[Post khmer] - មន្ត្រីមិនបារម្ភពីវិធានការប្រឆាំង Grab លើភាពផ្តាច់មុខ
2018-04-12
ទៅកាន់ទំព័រចុះផ្សាយក្នុង Post khmer
ភ្នំពេញៈ បន្ទាប់ពីការប្រកាសលក់ប្រតិបត្តិការរបស់ Uber នៅអាស៊ីអាគ្នេយ៍ឲ្យទៅ Grab ជាក្រុមហ៊ុនគូប្រកួតប្រជែងក្នុងតំបន់ និយតករ និងមន្ដ្រីរដ្ឋាភិបាលនៅក្នុងតំបន់បានចាត់វិធានការដើម្បីធានាឲ្យប្រាកដថា មិនប៉ះពាល់ដល់ការប្រកួតប្រជែងនៅក្នុងវិស័យនេះ។
និយតករនៅក្នុងប្រទេសហ្វីលីពីន និងសិង្ហបុរីដែលជាមូលដ្ឋានរបស់ Grab បានចាប់ផ្ដើមដំណើរការស៊ើបអង្កេតប្រឆាំងភាពផ្ដាច់មុខ ខណៈមន្ដ្រីរបស់ប្រទេសម៉ាឡេស៊ីបានថ្លែងថាពួកគេនឹងចាត់វិធានការតាមក្រោយផងដែរ។
កាលពីថ្ងៃចន្ទ នាយកដ្ឋានប្រកួតប្រជែង និងការពារអតិថិជនរបស់វៀតណាមបានចេញបញ្ជាឲ្យ Grab ត្រូវបង្ហាញថាខ្លួនមិនមែនជាក្រុមហ៊ុនផ្ដាច់មុខក្នុងប្រទេសនេះទេ។ ប៉ុន្តែសម្រាប់នៅកម្ពុជាវិញហាក់មិនមានប្រតិកម្មនោះទេ។
លោក ពៅ ម៉ាលី អគ្គនាយកនៃអគ្គនាយកដ្ឋានដឹកជញ្ជូនក្រសួងសាធារណការ និងដឹកជញ្ជូន (MPWT) បានថ្លែងថាកម្ពុជាស្វាគមន៍ និងគាំទ្រក្រុមហ៊ុនអន្តរជាតិនៅក្នុងប្រទេសកម្ពុជាជានិច្ច។
លោកថ្លែងថា៖ «ក្រុមហ៊ុនកាន់តែច្រើនដែលចូលមកកម្ពុជាធ្វើឲ្យតម្លៃ និងគុណភាពសម្រាប់អតិថិជនកាន់តែប្រសើរ»។ លោកហាក់មិនអើពើការបារម្ភការពីប្រឆាំងនឹងការប្រកួតប្រជែងដែលបានលើកឡើងដោយនិយតកររបស់បណ្ដាប្រទេសជិតខាងទេ។
ការឆ្លើយតបនេះបានឆ្លុះបញ្ចាំងពីគំនិតលោក ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូនដែលបានជួបជាមួយមន្ដ្រីក្រុមហ៊ុន Grab អំពីការទិញក្រុមហ៊ុន Uber កាលពីថ្ងៃព្រហស្បតិ៍។
ក្នុងអំឡុងកិច្ចប្រជុំនេះលោក ស៊ុន ចាន់ថុល បានបង្ហាញក្ដីសង្ឃឹមរបស់លោកថា៖ «ការច្របាច់បញ្ចូលគ្នានៃសេវាទាំង ២ នេះនឹងធ្វើឲ្យតម្លៃធ្លាក់ចុះសម្រាប់អត្ថប្រយោជន៍របស់ប្រជាជនកម្ពុជា» និង «បានជំរុញឲ្យពួកគេធ្វើការងារយ៉ាងជិតស្និទ្ធជាមួយក្រុមមកពីក្រសួង»។ នេះបើយោងតាមការបង្ហោះនៅទំព័រហ្វេសប៊ុករបស់ក្រសួង។
មិនមែនជាលើកដំបូងទេដែលលោក ស៊ុន ចាន់ថុល បានបង្ហាញការគាំទ្ររបស់លោកចំពោះក្រុមហ៊ុន Grab ។ ក្នុងអំឡុងការចាប់ផ្ដើមដំណើរការកាលពីខែធ្នូ លោករដ្ឋមន្ដ្រីបានថ្លែងថាលោកបានសង្ឃឹមថាពួកគេអាចមានការបោះផ្សាយមូលបត្រសាធារណៈលើកដំបូង (IPO) មុនដៃគូប្រកួតប្រជែងដែលលោកចង់សំដៅដល់ក្រុមហ៊ុន Uber។
លោក Wee Tang Yee ប្រធានប្រចាំប្រទេសរបស់ក្រុមហ៊ុន Grab បានកោតសរសើរសម្តីរបស់លោករដ្ឋមន្ដ្រីដោយប្រាប់ភ្នំពេញ ប៉ុស្ដិ៍ថាក្រសួងបានគាំទ្រយ៉ាងខ្លាំងដល់ក្រុមហ៊ុននេះចាប់តាំងពីពួកគេបានចាប់ផ្ដើមប្រតិបត្តិការនៅក្នុងប្រទេសកម្ពុជា។
