ព្រះសីហនុ៖ ឯកឧត្តម សួន ភារិទ្ធ អគ្គនាយកនៃអគ្គនាយកដ្ឋានប្រព័ន្ធចម្រោះទឹកកខ្វក់នៃក្រសួងសាធារណការ និងដឹកជញ្ជូននៅថ្ងៃអង្គារទី២១ ខែមិថុនា ឆ្នាំ២០២២នេះ បានអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយសៀវភៅណែនាំ ស្តីពីការរៀបចំកម្មវិធីលើកកម្ពស់ការយល់ដឹងជាសាធារណៈរបស់ប្រជាពលរដ្ឋអំពីបណា្តញលូ ប្រព័ន្ធចម្រោះ និងសេវាកម្មទឹកកខ្វក់ថ្នាក់ក្រោមជាតិ ដោយមានការអញ្ជើញចូលរួមពីលោក អៀម សារិន អភិបាលស្ដីទីនៃគណៈអភិបាលក្រុងព្រះសីហនុ ខេត្តព្រះសីហនុ លោក សុខ វណ្ណា ប្រធានកម្មវិធីអង្គការ សហប្រជាជាតិសម្រាប់លំនៅឋានមនុស្សជាតិ (UN-Habitat) អាជ្ញាធរសមត្ថកិច្ចគ្រប់ផ្នែកពាក់ព័ន្ធ សរុប ប្រមាណជាង៥០នាក់។ សិក្ខាសាលានេះ រៀបចំឡើងក្រោមកិច្ចសហការរវាងអគ្គនាយកដ្ឋានប្រព័ន្ធចម្រោះទឹកកខ្វក់ ក្រសួងសាធារណការ និងដឹកជញ្ជូន និងកម្មវិធីអង្គការសហប្រជាជាតិសម្រាប់លំនៅឋានមនុស្សជាតិ (UN-Habitat) ក្នុងគោលបំណងលើកកម្ពស់ការយល់ដឹងអំពីតម្រូវការគុណប្រយោជន៍ ភាពចាំបាច់នៃប្រព័ន្ធ ចម្រោះទឹកកខ្វក់ និងជួយពលរដ្ឋឱ្យចូលរួមថែរក្សាបណ្តាញលូ និងទឹកកខ្វក់ ដើម្បីងាយស្រួលក្នុងការ គ្រប់គ្រងប្រព័ន្ធចម្រោះទឹកកខ្វក់ប្រកបដោយនិរន្តភាព និងជួយជំរុញឱ្យមានការផ្សព្វផ្សាយបន្តអំពីសារៈសំខាន់នៃអត្ថន័យដែលបានចងក្រងក្នុងសៀវភៅទៅកាន់បងប្អូនប្រជាពលរដ្ឋទទួលបានព័ត៌មាន ទូលំទូលាយ ក៏ដូចបានយល់ដឹងកាន់តែច្បាស់ផងដែរ។ ឯកឧត្តមអគ្គនាយក បានលើកឡើងថា ដោយសារកម្ពុជាបច្ចុប្បន្នមានសុខសន្តិភាព ទើបធ្វើឱ្យយើងមាន ការរីកចម្រើនផ្នែកសេដ្ឋកិច្ចក្នុងរយៈពេលពីរទសវត្សរ៍ចុងក្រោយនេះ។ ទន្ទឹមនឹងសន្ទុះនៃការអភិវឌ្ឍនៅក្នុង ក្រុងព្រះសីហនុ បញ្ហាទឹកកខ្វក់ដែលបង្កពីសកម្មភាពផ្សេងៗ បានហូរចូលទៅក្នុងតំបន់លំនៅដ្ឋានរបស់ បងប្អូនប្រជាពលរដ្ឋ និងសហគមន៍ បង្កផលប៉ះពាល់ដល់សុខុមាលភាពប្រជាជន សោភ័ណភាព ជីវៈចម្រុះ ប្រព័ន្ធអេកូឡូស៊ី និងជះឥទ្ធិពលដល់សេដ្ឋកិច្ចជាតិ ហើយត្រូវបានរាជរដ្ឋាភិបាលកម្ពុជាកំពុង យកចិត្តទុកដាក់ជាចម្បង។ ហេតុដូចនេះហេដ្ឋារចនាសម្ព័ន្ធសាធារណៈជាច្រើន ពិសេសបណ្តាញលូទឹកភ្លៀង បណ្តាញលូទឹកកខ្វក់ ស្ថានីយប្រព្រឹត្តកម្មទឹកកខ្វក់ ទីលានចាក់សំណល់ភក់ ត្រូវបានសាង់សង់ និងកំពុងសាងសង់នៅតាមបណ្តារាជធានី-ខេត្តសំខាន់ៗ រួមទាំងក្រុងព្រះសីហនុ ខេត្តព្រះសីហនុផង ដែរ។ ឯកឧត្តមអគ្គនាយក ក៏អំពាវនាវសុំឱ្យបងប្អូនប្រជាពលរដ្ឋ និងគ្រប់ភាគីពាក់ព័ន្ធទាំងអស់ចូលរួមថែរក្សា សមិទ្ធផលសម្រេចបាន ដើម្បីប្រែក្លាយក្រុងព្រះសីហនុទៅជាទីក្រុងដ៏ស្រស់ស្អាត មានសោភ័ណភាព អនាម័យស្អាត បរិស្ថានល្អ និងគួរឱ្យចង់រស់នៅ ក៏ដូចជាទាក់ទាញភ្ញៀវទេសចរណ៍ជាតិ និងអន្តរជាតិ តាមរយៈការលើកកម្ពស់អនាម័យស្អាត និងសុខភាពសាធារណៈ ធ្វើឱ្យសុខុមាលភាពរបស់ប្រជាពលរដ្ឋ កាន់តែប្រសើរឡើង។ ជាទីបញ្ចប់ ឯកឧត្តមអគ្គនាយក បានថ្លែងអំណរគុណយ៉ាងជ្រាលជ្រៅចំពោះវត្តមានរបស់លោក លោក ស្រីដែលជាសិក្ខាកាម និងគ្រប់សមត្ថកិច្ចពាក់ព័ន្ធទាំងអស់ដែលបានអញ្ជើញចូលរួម សិក្ខាសាលាអប់រំផ្សព្វផ្សាយនេះ ដែលជាមធ្យោបាយមួយដ៏ល្អ ក្នុងការជំរុញឱ្យមានការចូលរួមខ្ពស់ពីសំណាក់ប្រជា ពលរដ្ឋទូទៅក្នុងការប្រើប្រាស់ និងថែរក្សាការពារហេដ្ឋារចនាសម្ព័ន្ធ ដែលបានសាងសង់រួច ប្រកបដោយ ប្រសិទ្ធភាព និងនិរន្តរភាព៕