អាជ្ញាធរ និងប្រជាពលរដ្ឋប្រមាណជាង ១០០ នាក់ មកពីសង្កាត់ចំនួន ៤ ក្នុងក្រុងសៀមរាប បានចូលរួមកិច្ចពិភាក្សាជាសាធារណ:ស្តីពីការសាងសង់បណ្តាញលូខ្នែង ខ្នែងរង និងតំណរភ្ជាប់តាមផ្ទះ នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) សៀមរាប៖ នៅថ្ងៃ២២ ខែសីហា ឆ្នាំ២០២២ លោក ចៅ សុភៈភិបាល អគ្គនាយករងនៃអគ្គនាយកដ្ឋានប្រព័ន្ធចម្រោះទឹកកខ្វក់ និងជានាយកគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP) បានដឹកនាំកិច្ចពិភាក្សាជាសាធារណ:ស្តីពីការងារសាងសង់បណ្តាញលូខ្នែង ខ្នែងរង និងតំណរភ្ជាប់តាមផ្ទះ ក្នុងក្រុងសៀមរាប ខេត្តសៀមរាប ជាមួយអាជ្ញាធរ និងប្រជាពលរដ្ឋប្រមាណជាង ១០០ នាក់ មកពីសង្កាត់ចំនួន ៤ ៖ មកពីសង្កាត់ស្លក្រាម សង្កាត់គោកចក សង្កាត់សាលាកំរើក និងសង្កាត់ស្វាយដង្គំ និងមន្ត្រីជំនាញគ្រប់ផ្នែកពាក់ព័ន្ធចូលរួមផងដែរ។ កិច្ចពិភាក្សានេះធ្វើឡើងក្នុងគោលបំណង ផ្សព្វផ្សាយចែករំលែកនូវព័ត៌មានលម្អិត ដោយបង្ហាញពីអត្ថប្រយោជន៍សារៈសំខាន់ និងបញ្ជាក់ពីបញ្ហាផលរំខានបណ្តោះអាសន្នអំឡុងពេលសាងសង់នៃគម្រោង ដូចជា ការធ្វើចរាចរណ៍របស់គ្រឿងចក្រ ការហុយធូលីតិចតួច សំលេងរំខានជាដើម និងស្តាប់ការផ្តល់យោបល់ពីអជ្ញាធរ ចំណាប់អារម្មណ៍ប្រជាពលរដ្ឋមូលដ្ឋាន ពាក់ព័ន្ធគម្រោងសាងសង់បណ្តាញលូខ្នែង ខ្នែងរង និងតំណរភ្ជាប់តាមផ្ទះ ក្នុងក្រុងសៀមរាបនេះ ។ នាឱកាសនោះដែរ លោកអគ្គនាយករង បានបញ្ជាក់ពីការយកចិត្តទុកដាក់ របស់ថ្នាក់ដឹកនាំក្រសួងសាធារណការ និងដឹកជញ្ជូន លើសុខមាលភាពរបស់បងប្អូនប្រជាពលរដ្ឋ និងការខិតខំអភិវឌ្ឍន៍ជាបន្តបន្ទាប់លើហេដ្ឋារចនាសម្ព័ន្ធផ្លូវថ្នល់ បណ្តាញលូ ក្នុងក្រុងសៀមរាបនេះតួយ៉ាងមានគម្រោងផ្លូវ៣៨ខ្សែ ការតភ្ជាប់បណ្តាញលូទឹកកខ្វក់ក្នុងគម្រោងផ្លូវ៣៨ខ្សែ ជូនពលរដ្ឋដោយឥតគិតថ្លៃ និងជាក់ស្តែងគម្រោងការសាងសង់បណ្តាញលូខ្នែង ខ្នែងរង និងតំណរភ្ជាប់តាមផ្ទះ ក្រោមហិរញ្ញប្បទានរបស់ធានាគារពិភពលោក (World Bank) ដែលនឹងគ្រោងដំណើរការសាងសង់ក្នុងខែកញ្ញាខាងមុខនេះ។ នៅទីបញ្ចប់ លោកអគ្គនាយករង បានថ្លែងអំណរគុណដល់អាជ្ញាធរ ប្រជាពលរដ្ឋមកពីសង្កាត់ទាំង ៤ ក្នុងក្រុងសៀមរាប បានលើកឡើងជាមតិយោបល់ និងបានចូលរួមការសហកាជាមួយក្រសួង ជាមួយនោះក៏មានការប្តេជ្ញាចិត្តរបស់ក្រុមហ៊ុនសាងសង់ ដែលនឹងសន្យាគោរពអនុវត្តតាមកិច្ចសន្យាសាងសង់គម្រោង ដើម្បីសម្រេចឱ្យបានទៅតាមផែនការ ៕