ជួបសំណេះសំណាលជាមួយតំណាងមន្ទីរសាធារណការ និង ដឹកជញ្ជូនគ្រប់រាជធានី-ខេត្ត និងពិភាក្សា ការងារលើបញ្ហាប្រឈមនានាពាក់ព័ន្ធនឹងប្រព័ន្ធចម្រោះទឹកកខ្វក់នៅតាមតំបន់ទីប្រជុំជនសំខាន់ៗ ថ្ងៃចន្ទ ១២រោច ខែអាសាឍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៥ ខែកក្កដា ឆ្នាំ២០២២ នៅទីស្តីការក្រសួង ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានទទួល ជួបសំណេះសំណាលជាមួយតំណាងមន្ទីរសាធារណការ និង ដឹកជញ្ជូន គ្រប់រាជធានី-ខេត្ត និងពិភាក្សា ការងារលើបញ្ហាប្រឈមនានាពាក់ព័ន្ធនឹងប្រព័ន្ធចម្រោះទឹកកខ្វក់នៅតាមតំបន់ទីប្រជុំជនសំខាន់ៗ ដោយមានការចូលរួមពីថ្នាក់ដឹកនាំក្រសួង ថ្នាក់ដឹកនាំ និងមន្ត្រីជំនាញពាក់ព័ន្ធនៃអគ្គនាយកដ្ឋានប្រព័ន្ធចម្រោះទឹកកខ្វក់។ ការជួបសំណេះសំណាលនេះ ត្រូវបានធ្វើឡើងជាលើកដំបូងបន្ទាប់ពីឯកឧត្តមរដ្ឋលេខាធិការ ត្រូវបាន ឯកឧត្តមទេស រដ្ឋមន្ត្រី ស៊ុន ចាន់ថុល ប្រគល់ភារកិច្ចបន្ថែមលើការងារគ្រប់គ្រងប្រព័ន្ធចម្រោះទឹកកខ្វក់ និងក្នុងគោលបំណងដើម្បីស្តាប់របាយការណ៍សង្ខេបអំពីបញ្ហាប្រឈមនានា ដែលពាក់ព័ន្ធនឹងប្រព័ន្ធចម្រោះទឹកកខ្វក់នៅតាមតំបន់ទីប្រជុំជនសំខាន់ៗ ពីសំណាក់តំណាងមន្ទីរសាធារណការ និងដឹកជញ្ជូន ផងដែរ៕