កិច្ចប្រជុំពិនិត្យវឌ្ឍនភាពប្រចាំខែនៃគម្រោងប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ(Port EDI) ត្រូវបានដឹកនាំដោយឯកឧត្តមរដ្ឋលេខាធិការ រស់ វណ្ណា ថ្ងៃអង្គារ ១៤រោច ខែជេស្ឋ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៨ ខែមិថុនា ឆ្នាំ២០២២ នៅទីស្តីការក្រសួង ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញ ដឹកនាំកិច្ចប្រជុំពិនិត្យមើលវឌ្ឍនភាពប្រចាំខែនៃគម្រោងប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ(Port EDI) ដោយមានការចូលរួមផ្ទាល់ពីថ្នាក់ដឹកនាំក្រសួង ឯកឧត្តម ម៉ក់ ស៊ីដេត អគ្គនាយក នៃអគ្គនាយក ដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ លោកប្រធាននាយកដ្ឋាននាវាជំនួញសមុទ្រ តំណាងនាយកដ្ឋានព័ត៌មានវិទ្យា និងទំនាក់ទំនងសាធារណៈ ក្រុមអ្នកប្រឹក្សាពីក្រុមហ៊ុន Mitsubishi Research Institute, Inc និងក្រុមហ៊ុន Exeo Group Corporation មន្រ្តីជំនាញពាក់ព័ន្ធក្រោមឱវាទក្រសួង និង ការចូលរួមតាមប្រព័ន្ធវីដេអូពីចម្ងាយពីតំណាងកំពង់ផែស្វយ័តក្រុងព្រះសីហនុ កំពង់ផែស្វយ័តភ្នំពេញ អគ្គនាយកដ្ឋានគយ និងរដ្ឋាករកម្ពុជា ចត្តាឡីស័ក នាយកដ្ឋានច្រកទ្វារទី២នៃអគ្គនាយកដ្ឋានអន្តោប្រវេសន៍ និងនាយការិយាល័យច្រកទ្វារផ្លូវទឹក និងកំពង់ផែអន្តរជាតិ អង្គប្រជុំបានពិភាក្សាលើលទ្ធផលវឌ្ឍនភាពក្នុងខែមិថុនានៃគម្រោងប្រព័ន្ធ Port EDI ដែលរួមមាន៖ បានបិទបញ្ចប់ការរៀបចំមជ្ឈមណ្ឌលរក្សាទិន្នន័យ និងដំឡើងបរិក្ខារនានា បានបញ្ចប់ការតភ្ជាប់ប្រព័ន្ធPort EDI និងប្រព័ន្ធគ្រប់គ្រងរបស់ក្រសួងសាធារណៈការ និងដឹកជញ្ជូន ក្នុងមជ្ឈមណ្ឌលរក្សាទិន្នន័យ បានបញ្ចប់ការធ្វើតេស្តសាកល្បងដំណាក់កាលទី២(User Acceptance Test 2) បានបញ្ចប់ការបណ្តុះបណ្តាលដល់មន្រ្តីទទួលបន្ទុកនៃនាយកដ្ឋានព័ត៌មានវិទ្យា និងទំនាក់ទំនងសាធារណៈ លើការគ្រប់គ្រង និងដំណើរការប្រព័ន្ធ Port EDI បានបញ្ចប់ការសាកល្បងតភ្ជាប់ប្រព័ន្ធ Port EDI ជាមួយប្រព័ន្ធបញ្ជរ ជាមួយជាតិ បានបញ្ចប់ការបណ្តុះបណ្តាលដល់ភ្នាក់ងារនាវាលើការប្រើប្រាស់ប្រព័ន្ធPort EDI និងបានបញ្ចប់ការពិនិត្យលើសេចក្តីព្រាងអនុក្រឹត្យស្តីពីប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែក្នុងកម្រិតថ្នាក់ដឹកនាំក្រសួង និងបន្តពិភាក្សាក្នុងកម្រិតអន្តរក្រសួង។ បន្ថែមពីលើនេះ អង្គប្រជុំបានពិភាក្សាលើទិសដៅដែលត្រូវអនុវត្តបន្តសម្រាប់ខែកក្កដា ឆ្នាំ២០២២ ដែលរួមមាន៖ រៀបចំសាកល្បងប្រើប្រាស់ហត្ថលេខាឌីជីថល និងពិភាក្សាលើតម្លៃសេវាសម្រាប់ការទិញសិទ្ធិប្រើប្រាស់ហត្ថលេខាឌីជីថល រៀបចំវីដេអូណែនាំអំពីប្រព័ន្ធPort EDI សម្រាប់បង្ហាញក្នុងកម្មវិធីសម្ពោធដាក់ឱ្យប្រើប្រាស់ប្រព័ន្ធPort EDI បន្តការធ្វើតេស្តសាកល្បងដំណាក់កាលទី៣ (UAT3) និងត្រៀមកែតម្រូវបន្ទាប់ពីធ្វើតេស្តសាកល្បងរួច រៀបចំអនុស្សារណៈយោគយល់(MoU) រវាងក្រសួង សាធារណការ និងដឹកជញ្ជូន និងធនាគារជាដៃគូសម្រាប់ទូទាត់កម្រៃសេវាសាធារណៈក្នុងប្រព័ន្ធPort EDI បញ្ចូលឯកសារពាក់ព័ន្ធទាំងអស់នៃប្រព័ន្ធPort EDIទៅក្នុង MPWT Cloud រៀបចំឯកសារចុះហត្ថលេខាទទួលយក និងបញ្ចប់គម្រោងប្រព័ន្ធPort EDI គ្រោងនឹងរៀបចំកិច្ចប្រជុំពិភាក្សារវាងនាយកដ្ឋាន នាវាជំនួញសមុទ្រ នាយកដ្ឋានព័ត៌មានវិទ្យា និងទំនាក់ទំនងសាធារធារណៈ នាយកដ្ឋានហិរញ្ញវត្ថុ និងខុទ្ទកាល័យឯកឧត្តមទេសរដ្ឋមន្រ្តីស្តីពីការដាក់ឱ្យដំណើរការសាកល្បងប្រព័ន្ធPort EDI ការដាក់ឱ្យដំណើរការសាកល្បងប្រព័ន្ធPort EDI នៅថ្ងៃទី១៧ ខែសីហា ឆ្នាំ២០២២ ក្រោមអធិបតីភាពដ៏ខ្ពង់ខ្ពស់ ឯកឧត្តមទេសរដ្ឋមន្រ្តី ស៊ុន ចាន់ថុល និងជំរុញបញ្ចប់ការពិនិត្យពិភាក្សាអន្តរក្រសួងលើសេចក្តីព្រាងអនុក្រឹត្យស្តីពីប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ(Port EDI)៕