កម្មវិធីបើកវិញ្ញាសារប្រឡងឆមាសទី១ ឆ្នាំសិក្សាមូលដ្ឋាន ជំនាន់ទី២ នៃនិស្សិតវិទ្យាស្ថានតេជោសែន សាធារណការ និងដឹកជញ្ជូន សម្រាប់ឆ្នាំសិក្សា២០២១-២០២២ ថ្ងៃចន្ទ ៤កើត ខែស្រាពណ៍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី០១ ខែសីហា ឆ្នាំ២០២២ នៅទីស្តីការក្រសួង ឯកឧត្តម ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូន បានអញ្ជើញជាអធិបតីក្នុងកម្មវិធីបើកវិញ្ញាសារប្រឡងបញ្ចប់ឆមាសទី១ ថ្នាក់ឆ្នាំសិក្សាមូលដ្ឋានរបស់ និស្សិតជំនាន់ទី២ នៃវិទ្យាស្ថានតេជោសែន សាធារណការ និងដឹកជញ្ជូន សម្រាប់ឆ្នាំសិក្សា២០២១-២០២២ ដោយមានការចូលរួមពីថ្នាក់ដឹកនាំ និងមន្ត្រីជំនាញពាក់ព័ន្ធរបស់វិទ្យាស្ថានផងដែរ។ ថ្លែងទៅកាន់អង្គពិធីនាឱកាសនោះ ឯកឧត្តមនាយក បានសម្តែងសេចក្តីសោមនស្សរីករាយ ដែលបាន ចូលរួមបើកវិញ្ញាសារប្រឡងបញ្ចប់ឆមាសទី១ ឆ្នាំសិក្សាមូលដ្ឋាន ជូននិស្សិតជំនាន់ទី២ របស់វិទ្យាស្ថាន តេជោសែន សាធារណការ និងដឹកជញ្ជូន និងបានជំរុញលើកទឹកចិត្តឱ្យក្មួយៗនិស្សិតទាំងអស់ខិតខំប្រឹងប្រែងប្រឡងឱ្យបានជាប់ទាំងអស់គ្នា ដោយគោរពតាមបទបញ្ជា និងការណែនាំរបស់អនុរក្ស ដែលឈរពិនិត្យតាមដានការប្រឡងនៅក្នុងថ្នាក់ប្រឡង។ បន្ថែមពីលើនេះ ឯកឧត្តមនាយក បានថ្លែងអំណរគុណដល់ថ្នាក់ដឹកនាំ និងមន្ត្រីពាក់ព័ន្ធរបស់វិទ្យាស្ថាន ដែលបានខិតខំប្រឹងប្រែងរៀបចំការប្រឡងឆមាសទី១ ឆ្នាំសិក្សាមូលដ្ឋាន របស់និស្សិតជំនាន់ទី២ នៃវិទ្យាស្ថានតេជោសែន សាធារណការ និងដឹកជញ្ជូននាពេលនេះ។ សូមជម្រាបជូនថា៖ ការប្រឡងបញ្ចប់ឆមាសទី១ ឆ្នាំសិក្សាមូលដ្ឋាន ជំនាន់ទី២ របស់និស្សិតវិទ្យាស្ថាន តេជោ សែន សាធារណការ និងដឹកជញ្ជូន ឆ្នាំសិក្សា២០២១-២០២២នេះ នឹងប្រព្រឹត្តទៅរយៈពេលបីថ្ងៃ ពេញ ទាំងព្រឹក និងពេលរសៀល ចាប់ពីថ្ងៃទី០១ ដល់ថ្ងៃទី០៣ ខែសីហា ឆ្នាំ២០២២ នៅសាលប្រជុំទីស្តី ការក្រសួង ដែលមាននិស្សិតជំនាន់ទី១ចូលរួមប្រឡងលើឯកទេសចំនួន៣ និងជំនាញចំនួន៦ រួមមាន៖ ១) ជំនាញសំណង់ផ្លូវថ្នល់ ផ្លូវល្បឿនលឿន ស្ពាន ផ្លូវដែក និងសំណង់កំពង់ផែ ២) ជំនាញប្រព័ន្ធចម្រោះ ទឹកកខ្វក់ ៣) ជំនាញសេដ្ឋកិច្ច និងគ្រប់គ្រងដឹកជញ្ជូនផ្លូវគោក ៤) ជំនាញភស្តុរភារកម្ម និងគ្រប់គ្រងខ្សែ ច្រវាក់ផ្គត់ផ្គង់ ៥) ជំនាញបើកបរនាវា និង៦) ជំនាញម៉ាស៊ីននានា៕