[Rasmei Kampuchea Daily News] - គយចល័តក្រសួងនិងសមត្ថកិច្ចនៅបន្ទាយមានជ័យរឹបអូសរថយន្តចង្កូតស្ដាំអត់ទាន់មានពន្ធគយ១៩គ្រឿង
បន្ទាយមានជ័យ៖គយចល័តតំបន់៥នៃអគ្គនាយកដ្ឋានគយនិងរដ្ឋាករឬហៅថាគយចល័តក្រសួងប្រចាំខេត្តបន្ទាយមានជ័យ សៀមរាប កំពង់ធំ ឧត្តរមានជ័យ កំពង់ធំ និងខេត្តព្រះវិហារ មានការិយាល័យ កណ្តាលនៅផ្លូវជាតិលេខ៥ទឹកថ្លាក្រុងសិរីសោភ័ណខេត្តបន្ទាយមានជ័យសហការជាមួយសមត្ថកិច្ចចម្រុះក្នុងខេត្តបន្ទាយមានជ័យបានចុះប្រត្តិបត្តិការបង្ក្រាបនិងដកហូតរថយន្តចង្កូតស្តាំដែលមិនទាន់បានបង់ពន្ធគយចំនួន១៩គ្រឿង។នេះបើតាមមន្ត្រីគយចល័តតំបន់៥ ម្នាក់ប្រាប់កាសែតរស្មីកម្ពុជានៅថ្ងៃទី១១ខែសីហាឆ្នាំ២០២២ ។
លោកបន្តថា សមត្ថកិច្ចចម្រុះរួមមានកម្លាំងប៉ុស្តិ៍នគរបាលរដ្ឋបាលសង្កាត់អូរជ្រៅ(សង្កាត់ថ្មី) គយចល័តតបន់៥ ហើយមានការសម្របសម្រួលពីលោក លឹម ប៊ុនសុភ័ក្រ ព្រះរាជអាជ្ញារងនៃអយ្យការអមសាលាដំបូងខេត្ត បន្ទាយមានជ័យ ចុះបង្ក្រាបនិងដកហូត ព្រមទាំងទទួលរថយន្តចង្កូតស្តាំនៅចំណុចបុរីដួងច័ន្ទ ភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែតបានចំនួនសរុប ១១គ្រឿង។
ក្នុងនោះ បែងចែកជា ៖ម្ចាស់ដែលមិនប្រគល់ឡានឱ្យគយតំបន់ ៥ មានចំនួនបួនគ្រឿង ក្នុងនេះ មាន៖
Mazda2 មួយគ្រឿង Mazda3 មួយគ្រឿង Nissan Marchមួយគ្រឿងនិង Suzuki Swiffមួយគ្រឿង ។
ចំណែកម្ចាស់ដែលបានប្រគល់រថយន្តឱ្យគយតំបន់៥ មានចំនួនប្រាំពីរគ្រឿងក្នុងនេះមាន៖ Mazda 2 បួនគ្រឿង Mazda 3 មួយគ្រឿង Lexus 330 មួយគ្រឿងនិងLexus 400h មួយគ្រឿង ។
បន្ទាប់ពីធ្វើការពិនិត្យរួចមកបានស្ទូចដឹកនិងបើកបរយកទៅស្នាក់ការកណ្តាលរបស់គយចល័តតំបន់៥ ដូចទីតាំងខាងលលដើម្បីឲ្យម្ចាស់រថយន្តទៅបង់ពន្ធជូនរដ្ឋ ព្រោះនៅមិនទាន់ផុតឱសានវាទនៅឡើយ។
មន្ត្រីខាងលើបានបន្តថា ចំណែករថយន្តប្រាំបីគ្រឿងទៀត សមត្ថកិច្ចចម្រុះបានរឹបអូស នាំយកនៅកន្លែងផ្សេងទៀតក្នុងក្រុងប៉ោយប៉ែតនិងស្រុកក្រុង ក្នុងខេត្ត ៕
