កណ្តាល៖ បន្ទាប់ពីមានបណ្ដាញសារព័ត៌មានបានចុះផ្សាយយ៉ាងព្រោងព្រាតជុំវិញផ្លូវលេខ១០៨ ផ្លូវចូលពន្ធដារខេត្តកណ្ដាល ស្ថិតនៅភូមិតាខ្មៅ១ សង្កាត់តាខ្មៅ ក្រុងតាខ្មៅ ខេត្តកណ្តាល រងការខូចខាតស្ទើរខ្ទេចខ្ទីទាំងស្រុង ស្រាប់តែនៅថ្ងៃទី១៩ ខែឧសភា ឆ្នាំ២០២២នេះ គេសង្កេតឃើញមានគ្រឿងចក្របីបួនគ្រឿងមកធ្វើការឈូសឆាយជួសជុលពង្រាបឲ្យស្មើដើម្បីឲ្យបងប្អូនប្រជាពលរដ្ឋ សិស្សានុសិស្ស អ្នកធ្វើដំណើរងាយស្រួលធ្វើដំណើរមួយអន្លើ ដែលគេសង្ស័យថាឯកឧត្ដមអភិបាលខេត្តកណ្តាលបញ្ជាឲ្យលោក ម៉ឹង យូរឡេង ប្រធានមន្ទីរសាធារណការនិងដឹកជញ្ជូនដាក់គ្រឿងចាក់ជួសជុល ឈួសឆាយពង្រាបឲ្យស្មើរហើយ។ ទោះបីជាយ៉ាងណាក៏ដោយ សកម្មភាពនេះគឺពិតជាបានបង្ហាញពីការយកចិត្តទុកដាក់ខ្ពស់របស់ថ្នាក់ដឹកនាំខេត្ត ជាពិសេសក្រោមការដឹកនាំឯកឧត្តម គង់ សោភ័ណ្ឌ អភិបាលនៃគណៈអភិបាលខេត្តកណ្តាលតែម្ដង។ ជាក់ស្តែងនៅរសៀលថ្ងៃនេះ គេបានសង្កេតឃើញវត្តមានរបស់ឯកឧត្តម គង់ សោភ័ណ្ឌ អភិបាលខេត្តកណ្តាលដោយមានការអមដំណើរដោយលោក ម៉ឹង យូរឡេង ប្រធានមន្ទីរសាធារណការ និងដឹកជញ្ជូនខេត្ត បានមកចុះពិនិត្យការដ្ឋានជួសជុលផ្លូវលេខ ១០៨ ក្នុងសង្កាត់តាខ្មៅ ក្រុងតាខ្មៅ។ ក្នុងដំណើរចុះពិនិត្យផ្លូវ១០៨នោះដែរ ឯកឧត្តម គង់ សោភ័ណ្ឌ ក៏បានលើកទឹកចិត្តដល់បងប្អូនក្រុមការងារ ដែលខិតខំបំពេញការងារជួសជុលផ្លូវលេខ១០៨នេះ និងបានធ្វើការឧបត្ថម្ភគ្រឿងឧបភោគ បរិភោគ និងថវិកាមួយចំនួនផងដែរ៕