នាថ្ងៃទី១៣ ខែមិថុនា ឆ្នាំ២០២២ នៅទីស្តីការក្រសួង ឯកឧត្តម ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូន បានអញ្ជើញជាអធិបតីក្នុងកម្មវិធីបើកវគ្គបណ្តុះបណ្តាលបច្ចេកទេសយានយន្តរបស់វិទ្យាស្ថានតេជោសែន សាធារណការ និងដឹកជញ្ជូន ដោយមានការចូលរួមពីតំណាងក្រុមហ៊ុន អ អិម អេ ខេមបូឌា ភីអិលស៊ី តំណាងមូលនិធិអភិវឌ្ឍន៍ជំនាញក្រោមក្រសួងសេដ្ឋកិច្ច និងហិរញ្ញវត្ថុ ព្រមទាំងថ្នាក់ដឹកនាំ និងមន្ត្រីរាជការ នៃវិទ្យាស្ថានតេជោសែន សាធារណការ និងដឹកជញ្ជូន។ វគ្គបណ្តុះបណ្តាលបច្ចេកទេសយានយន្តនេះ រៀបចំឡើងក្នុងគោលបំណងបំពេញកង្វះខាតធនធានមនុស្សលើបច្ចេកទេសជួសជុលយានយន្ត ក៏ដូចជាកង្វះខាតធនធានមនុស្សតាមយានដ្ឋានឱ្យមានចំណេះដឹងច្បាស់លាស់ និងអាចមានសមត្ថភាពដំឡើងរថយន្តបម្រើការនៅតាមយានដ្ឋាន ឬគ្រប់គ្រងយានដ្ឋានដោយផ្ទាល់បាន។ ជាមួយគ្នានោះដែរ ឯកឧត្តម ហឿន សំនៀង បានលើកឡើងអំពីផលលំបាកក្នុងការជ្រើសរើសសិក្ខាកាម ក្នុងការផ្តល់ព័ត៌មានដល់សិក្ខាកាមគ្រប់ខេត្ត-ក្រុង។ ឯកឧត្តមនាយក បានបន្ថែមទៀតថាវគ្គបណ្តុះបណ្តាលបច្ចេកទេសយានយន្តនេះ គឺជាវគ្គបណ្តុះបណ្តាលជំនាញមួយក្នុងចំណោមវគ្គបណ្តុះបណ្តាលជំនាញ ចំនួន០៤ផ្សេងទៀត ជាមួយក្រុមហ៊ុន អ អិម អេ ខេមបូឌា ភីអិលស៊ី សំដៅលើកកម្ពស់ធនធានមនុស្ស ក្នុងវិស័យបច្ចេកទេសយានយន្ត ដើម្បីចូលរួមចំណែកក្នុងការលើកស្ទួយដល់សេដ្ឋកិច្ចប្រទេសជាតិ។ ឯកឧត្តម បានអំពាវនាវសុំឱ្យសិក្ខាកាមទាំងអស់ ចូលរួមចែករំលែកព័ត៌មានអំពីវគ្គបណ្តុះបណ្តាល ដែល នឹងបង្កើតឡើងនាពេលខាងមុខនេះឱ្យទូលំទូលាយតាមស្រុក ភូមិ និងខេត្តរៀងៗខ្លួន ដើម្បីឱ្យបងប្អូន ទាំងអស់ទទួលបានព័ត៌មានអំពីវគ្គបណ្តុះបណ្តាលនានារបស់វិទ្យាស្ថាន។ ជាចុងក្រោយ ឯកឧត្តមនាយកវិទ្យាស្ថាន បានជំរុញលើកទឹកចិត្តឱ្យសិក្ខាកាមទាំងអស់ខិតខំប្រឹងប្រែង សិក្សាក្នុងវគ្គបណ្តុះបណ្តាលនេះ ដើម្បីជាទំពាំងស្នងប្ញស្សីសម្រាប់សង្គមជាតិ និងទទួលបានចំណេះពិត ប្រាកដមួយ ដើម្បីអនាគតរបស់ខ្លួនឯង។ សូមជម្រាបជូនថា៖ វិទ្យាស្ថានតេជោសែន សាធារណការ និងដឹកជញ្ជូន បានប្រកាសជ្រើសរើសសិក្ខាកាម ចំនួន១២៥នាក់ ដោយផ្តល់អាទិភាពដល់បេក្ខនារីចំនួន២០នាក់ ឱ្យចូលរៀនវគ្គបណ្តុះបណ្តាលបច្ចេក ទេសយានយន្ត រយៈពេល០៤ខែ នៅវិទ្យាស្ថានតេជោសែន សាធារណការ និងដឹកជញ្ជូន។ ក្រោយបញ្ចប់ វគ្គសិក្សា និងការបណ្តុះបណ្តាលនេះ សិក្ខាកាមនឹងទទួលបានចំណេះជំនាញពិតប្រាកដលើជំនាញបច្ចេក ទេសយានយន្ត រួមមានជាមួយនឹងប្រាក់ឧបត្ថម្ភប្រចាំខែ (៦០ដុល្លារ/ខែ)រយៈពេល០៤ខែ ចំណេះដឹង និងជំនាញបច្ចេកទេសយានយន្តពិតប្រាកដ ឱកាសចុះហាត់ការនៅក្រុមហ៊ុន RMA Group ដោយទទួលបានប្រាក់ឧបត្ថម្ភចំនួន១០០ដុល្លារ/ខែរយៈពេល ០៣ខែ ហើយក្រោយពេលបញ្ចប់ការសិក្សា ហ្វឹកហាត់ និងការបណ្តុះបណ្តាល សិក្ខាកាមនឹងទទួលបានឱកាសការងារជាច្រើននៅក្រុមហ៊ុន RMA Group ផងដែរ៕