លោកហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូន បានឱ្យវិទ្យុវាយោដឹងថា ដើម្បីប្តូរបណ្ណបើកបរជាតិទៅជាបណ្ណបើកបរអន្តរជាតិ គឺអ្នកបើកបរគ្រប់រូបត្រូវតែមានបណ្ណបើកបរជាតិច្បាប់ដើម អត្តសញ្ញាណបណ្ណសញ្ជាតិខ្មែរ រូបថតចំនួន០៤សន្លឹក និងត្រូវបង់ថ្លៃសេវាចំនួន២៥ម៉ឺនរៀល។ លោកបញ្ជាក់ថា ចំពោះអ្នកដែលកាន់បណ្ណបើកបរអន្តរជាតិនេះ នឹងអាចបើកបរបាននៅក្នុងប្រទេសហត្ថលេខីប្រមាណជា៩៩ប្រទេស ដោយមិនចាំបាច់ទៅរៀនយកបណ្ណបើកបរនៅក្រៅប្រទេសនោះទេ។ សូមជម្រាបថា បណ្ណអនុញ្ញាតបើកបរអន្តរជាតិដែលចេញដោយព្រះរាជាណាចក្រកម្ពុជានេះ គឺជាកូនសៀវភៅដែលមានទំហំ១៤៨x១០៥មីលីម៉ែត្រ ដែលមានសុភាពរយៈពេល១ឆ្នាំ៕