[Phnom Penh Post] - រថយន្តចង្កូតស្តាំគ្មានពន្ធត្រូវបានអនុញ្ញាតឱ្យទៅបង់ពន្ធ និងចុះបញ្ជីផ្តល់បណ្ណសម្គាល់ ដោយមិនតម្រូវឱ្យកែចង្កូត
2022-07-14
ទៅកាន់ទំព័រចុះផ្សាយក្នុង Phnom Penh Post
ភ្នំពេញៈ ក្រសួងសាធារណការ និងដឹកជញ្ជូន ណែនាំដល់ម្ចាស់រថយន្តចង្កូតស្តាំគ្មានពន្ធដែលមានស្រាប់ក្នុងស្រុក ចូលទៅបំពេញកាតព្វកិច្ចពន្ធនិងអាករដោយពុំចាំបាច់កែច្នៃចង្កូតពីស្តាំមកឆ្វេង និងអាចចុះបញ្ជីផ្តល់បណ្ណសម្គាល់យានជំនិះ និងបំពាក់ស្លាកលេខសម្គាល់យានជំនិះបានជាផ្លូវការហើយ។
សេចក្តីណែនាំរបស់ក្រសួងសាធារណការ ចុះថ្ងៃទី ១៣ ខែកក្កដា បានជម្រាបជូនដល់ អគ្គនាយកដ្ឋាន ដឹកជញ្ជូនផ្លូវគោក មន្ទីរសាធារណការ និងដឹកជញ្ជូនរាជធានី-ខេត្ត និងអង្គភាពច្រកចេញចូលតែមួយ រាជធានី-ខេត្ត ត្រូវទទួលចុះបញ្ជីផ្តល់បណ្ណសម្គាល់យានជំនិះ និងបំពាក់ស្លាកលេខសម្គាល់យានជំនិះ លើរថយន្តចង្កូតស្តាំមានស្រាប់ក្នុងប្រទេសដែលបានបំពេញកាតព្វកិច្ចពន្ធ និងអាកររួចរាល់ ស្របតាមសេចក្តីជូនដំណឹងរបស់អគ្គនាយកដ្ឋានគយ និងរដ្ឋាករកម្ពុជា។
សេចក្តីជូនដំណឹងបញ្ជាក់ថា៖ «ការអនុញ្ញាតនេះយោងតាមប្រសាសន៍ និងការសម្រេចដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី ៦ ខែ កក្កដា ឆ្នាំ ២០២២ ដែលបានអនុគ្រោះឱ្យម្ចាស់រថយន្តចង្កូតស្តាំគ្មានពន្ធមានស្រាប់ក្នុងប្រទេសដែលនៅសេសសល់ចូលមកបំពេញកាតព្វកិច្ចពន្ធ និងអាករ ដោយពុំចាំបាច់កែច្នៃចង្កូតពីស្តាំមកឆ្វេង»។
ក្រសួងបញ្ជាក់ថា ទទួលបានសេចក្ដីណែនាំនេះ អគ្គនាយកដ្ឋានដឹកជញ្ជូនផ្លូវគោក មន្ទីរសាធារណការ និងដឹកជញ្ជូនរាជធានី-ខេត្ត និងអង្គភាពច្រកចេញចូលតែមួយរាធានី-ខេត្ត ត្រូវអនុវត្តឱ្យមានប្រសិទ្ធភាពចាប់ពីថ្ងៃចុះហត្ថលេខានេះតទៅ ដោយធ្វើតាមបែបបទនិងនីតិវិធីដូចបានអនុវត្តកន្លងមក នូវទម្រង់ស្លាកលេខ «ចង្កូតស្តាំ»។
លោក ឈួន វន់ អគ្គនាយកដឹកជញ្ជូនផ្លូវគោក នៃក្រសួងសាធារណការ និងដឹកជញ្ជូនឱ្យដឹងថា បច្ចុប្បន្នរថយន្តចង្កូតស្តាំដែលចុះបញ្ជីបំពាក់ស្លាកលេខរួចហើយមានជាង ៥ ០០០ គ្រឿង ហើយនៅសេសសល់ប្រហែលជាង ២ ០០០ គ្រឿងទៀត ដែលមិនទាន់មកចុះបញ្ជី។
ប្រធានមន្ទីរសាធារណការ និងដឹកជញ្ជូនខេត្តកណ្តាល លោក ម៉ឹង យូឡេង ថ្លែងថា ដើម្បីងាយស្រួលក្នុងការគ្រប់គ្រង ក្រសួងបានបង្កើតស្លាកលេខពិសេស ថ្មីសម្រាប់រថយន្តចង្កូតស្តាំ ដោយលោកស្នើដល់អ្នកបើកបរត្រូវគោរពច្បាប់ចរាចរណ៍។
លោកថ្លែងថា៖ «ដោយសារយើងបានធ្វើការកត់សម្គាល់រថយន្តចង្កូតស្តាំ ដាក់លេខពិសេស មានន័យថាបំពាក់ស្លាកលេខផ្សេងខុសពីរថយន្តដទៃ ងាយស្រួលក្នុងការតាមដាន ក្នុងការប្រើប្រាស់របស់គាត់ ដើម្បីទៅថ្ងៃក្រោយពេលគាត់មានបញ្ហាអ្វីកើតឡើងងាយស្រួលយើងកត់សម្គាល់ និងងាយស្រួលក្នុងការគ្រប់គ្រង»។
លោកថា បច្ចុប្បន្នការចុះបញ្ជីស្លាកលេខយានយន្តត្រូវបានធ្វើវិមជ្ឈការផ្ទេរភារកិច្ចទៅឱ្យការិយាល័យច្រកចេញចូលតែមួយ ហើយការធ្វើស្លាកនេះក៏មិនខុសពីរថយន្តចង្កូតឆ្វេងដែរ គឺត្រូវភ្ជាប់មកនូវក្រដាសពន្ធ និងក្រដាសឆៀកត្រឹមត្រូវ។
លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំកម្ពុជាថ្លែងថា ផ្អែកតាមមូលដ្ឋានផ្នែកសុវត្ថិភាពគឺចាំបាច់រថយន្តចង្កូតស្តាំ ត្រូវតែធ្វើការកែចង្កូត ប៉ុន្តែការអនុញ្ញាតនេះ គឺជាសិទ្ធិសម្រេចរបស់ប្រមុខរដ្ឋាភិបាលក្នុងការអនុញ្ញាតឱ្យរថយន្តប្រភេទនេះអាចចរាចរនៅលើដងផ្លូវបាន។
ជាមួយគ្នានេះលោក បញ្ញា ស្នើឱ្យមានការកំណត់និងកម្រិតនីតិវិធីច្បាស់លាស់ណាមួយ សម្រាប់អ្នកបើកបររថយន្តប្រភេទចង្កូតស្តាំនេះ ដើម្បីបញ្ចៀសគ្រោះថ្នាក់នានានៅលើដងផ្លូវ ខណៈការបើកបររថយន្តចង្កូតស្តាំ នៅក្នុងប្រព័ន្ធច្បាប់ដែលប្រកាន់ស្តាំ គឺប្រឈមនឹងហានិភ័យខ្ពស់។
អគ្គនាយកដ្ឋានគយ និងរដ្ឋាករកម្ពុជាបានឱ្យដឹងថា គិតត្រឹមថ្ងៃទី ៣០ ខែ មិថុនា ឆ្នាំ ២០២២ ដែលជាឱសានវាទ ចុងក្រោយនៃការអនុញ្ញាតឱ្យម្ចាស់រថយន្តគ្មានពន្ធមានស្រាប់ចូលបំពេញកាតព្វកិច្ចពន្ធអាករ គឺទទួលបាន ៧៦លានដុល្លារ។ ក្នុងនោះ រថយន្តទាំងអស់ដែលជ្រកក្រោមស្លាកលេខផ្សេង មានចំនួន ៩ ៧៥៣ គ្រឿង ចំណែករថយន្តចង្កូតស្តាំដែលចូលមកកក់ប្រាក់ និងបង់ពន្ធ មានចំនួន ៧ ០៤០ គ្រឿង។
ជាមួយគ្នានេះ អគ្គនាយកដ្ឋានគយទុកពេលជាង ២០ ថ្ងៃ ដល់ម្ចាស់រថយន្តចង្កូតស្តាំគ្មានពន្ធដែលមានស្រាប់ក្នុងប្រទេស រួសរាន់ទៅស្នើសុំចុះបញ្ជីរថយន្តចង្កូតស្តាំ ដល់ថ្ងៃទី ៣១ ខែ កក្កដា ឆ្នាំ ២០២២។ ផុតរយៈពេលនេះ រថយន្តដែលខកខានមិនបានចុះបញ្ជីនឹងត្រូវចាត់ទុក ជារថយន្តគ្មានស្រាប់ (ទើបរត់ពន្ធចូលមកថ្មី) ដែលជាមុខសញ្ញានៃការបង្ក្រាប និងរឹបអូសតាមច្បាប់ជាធរមាន៕
