ក្រសួងសាធារណការ និងដឹកជញ្ជូន និងធនាគារពិភពលោក បានពិភាក្សាអំពីគម្រោងអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ និងរោងចក្រប្រព្រឹត្តកម្មទឹកសំណល់នៅកម្ពុជា។ កិច្ចពិភាក្សានេះធ្វើឡើងរវាងរដ្ឋមន្ត្រីស្តីទី លោក ទូច ចាន់កុសល និងលោក Benedict L.J Eijbergen នាយកប្រតិបត្តិធនាគារពិភពលោកផ្នែកដឹកជញ្ជូន។ កិច្ចប្រជុំបានពិភាក្សាលើការដំឡើងឧបករណ៍ស្ថានីយ៍សាកឡានអគ្គិសនី (EV) ដើម្បីលើកកម្ពស់ការប្រើប្រាស់រថយន្ត EV អោយបានច្រើននៅកម្ពុជា និងគម្រោងអភិវឌ្ឍន៍ប្រព័ន្ធរថយន្តក្រុងក្នុងក្រុងសៀមរាប។ ភាគីទាំងពីរក៏បានពិភាក្សាអំពីការគ្រប់គ្រងប្រព័ន្ធប្រព្រឹត្តកម្មទឹកសំណល់នៅតាមទីក្រុង និងខេត្តសំខាន់ៗ ជាពិសេសរាជធានីភ្នំពេញ និងខេត្តព្រះសីហនុ និងគម្រោងអភិវឌ្ឍន៍មជ្ឈមណ្ឌលភស្តុភាររាជធានីភ្នំពេញ។ លើសពីនេះ ភាគីទាំងពីរក៏បានចែករំលែកទស្សនៈលើការអនុវត្តគម្រោងសាងសង់ និងពង្រីកផ្លូវជាតិលេខ៤ ក្រោមកម្ចីសម្បទានពីធនាគារពិភពលោក ក្នុងគោលបំណងកាត់បន្ថយការកកស្ទះចរាចរណ៍ និងបង្កើនសុវត្ថិភាពចរាចរណ៍។ ធនាគារពិភពលោកបានផ្តល់ការគាំទ្រ និងកិច្ចសហប្រតិបត្តិការដល់រាជរដ្ឋាភិបាលកម្ពុជា ជាពិសេស ក្រសួងសាធារណការ និងដឹកជញ្ជូន សម្រាប់ការអភិវឌ្ឍហេដ្ឋារចនាសម្ព័ន្ធដឹកជញ្ជូន ហេដ្ឋារចនាសម្ព័ន្ធប្រព័ន្ធទឹកស្អាត និងប្រព័ន្ធប្រព្រឹត្តកម្មទឹកសំណល់នៅកម្ពុជា ដើម្បីធ្វើអោយសុខុមាលភាពរបស់ប្រជាពលរដ្ឋកាន់តែប្រសើរឡើង។ កែវ សុផល – AKP