គណៈកម្មការអន្តរក្រសួងបានបញ្ចប់កិច្ចប្រជុំពិភាក្សាលើសេចក្តីព្រាងអនុក្រឹត្យស្តីពីប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ(Port EDI)ដោយជោគជ័យ និងត្រៀមបន្តនីតិវិធីដើម្បីឱ្យអនុក្រឹត្យនេះបានចូលជាធរមាននាពេលខាងមុខ ថ្ងៃចន្ទ ១៣កើត ខែអាសាឍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១១ ខែកក្កដា ឆ្នាំ២០២២ នៅទីស្តីការក្រសួង ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំអន្តរក្រសួងបន្តស្តីពីសេចក្តីព្រាងអនុក្រឹត្យស្តីពីប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ (Port EDI)។ សមាសភាពអញ្ជើញចូលរួមកិច្ចប្រជុំនេះរួមមានថ្នាក់ដឹកនាំក្រសួង ឯកឧត្តម ម៉ក់ ស៊ីដេត អគ្គនាយកនៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ តំណាងអញ្ជើញមកពីអគ្គនាយកដ្ឋានរដ្ឋបាល និងហិរញ្ញវត្ថុ អគ្គនាយកដ្ឋានផែនការ និងគោលនយោបាយ អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ អគ្គនាយកដ្ឋានអនោ្តប្រវេសន៍ អគ្គនាយកដ្ឋានគយ និងរដ្ឋាករកម្ពុជា អគ្គនាយកដ្ឋានបច្ចេកទេសសុខាភិបាល កំពង់ផែស្វយ័តក្រុងព្រះសីហនុ កំពង់ផែស្វយ័តភ្នំពេញ ប្រធាននាយកដ្ឋាននាវាជំនួញសមុទ្រ ប្រធាននាយកដ្ឋាននីតិកម្ម តំណាងមកពីនាយកដ្ឋានព័ត៌មានវិទ្យា និងទំនាក់ទំនងសាធារណៈ និងមន្ត្រីជំនាញពាក់ព័ន្ធ។ ជាលទ្ធផល អង្គប្រជុំបានពិនិត្យពិភាក្សា និងសម្រេចលើជំពូកទី៥ ស្តីពីការផ្តល់ការព្យួរ និងការដកហូតវិញ្ញាបនបត្រ និងលិខិតអនុញ្ញាត ជំពូកទី៦ស្តីពីម្ចាស់នាវា ឬភ្នាក់ងារនាវា ជំពូកទី៧ ស្តីពីអន្តរប្បញ្ញត្តិ និងជំពូកទី៨ ស្តីពីអវសានប្បញ្ញត្តិ។ គួររំលឹកផងដែរថា៖ សេចក្តីព្រាងអនុក្រឹត្យស្តីពីប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ (Port EDI) មានចំនួន៨ជំពូក និង៣២មាត្រា ហើយរហូតមកដល់ពេលនេះ អង្គប្រជុំបានបញ្ចប់កិច្ចប្រជុំពិភាក្សាដោយជោគជ័យ និងត្រៀមបន្តនីតិវិធីដើម្បីឱ្យអនុក្រឹត្យនេះបានចូលជាធរមាននាពេលខាងមុខ៕