មូលហេតុមួយដែលនិយតករមិនបង្កើនការស៊ើបអង្កេតនៅក្នុងប្រទេសកម្ពុជា អាចថាប្រទេសនេះខ្វះច្បាប់ប្រកួតប្រជែង និងការអនុវត្តប្រឆាំងនឹងការប្រកួតប្រជែង។
បើទោះបីយ៉ាងនេះក្តីនៅទីផ្សារកម្ពុជាមិនមែនមានតែក្រុមហ៊ុន Grab នោះទេ ខណៈកម្មវិធីហៅតាក់ស៊ីជិះក្នុងស្រុកមួយចំនួនកំពុងទទួលបានការគាំទ្រពីអ្នកប្រើប្រាស់។
Grab ប្រឈមនឹងការប្រកួតប្រជែងក្នុងស្រុកនៅកម្ពុជាទាក់ទងនឹងកម្មវិធីហៅតាក់ស៊ីជិះក្នុងស្រុកដូចជា កម្មវិធី PassApp កម្មវិធី Exnet និងកម្មវិធី UGo 711 Taxi ។
ប៉ុន្តែដើម្បីបង្កើនភាពប្រកួតប្រជែងក្រុមហ៊ុន Grab បានដំណើរការសេវាថ្មីៗ ដូចជា សេវា GrabBike និងសេវា GrabTukTuk ដែលជាការប្រកួតប្រជែងដោយផ្ទាល់កាន់ខែខ្លាំងជាមួយអាជីវកម្មបង្កើតថ្មីក្នុងស្រុកជាច្រើន។
លោក ហោ ដាលុច ស្ថាបនិក Exnet ជាកម្មវិធីហៅតាក់ស៊ីជិះដំបូងនៅកម្ពុជាតាំងពីឆ្នាំ ២០១៦ បានថ្លែងថា៖ «ក្រុមហ៊ុន Grab មិនទាន់មានរ៉ឺម៉កម៉ូតូច្រើនលើដងផ្លូវនៅឡើយទេ ប៉ុន្តែប្រហែលជាក្រុមហ៊ុននេះនឹងមានក្នុងពេលឆាប់ៗ ហើយបន្ទាប់មកយើងនឹងបារម្ភ»។
លោក ដាលុច ថ្លែងថាលោកមានបំណងសហការជាមួយ MPWT ខណៈក្រសួងមិនដែលបានទាក់ទងគាត់ ឬក្រុមហ៊ុនរបស់គាត់ទេ ប៉ុន្តែលោកមានការស្ទាក់ស្ទើរដោយសារកង្វះភាពច្បាស់លាស់របស់រដ្ឋាភិបាលជុំវិញការផ្ដល់អាជ្ញាប័ណ្ណ និងការគ្រប់គ្រងបទប្បញ្ញត្តិ។
លោកថ្លែងថា៖ «យើងបានជួបជាមួយសាលារាជធានីជាច្រើនដង ដើម្បីពិភាក្សាបទប្បញ្ញត្តិ ប៉ុន្តែពួកគេនៅតែនិយាយថា ពួកគេមិនប្រាកដពីរបៀបក្នុងការគ្រប់គ្រងពួកយើងនោះទេ»។ លោកបន្តថា៖ «អ្វីជាការគ្រប់គ្រង? យើងមិនដឹងទេ»។
សហគ្រិនក្នុងស្រុករូបនេះថ្លែងថាលោកបារម្ភថា បើមិនបានត្រួតពិនិត្យនោះទេ សេវា និងតម្លៃថ្មីរបស់ក្រុមហ៊ុន Grab នឹងនាំឲ្យមាន «ភាពផ្ដាច់មុខ»។
លោក ណាង ឃុននាង ដែលប្រតិបត្តិកម្មវិធី UGo 711 Taxi បានថ្លែងថាលោកមានការបារម្ភអំពីក្រុមហ៊ុន Grab និងថាកម្មវិធីក្នុងស្រុកនឹងត្រូវតែមានភាពច្នៃប្រឌិត ដើម្បីអាចប្រកួតប្រជែងបាន។ លោក ណាង បានអំពាវនាវឲ្យ MPWT ត្រូវសហការជាមួយអាជីវកម្មបង្កើតថ្មីក្នុងស្រុកដូចគ្នានឹងរបៀបដែលពួកគេសហការជាមួយក្រុមហ៊ុនធំៗដូចជាក្រុមហ៊ុន Grab ។ លោកថ្លែងថា៖ «ប្រសិនបើក្រសួងចង់ធ្វើល្អ គេនឹងធ្វើការងារកាន់តែជិតស្និទ្ធជាមួយក្រុមវិនិយោគិនក្នុងស្រុក និងកម្មវិធីក្នុងស្រុកនៅពេលអនាគត»៕
