បច្ចុប្បន្នរាជរដ្ឋាភិបាលបានដាក់ចេញនូវគម្រោងអភិវឌ្ឍន៍ជាច្រើនរួមានផ្លូវថ្នល់ ផ្លូវដែក ផ្លូវល្បឿនលឿន ស្ពាន អាកាសយាន្ដដ្ឋាន និងហេដ្ឋារចនាសម្ព័ន្ធផ្សេងទៀត ដើម្បីសម្រួលដល់ការធ្វើដំណើរ និងរស់នៅរបស់ប្រជាពលរដ្ឋ ព្រមទាំងទាក់ទាញអ្នកវិនិយោគមកកាន់ប្រទេសកម្ពុជាផងដែរ។ ជាក់ស្ដែងថ្មីៗនេះ ឃើញថាមានគម្រោងធំៗចំនួន ៤ ត្រូវបានរាជរដ្ឋាភិបាលដាក់សំណើរទៅកាន់មិត្ដចិន ដើម្បីសុំជំនួយ​សម្រាប់ស្ថាបនា។ យោងតាមប្រសាសន៍របស់​ឯកឧត្ដម ស៊ុន ចាន់ថុល ទេសរដ្ឋមន្រ្ដី រដ្ឋមន្រ្ដីក្រសួងសាធារណការ និងដឹកជញ្ជូន បទសម្ភាសន៍ជាមួយវិទ្យុមិត្តភាពកម្ពុជា-ចិន ស្តីពីការដាក់ឱ្យ ដំណើរការសាកល្បងផ្លូវល្បឿនលឿនភ្នំពេញ-ព្រះសីហនុ កាលពីថ្ងៃទី១០ ខែមិថុនា ឆ្នាំ២០២២ បានឲ្យដឹងថា គម្រោងប្រាំឆ្នាំរំកិលដែលបានដាក់ ស្នើទៅមិត្តចិន ក្នុងនោះរួមមាន៖ ១. គម្រោងសាងសង់ផ្លូវបាត់ដំបង-សៀមរាប ២. គម្រោងសាងសង់ផ្លូវកំពង់ធំ-កំពង់ឆ្នាំង ៣. គម្រោងសាងសង់ផ្លូវល្បឿនលឿនពីភ្នំពេញ-បាវិត ម៉ុកបៃ (ព្រំដែនវៀតណាម) ៤. គម្រោងសិក្សា ធ្វើទំនើបកម្មផ្លូវដែកកម្ពុជា និងប្រព័ន្ធដឹកជញ្ជូនសាធារណៈ ដូចជា រថភ្លើងក្រោមដី ប្រព័ន្ធរថភ្លើងអាកាស(Monorail) និងប្រព័ន្ធរថភ្លើងគ្មានអ្នកបើក(AGT) ជាដើម ដើម្បីបញ្ចៀសការកកស្ទះ ចរាចរណ៍ដែលជាបញ្ហាកង្វល់ដ៏ធំក្នុងរាជធានីភ្នំពេញ។ ទាក់ទងនឹងជំនួយរបស់ចិនលើវិស័យហេដ្ឋារចនាសម្ព័ន្ធ ឯកឧត្តមទេសរដ្ឋមន្ត្រី បានសំដែងនូវការ ស្វាគមន៍ចំពោះជំនួយជាប្រាក់កម្ចីសម្បទាន ការប្រាក់ទាបរបស់មិត្តចិន ដែលអនុញ្ញាតឱ្យកម្ពុជាអាចកសាងហេដ្ឋារចនាសម្ព័ន្ធរបស់ខ្លួនខ្វាត់ខ្វែងគ្រប់ទីកន្លែងទាំងអស់ ដើម្បីជីវភាពរស់នៅរបស់បងប្អូនប្រជាពលរដ្ឋធូរធារ និងល្អជាងមុន សេដ្ឋកិច្ចជាតិមានការរីកចម្រើន អនុញ្ញាតឱ្យកម្ពុជាក្លាយជាប្រទេសមានចំណូលមធ្យមកម្រិតទាបនៅឆ្នាំ២០៣០ និងចំណូលមធ្យមកម្រិតខ្ពស់នៅឆ្នាំ២០៥០ និងបានបង្ហាញ ជំនឿយ៉ាងមុតមាំថា៖ មិត្តចិននឹងនៅបន្តផ្ដល់ជំនួយឥតសំណង ក៏ដូចជាប្រាក់កម្ចីការប្រាក់ទាប ដើម្បី អនុវត្តគម្រោងកសាងផ្លូវ ស្ពាន និងប្រព័ន្ធហេដ្ឋារចនាសម្ព័ន្ធផ្សេងទៀត៕