អាជ្ញាធរ នឹងធ្វើការផ្អាកចរាចរជាបណ្ដោះអាសន្នលើគន្លងផ្លូវចុះពីស្ពានព្រែកក្ដាមបត់ស្ដាំត្រើយខាងលិច រយៈពេល ១៤ ថ្ងៃ គិតចាប់ពីថ្ងៃទី១៨ ស្អែកនេះ រហូតដល់ថ្ងៃទី៣១ ខែកក្កដា ឆ្នាំ២០២២។ នេះបើយោងតាមសេចក្ដីជូនដំណឹងរបស់មន្ទីរសាធារណការ និងដឹកជញ្ជូនខេត្ដកណ្ដាល កាលពីថ្ងៃទី១៥ ខែកក្កដា ឆ្នាំ២០២២កន្លងទៅ។ នៅក្នុងសេចក្ដីជូនដំណឹងរបស់មន្ទីរបានបញ្ជាក់ការផ្អាកនេះគឺដោយសារ គន្លងផ្លូវចុះលើស្ពានព្រែកក្ដាមបត់ស្ដាំត្រើយខាងលិចត្រូវធ្វើការជួសជុលអ៊ុតកៅស៊ូឡើងវិញ ដូចនេះការធ្វើចរាចរនៅលើគន្លងផ្លូវនេះត្រូវបានបិទជាបណ្ដោះអាសន្នចាប់ពីថ្ងៃទី១៨ ដល់ថ្ងៃទី៣១ ខែកក្កដា ឆ្នាំ២០២២ ដោយអនុញ្ញាតឱ្យយានយ​ន្តទាំងអស់ធ្វើចរាចរតាមទិសដៅត្រង់ចុះតាមរង្វង់មូល ហើយបត់តាមក្រោមស្ពានវិញ។ សេចក្ដីដូចបានជម្រាបជូនខាងលើ មន្ទីរសាធារណការ និងដឹកជញ្ជូនខេត្ដកណ្ដាល សូមឲ្យប្រជាពលរដ្ឋទាំងអស់ ព្រមស្ថាប័នមានសមត្ថកិច្ចពាក់ព័ន្ធមេត្តាជ្រាប និងជួយចូលរួមសហការអនុវត្តប្រកបដោយប្រសិទ្ធភាព ៕