កិច្ចប្រជុំស្តីពីការត្រួតពិនិត្យរបាយការណ៍លទ្ធផលស្តីពីការវាយតម្លៃការអនុវត្តផែនការសកម្មភាពការងារឆមាសទី១ ឆ្នាំ២០២២ របស់ថ្នាក់ដឹកនាំ និងអង្គភាពជំនាញក្រោមឱវាទក្រសួង រួមទាំងការរៀបចំសេចក្តីព្រាងគោលការណ៍ណែនាំរួមស្តីពីការរៀបចំផែនការសកម្មភាពការងារសម្រាប់ឆ្នាំបន្តខាងមុខ។ ព្រឹកថ្ងៃពុធ ៤រោច ខែភទ្របទ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៤ ខែកញ្ញា ឆ្នាំ២០២២ នៅទីស្តីការក្រសួងសាធារណការ និងដឹកជញ្ជូន មានរៀបចំកិច្ចប្រជុំស្តីពីការត្រួតពិនិត្យរបាយការណ៍លទ្ធផលស្តីពីការវាយតម្លៃការអនុវត្តផែនការសកម្មភាពការងារឆមាសទី១ ឆ្នាំ២០២២ របស់ថ្នាក់ដឹកនាំ និងអង្គភាពជំនាញក្រោមឱវាទក្រសួង រួមទាំងការរៀបចំសេចក្តីព្រាងគោលការណ៍ណែនាំរួមស្តីពីការរៀបចំផែនការសកម្មភាពការងារសម្រាប់ឆ្នាំបន្តខាងមុខ ដឹកនាំកិច្ចប្រជុំដោយ ឯកឧត្តម សឿន ប៊ុនលី អគ្គនាយកផែនការ និងគោលនយោបាយ និងមានការចូលរួមពី លោក-លោកស្រីដែលជា អគ្គនាយករង, ប្រធាននិងអនុប្រធាននាយកដ្ឋាន រួមទាំងប្រធាននិងអនុប្រធានមន្ទីរសាធារណការ និងដឹកជញ្ជូន រាជធានី ខេត្ត ប្រធានការិយាល័យ និងមន្រ្តីបច្ចេកទេសតាមបណ្តាអង្គភាពនានាក្រោមឱវាទក្រសួង សរុបចំនួន ១២០រូប។ គោលបំណងសំខាន់នៃកិច្ចប្រជុំនេះគឺដើម្បីត្រួតពិនិត្យលើរបាយការណ៍លទ្ធផលស្តីពីការវាយតម្លៃការអនុវត្តផែនការសកម្មភាពការងារឆមាសទី១ ឆ្នាំ២០២២ នាពេលកន្លងមក ដើម្បីធ្វើការកំណត់អំពីបញ្ហាប្រឈមនានា និងដាក់ចេញនូវដំណោះស្រាយរួមឱ្យបានទាន់ពេលវេលា ឈានទៅបន្តការអនុវត្តផែនការសកម្មភាពការងារនាពេលខាងមុខឱ្យកាន់តែមានភាពល្អប្រសើរឡើងបន្ថែមទៀត។ កិច្ចប្រជុំក៏បានពិនិត្យផងដែរលើការរៀបចំសេចក្តីព្រាងគោលការណ៍ណែនាំរួមស្តីពីការរៀបចំផែនការសកម្មភាពការងារសម្រាប់ឆ្នាំបន្តខាងមុខ ដើម្បីមានមូលដ្ឋានក្នុងការអនុវត្តការងារឱ្យកាន់តែមានភាពច្បាស់លាស់ និងមានសង្គតិភាពឈានទៅសម្រេចឱ្យបាននូវទិសដៅការងារអាទិភាពនានារបស់ក្រសួងដែលបានដាក់ចេញស្របទៅតាមយុទ្ធសាស្រ្តចតុកោណដំណាក់កាលទី៤, ផែនការយុទ្ធសាស្រ្តអភិវឌ្ឍន៍ជាតិ (NSDP), គោលនយោបាយអភិវឌ្ឍន៍ឧស្សាហកម្ម (IDP), គោលនយោបាយសេដ្ឋកិច្ចនិងសង្គមឌីជីថល និងគោលនយោបាយនានារបស់រាជរដ្ឋាភិបាល។ ក្នុងឆមាសទី១ ឆ្នាំ២០២២នេះ តាមការវាយតម្លៃដោយផ្អែកលើប្រព័ន្ធពិនិត្យ តាមដាន និងវាយតម្លៃដ៏ត្រឹមត្រូវ និងច្បាស់លាស់ដោយប្រើប្រាស់ទិន្នន័យពីគ្រប់អង្គភាពសម្រាប់វាយតម្លៃលើផែនការសកម្មភាពការងារសរុបចំនួន ១ ០៧៧ សកម្មភាព ក្នុងនោះការអនុវត្តសម្រេចបានលទ្ធផល ៨២% ធៀបទៅនឹងផែនការសកម្មភាពការងារក្នុងឆមាសទី១ ដែលជាលទ្ធផលរួមរបស់អង្គភាពជំនាញទាំងអស់បានខិតខំប្រឹងប្រែងសម្រេចបានប្រកបដោយការយកចិត្តទុកដាក់ និងការទទួលខុសត្រូវខ្ពស់។