“ជាមួយនឹងសំណង់ផ្លូវដ៏រឹងមាំ បរិក្ខារតាមដងផ្លូវមានគុណភាព និងចំណាំងផ្លាតបំភ្លឺពេលយប់ គួបផ្សំនឹងការគោរពច្បាប់ចរាចរណ៍យ៉ាងខ្ជាប់ខ្ជួន នោះបងប្អូនប្រជាពលរដ្ឋអាចបើកបរពេលយប់លើផ្លូវល្បឿនលឿនថ្មីភ្នំពេញ-ក្រុងព្រះសីហនុ នេះប្រកបដោយសុវត្ថិភាព” - ឯកឧត្តមទេសរដ្ឋមន្ត្រី ស៊ុន ចាន់ថុល - ក្រុងព្រះសីហនុ៖ នាព្រលប់ថ្ងៃព្រហស្បតិ៍ ១២រោច ខែភទ្របទ ឆ្នាំខាល ចត្វាស័ក ព.ស.២៥៦៦ ត្រូវនឹង ថ្ងៃទី២២ ខែកញ្ញា ឆ្នាំ២០២២ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និង ដឹកជញ្ជូន អមដំណើរដោយថ្នាក់ដឹកនាំក្រសួង និងក្រុមហ៊ុនសាជីវកម្មស្ពានថ្នល់ចិន (CRBC) បានអញ្ជើញចុះពិនិត្យ និងធ្វើដំណើរសាកល្បងនៅពេលយប់លើផ្លូវល្បឿនលឿនភ្នំពេញ-ព្រះសីហនុ ដើម្បី ប្រាកដថាការបើកបរលើផ្លូវល្បឿនលឿននៅវេលានេះ ពិតជាធានាបាននូវសុវត្ថិភាពជូនដល់បងប្អូនប្រជាពលរដ្ឋ ដែលកំពុងទន្ទឹងរង់ចាំការដាក់ឱ្យប្រើប្រាស់សាកល្បងដោយឥតគិតថ្លៃពេញមួយខែតុលា នឹងមកដល់នាពេលដ៏ខ្លីខាងមុខ។ ឆ្លើយតបនឹងចម្ងល់បងប្អូនប្រជាពលរដ្ឋដែលភាគច្រើនបានចោទជាសំណួរថា៖ “ហេតុអ្វីបានជាផ្លូវល្បឿន លឿនមិនបំពាក់ភ្លើងបំភ្លឺតាំងពីដើមទីរហូតដល់ចុងទី?” ឯកឧត្តមទេសរដ្ឋមន្ត្រី បានបញ្ជាក់យ៉ាងនេះថា៖ នៅបណ្តាប្រទេសនានា អំពូលភ្លើងបំភ្លឺផ្លូវល្បឿនលឿន ត្រូវបានបំពាក់នៅតាមទីតាំងសំខាន់ៗមួយចំនួន ប៉ុណ្ណោះដូចជា៖ ផ្លូវប្តូរទិស កន្លែងបង់ប្រាក់ និងកន្លែងឈប់សម្រាក់ ដើម្បីសន្សំសំចៃការប្រើប្រាស់ ថាមពលអគ្គិសនី។ ដូចគ្នានេះដែរ បើទោះបីផ្លូវល្បឿនលឿនមួយខ្សែថ្មីរបស់កម្ពុជាយើងនេះ មិនមានបំពាក់អំពូលភ្លើងបំភ្លឺយ៉ាងណាក៏ដោយ ក៏យើងបានបំពាក់ចំណាំងផ្លាតតាមរបាំងខណ្ឌចែកទ្រូងផ្លូវ របារ បង្គោលកំណត់ដែនផ្លូវ និងតាមគំនូសបែងចែកគន្លងផ្លូវ ដើម្បីជាជំនួយឱ្យអ្នកបើកបរយានយន្តងាយ ស្រួលក្នុងការបើកបររបស់ខ្លួនផងដែរ។ បើសិនជាបងប្អូនគោរពច្បាប់ចរាចរណ៍ និងបទដ្ឋានសុវត្ថិភាពចរាចរណ៍ផ្លូវល្បឿនលឿន នោះការបើកបរពិតជាមានសុវត្ថិភាព មិនថាពេលយប់ ឬពេលថ្ងៃឡើយ។ សូមជម្រាបជូនដែរថា៖ ការធ្វើដំណើរចុះត្រួតពិនិត្យពេលយប់លើផ្លូវល្បឿនលឿនខណៈនេះ គឺចាប់ផ្តើម ចេញពី “ស្ថានីយក្រុងព្រះសីហនុ” ឆ្ពោះមក “ស្ថានីយភ្នំពេញ”៕