និស្សិតវិទ្យាស្ថានតេជោសែន សាធារណការ និងដឹកជញ្ជូន ចំនួន១៤0នាក់ កំពុងប្រឡងបញ្ចប់ឆមាសទី១ ឆ្នាំទី២ ជំនាន់ទី១ សម្រាប់ឆ្នាំសិក្សា២០២១-២០២២ ក្រោមការត្រួតពិនិត្យដោយយកចិត្តទុកដាក់ពីអនុរក្ស ថ្ងៃចន្ទ ១៣រោច ខែជេស្ឋ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៧ ខែមិថុនា ឆ្នាំ២០២២ នៅទីស្តីការក្រសួង ឯកឧត្តម ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូន បានអញ្ជើញជាអធិបតីក្នុងកម្មវិធីបើកវិញ្ញាសារប្រឡង បញ្ចប់ឆមាសទី១ ឆ្នាំទី២ របស់និស្សិតជំនាន់ទី១ នៃវិទ្យាស្ថានតេជោសែន សាធារណការ និងដឹកជញ្ជូន សម្រាប់ឆ្នាំសិក្សា២០២១-២០២២ ដោយមានការ ចូលរួមពីថ្នាក់ដឹកនាំវិទ្យាស្ថាន លោក លោកស្រី ថ្នាក់ដឹកនាំអង្គភាពក្រោមឱវាទក្រសួង និងក្រុមការងារ វិទ្យាស្ថានផងដែរ។ ថ្លែងក្នុងមតិស្វាគមន៍នាឱកាសនោះ ឯកឧត្តមនាយកវិទ្យាស្ថាន បានគូសបញ្ជាក់អំពីបេសកកម្មរបស់វិទ្យាស្ថានក្នុងការបណ្តុះបណ្តាលនិស្សិតប្រកបដោយសក្តានុពលឱ្យមានសមត្ថភាពពិតប្រាកដ ចំណេះដឹងទូលំទូលាយ សីលធម៌ និងគុណធម៌ និងបានសម្តែងសេចក្តីសោមនស្សរីករាយដែលបានចូលរួមបើក វិញ្ញាសារប្រឡងបញ្ចប់ឆមាសទី១ ឆ្នាំទី២ ជូននិស្សិតជំនាន់ទី១ នៃវិទ្យាស្ថានតេជោសែន សាធារណការ និងដឹកជញ្ជូន។ ឯកឧត្តមនាយកវិទ្យាស្ថាន បានជំរុញលើកទឹកចិត្តឱ្យក្មួយៗនិស្សិតទាំងអស់ខិតខំប្រឹងប្រែងប្រឡងឱ្យបានជាប់ទាំងអស់គ្នា ដោយគោរពតាមបទបញ្ជា និងការណែនាំរបស់វិទ្យាស្ថាន ក៏ដូចជាបទបញ្ជា និងការណែនាំរបស់អនុរក្សដែលឈរពិនិត្យតាមដានការប្រឡងនៅក្នុងថ្នាក់ប្រឡងដោយយកចិត្តទុកដាក់។ ឆ្លៀតក្នុងឱកាសនោះដែរ ឯកឧត្តមនាយកវិទ្យាស្ថាន បានថ្លែងអំណរគុណយ៉ាងជ្រាលជ្រៅដល់ថ្នាក់ដឹកនាំ និងក្រុមការងារវិទ្យាស្ថាន ដែលបានខិតខំប្រឹងប្រែងរៀបចំការប្រឡងឆមាសទី១ ឆ្នាំទី២ របស់និស្សិត ជំនាន់ទី១ នៃវិទ្យាស្ថានតេជោសែន សាធារណការ និងដឹកជញ្ជូន។ សូមជម្រាបជូនថា៖ ការប្រឡងនេះមានរយៈពេលបីថ្ងៃពេញទាំងព្រឹក និងពេលរសៀល ចាប់ពីថ្ងៃទី២៧ ដល់ ថ្ងៃទី២៩ ខែមិថុនា ឆ្នាំ២០២២ នៅសាលប្រជុំទីស្តីការក្រសួង ដែលមាននិស្សិតចំនួន១៤០នាក់ចូលរួមប្រឡងលើឯកទេសចំនួន៣ និងជំនាញចំនួន៦រួមមាន៖ ១) ជំនាញសំណង់ផ្លូវថ្នល់ ផ្លូវល្បឿនលឿន ស្ពាន ផ្លូវដែក និងសំណង់កំពង់ផែ ២) ជំនាញប្រព័ន្ធចម្រោះទឹកកខ្វក់ ៣) ជំនាញសេដ្ឋកិច្ច និងគ្រប់គ្រងដឹកជញ្ជូនផ្លូវគោក ៤) ជំនាញភស្តុភារកម្ម និងគ្រប់គ្រងខ្សែច្រវាក់ផ្គត់ផ្គង់ ៥) ជំនាញបើកបរនាវា និង៦) ជំនាញម៉ាស៊ីននានា៕