លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គ​លេ​ខា​ធិការនៃគណៈកម្មាធិការជាតិសុវត្ថិភាពចរាចរណ៍ផ្លូវគោកបានគូសបញ្ជាក់ថា រាជរដ្ឋាភិ​បាលតាមរយៈគណៈកម្មាធិការជាតិសុវត្ថិភាពចរាចរណ៍ផ្លូវគោកបានព្រាងនូវផែនការ​ជាតិ ទសវត្សរ៍​សុវត្ថិភាពចរាចរណ៍ផ្លូវគោករយៈពេល១០បន្ដទៀតពីឆ្នាំ២០២១-២០៣០​ ដើម្បី​កាត់​​បន្ថយអ្នកស្លាប់ដោយគ្រោះថ្នាក់ចរាចរណ៍ឱ្យបាន៥០ភាគរយបន្ថែមទៀត។ ការគូស​បញ្ជាក់នេះក្នុងសិក្ខាសាលាស្ដីពីការប្រមូលធាតុចូលសម្រាប់ផែនការទស្សវត្សរ៍ជាតិសុវត្ថិភាពចរាចរណ៍ផ្លូវគោកឆ្នាំ២០២១-២០៣០ នាព្រឹកថ្ងៃទី២២ ខែមិថុនា ឆ្នាំ២០២២ នៅទីស្ដី​ការក្រសួងសាធារណការ និងដឹកជញ្ជូន។ លោកជំទាវ មឹន មាណវី បានថ្លែងថា ក្នុងរយៈពេល១០ឆ្នាំនៃទសវត្សរ៍ឆ្នាំ២០១១-២០២០ បានបង្ហាញឱ្យឃើញថា គ្រោះថ្នាក់ចរាចរណ៍បានកើតឡើងយ៉ាងច្រើន​គួរឱ្យកត់​សម្គាល់​ពីមួយឆ្នាំៗទៅមួយឆ្នាំស្របពេលដលកម្ពុជាមានសុខសន្តិភាពយ៉ាងពេញលេញ​ជា​មួយនឹងស្ថានភាពនយោបាយមានស្ថិរភាពធ្វើឱ្យមានការគាំទ្រកក់កៅ្តពីគ្រប់មជ្ឈដ្ឋានជាតិ អន្តរជាតិ និងអ្នកវិនិយោគជាមួយនឹងការសាងសង់កែលម្អបណ្ដាញផ្លូវ ស្ពានយ៉ាងសកម្ម តភ្ជាប់ទៅគ្រប់ទីកន្លែងក្នុងប្រទេស និងភ្ជាប់ជាមួយប្រទេសជិតខាង។ លោកជំទាវបាន​បញ្ជាក់ថា គ្រោះថ្នាក់ចរាចរណ៍ដែលមានសភាពធ្ងន់ធ្ងរ បណ្ដាលឱ្យបាត់បង់ជីវិតមនុស្ស របួស​ពិការយ៉ាងអាណោចអាធម រួមជាមួយនឹងការខូចខាតទ្រព្យសម្បត្តិរដ្ឋ និងឯកជន យ៉ាងច្រើន បន្សល់ទុកនូវកូនកំព្រា ស្ត្រីមេម៉ាយ ពិការភាព សោកនាដកម្ម និងផលវិបាក​ជាច្រើនលើសង្គមកម្ពុជានិងសង្គមជាតិនានាទូទាំងពិភពលោក។ លោកជំទាវបានបន្ដថា ដោយសារករណីគ្រោះថ្នាក់ចរាចរណ៍មានសភាពធ្ងន់ធ្ងរនោះ ទើបអង្គការសហប្រជាជាតិ​បានផ្តល់អនុសាសន៍ឱ្យគ្រប់ប្រទេសជាសមាជិកដាក់ ចេញនូវផែនការទសវត្សរ៍សុវត្ថិ​ភាព​ចរាចរណ៍លើកទី១ រយៈពេល១០ឆ្នាំ ពីឆ្នាំ២០១១-២០២០ ដោយតម្រូវឱ្យខិតខំកាត់បន្ថយ​យ៉ាង​ណាឱ្យបាន៥០ភាគរយ នៃចំនួនប៉ាន់ស្មាន ដែលក្នុងប្រទេសកម្ពុជាគឺមានប្រមាណ ៧ ៧៥០ នាក់ ក្នុងចំនួនប៉ាន់ស្មានរួម ១៤ ៧០០ នាក់។ ប៉ុន្តែកម្ពុជាកាត់បន្ថយបានតែជាង ៤ ៧១០ នាក់ ស្មើនឹង៦៤ភាគរយ នៃ៥០ភាគរយ តែបើធៀបនឹងចំនួនសរុបរួម គឺបានតែ​៣១ភាគរយ តែប៉ុណ្ណោះ។ លោកជំទាវបានលើកឡើងថា គណៈកម្មាធិការសុវត្ថិភាពចរាចរណ៍ផ្លូវគោកបាន​ព្រាងនូវផែនការទស្សវត្សរ៍សុវត្ថិភាពចរាចរណ៍ផ្លូវគោកបន្ទាប់គឺ២០២១-២០៣០ ដើម្បីកាត់​បន្ថយ​អ្នកស្លាប់ក្នុងគម្រោងឱ្យបាន៥០ភាគរយទៀត តាមវិធានការនានាដែលមានការ ឯក​ភាពក្នុងកិច្ចប្រជុំសកលនៃរដ្ឋមន្ត្រីទទួលបន្ទុកសុវត្ថិភាពចរាចរណ៍លើកទី៣ នៅប្រទេស​ស៊ុយអែត កាលពីចុងឆ្នាំ២០២០ និងការប្រកាសរបស់អង្គការសហប្រជាតិតំបន់អាស៊ីប៉ា ស៊ីហ្វិក កាលពីថ្ងៃទី២៨ ខែតុលា ឆ្នាំ២០២១កន្លងទៅនេះ។ ជាមួយគ្នានេះ លោកជំទាវរដ្ឋលេខាធិការបាន​ស្នើឱ្យក្រសួង ស្ថាប័នពាក់ព័ន្ធ និង​តំណាងស្ថាប័នជាតិ អន្ដរជាតិ ក្រុមហ៊ុន អង្គការជាតិ អន្ដរជាតិ និងសិក្ខាកាមដែល​មាន​វត្ដមាន​ក្នុងសិក្ខាសាលានេះ ផ្ដល់នូវធាតុចូលដ៏មានសារៈសំខាន់ល្អៗ ដែលអាចជួយជំរុញ​ឱ្យការកសាងផែនការទសវត្សរ៍ជាតិសុវត្ថិភាពចរាចរណ៍ផ្លូវគោកនេះ ទទួលបានជោគជ័យ ស្របតាមការដាក់ចេញនូវទិសដៅផែនការទសវត្សរ៍សុវត្ថិភាពចរាចរណ៍ផ្លូវគោករបស់ពិភពលោកទាំងមូលផងដែរ។ សូមជម្រាបជូនថា សិក្ខាសាលានេះ រៀបចំឡើងក្នុងគោលបំណងដើម្បីបង្ហាញពី​ផែនការសកម្មភាពបន្ត ដោយផ្អែកលើលទ្ធផលផែនការសកម្មភាព និងការងារសម្រេច​បាន​​នៃផែន​ការ​ទសវត្សរ៍​​ជាតិសុវត្ថិភាពចរាចរណ៍ផ្លូវគោករយៈពេល១០ឆ្នាំមុន (២០១១-២០២០) និងដាក់ជូនឆ្លងកិច្ចពិភាក្សា និងប្រមូលធាតុ ចូលពីស្ថាប័នជាតិ អន្តរជាតិ និងដៃគូ​ពាក់ព័ន្ធលើសេចក្ដីពង្រឹងផែនការទសវត្សរ៍ជាតិសុវត្ថិភាពចរាចរណ៍ផ្លូវគោកថ្មីរយៈពេល ១០​ឆ្នាំបន្ត (២០២១-២០៣០) ដើម្បីបង្កើនប្រសិទ្ធភាព និងភាពគ្រប់ជ្រុងជ្រោយ និងកាត់​បន្ថយទុក្ខសោក និងភាពក្រីក្ររបស់ប្រជាពលរដ្ឋឱ្យស្របតាមកម្មវិធីនយោបាយរបស់រាជ​រដ្ឋាភិ​បាល​កម្ពុជា និងគោលដៅអភិវឌ្ឍន៍ប្រកបដោយសិ្ថរភាពរបស់អង្គការសហប្រជាតិ​ផងដែរ៕