាប់ បណ្តាលឱ្យរថយន្តរ៉េចង្កូត ចុះឡើងៗ កៀបនឹងថ្នល់កៅស៊ូស្ពាន បណ្តាលឱ្យថ្នល់ស្ពានបែក ខូចខាត យ៉ាងធ្ងន់ធ្ងរ។តែសំណាងដែរដែលមិនមានគ្រោះថ្នាក់ដល់អ្នកដំណើរផ្សេងទៀត។ ប្រភពពីប្រជាពលរដ្ឋនៅទីនោះ បានបង្ហើបថា រថយន្តដឹកស៊ីម៉ងត៍នេះអាច ដឹកលើសចំណុះ ច្រើនតោនណាស់ ហើយពុំបានបើកឡើងកន្លែងជញ្ជីងថ្លឹងរថយន្ត ដែលនៅគល់ស្ពាននោះទេ ទំនងជាមានការឃុបឃិតគ្នា ជាមួយមន្ទីរសាធារណការនិងដឹកជញ្ជូន ខេត្តកណ្ដាល។ ប្រភពបន្ថែមថា រថយន្តដឹកលើសទម្ងន់ភាគច្រើនអាច ពុំបានឡើងជញ្ជីងថ្លឹងទេ ដោយម្ចាស់រថយន្ត ទំនងគ្រាន់តែបង់លុយឱ្យទៅ មន្ត្រីជញ្ជីងនៅទីនោះជាការស្រេច ហើយបើកឡើងស្ពានអ្នកលឿងបានម៉ាសេរី ៕