ជាទូទៅរាល់ការធ្វើដំណើរដែលចេញពីខេត្តមួយទៅខេត្ត ត្រូវប្រើប្រាស់ផ្លូវវែងឆ្ងាយ ហើយមានរយៈពេលយូរទម្រាំដល់។ ដូច្នេះដើម្បីសម្រួលដល់ការធ្វើដំណើររបស់ប្រជាពលរដ្ឋ ក៏ដូចជាកាត់បន្ថយពេលវេលាក្នុងការធ្វើដំណើរ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានជំរុញឱ្យក្រសួងសាធារណការ និង ដឹកជញ្ជូន សាងសង់ផ្លូវចំនួន ២ ខ្សែបន្ថែមតភ្ជាប់ខេត្ដចំនួន ៤។ តាមការបញ្ជាក់ពីឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅក្នុងកិច្ចប្រជុំពិនិត្យវឌ្ឍនភាពលើការរៀបចំផែនការមេស្តីពីការតភ្ជាប់ប្រព័ន្ធដឹកជញ្ជូនពហុមធ្យោបាយ និងភស្តុភារកម្ម និងផែនការមេគ្រប់ជ្រុងជ្រោយស្ដីពីប្រព័ន្ធដឹកជញ្ជូនអន្តរមធ្យោបាយកម្ពុជាឆ្នាំ២០២២-២០៣០ កាលពីថ្ងៃទី ២១ ខែ កក្កដា ឆ្នាំ២០២២ បានឲ្យដឹងថា ការជំរុញ និងណែនាំដ៏ខ្ពង់ខ្ពស់ពីសំណាក់សម្ដេចតេជោនាយករដ្ឋមន្ត្រីក្នុងការកសាងផ្លូវ ២ ខ្សែខាងលើគឺផ្លូវពីកំពង់ធំទៅកំពង់ឆ្នាំង និងពីបាត់ដំបងទៅសៀមរាប ដែលជាប្រព័ន្ធភស្តុភារកម្មប្រកបដោយប្រសិទ្ធភាព។ គួរបញ្ជាក់ផងដែរថា គម្រោងសាងសង់ផ្លូវពីកំពង់ធំ ទៅកំពង់ឆ្នាំង គឺតភ្ជាប់ពីស្រុកកំពង់លែង ខេត្តកំពង់ឆ្នាំងទៅដល់ក្រុងស្ទឹងសែនខេត្តកំពង់ធំមានចម្ងាយសរុប ៥៧,៣ គីឡូម៉ែត្រ។ ដោយឡែក ផ្លូវបាត់ដំបង ទៅ សៀមរាបវិញ មានប្រវែង ៧២គីឡូម៉ែត្រ ដោយឆ្លងកាត់ខេត្តចំនួន ៣ រួមមាន ខេត្តបាត់ដំបង ខេត្តបន្ទាយមានជ័យ និងខេត្តសៀមរាប។ ផ្លូវនេះអាចកាត់បន្ថយពេលវេលាធ្វើដំណើរ ដោយចំណេញចម្ងាយរហូតដល់ជិត ១០០ គីឡូម៉ែត្រឯណោះ។ ចំពោះទីតាំងនៃការសាងសង់ផ្លូវមួយខ្សែនេះនឹងចាប់ផ្ដើមពីផ្លូវជាតិលេខ ៥ ឆ្ពោះទៅចំណុចបញ្ចប់នៃផ្លូវជាតិលេខ ៦៕