ពិធីចុះហត្ថលេខាលើអនុស្សរណៈនៃការយោគយល់ស្តីពីកិច្ចសហការលើការងារសុវត្ថិភាពចរាចរណ៍ផ្លូវគោក រវាង គណៈកម្មាធិការជាតិសុវត្ថិភាពចរាចរណ៍ផ្លូវគោក (NRSC) និងសភាពាណិជ្ជកម្មអន្តរជាតិនៃកម្ពុជា (International Business Chamber of Cambodia-IBC) ……………………………………………. នៅព្រឹក ថ្ងៃអង្គារ ២រោច ខែពិសាខ ឆ្នាំខាល ចត្វាស័ក ព.ស. ២៥៦៦ ត្រូវនឹងថ្ងៃទី១៧ ខែឧសភា ឆ្នាំ២០២២ នៅទីស្តីការក្រសួងសាធារណការ និងដឹកជញ្ជូន លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក និងជាប្រធានផ្នែកអប់រំផ្សព្វផ្សាយ និងបណ្តុះបណ្តាលនៃអគ្គលេខាធិការដ្ឋាន គ.ស.ច.គ. បានអមគណៈអធិបតី លោកជំទាវ មឹន មាណវី រដ្ឋលេខាធិការនៃក្រសួងសាធារណការ និងដឹកជញ្ជូន និងជា​អគ្គលេខាធិការនៃគណៈកម្មាធិការជាតិសុវត្ថិភាពចរាចរណ៍ផ្លូវគោក ក្នុងពិធីចុះហត្ថលេខាលើអនុស្សរណៈនៃការយោគយល់ ស្តីពីកិច្ចសហការលើការងារសុវត្ថិភាពចរាចរណ៍ផ្លូវគោក រវាង គណៈកម្មាធិការជាតិសុវត្ថិភាពចរាចរណ៍ផ្លូវគោក (NRSC) និងសភាពាណិជ្ជកម្មអន្តរជាតិនៃកម្ពុជា (International Business Chamber of Cambodia-IBC) និងមានការចូលរួមដោយ ឯកឧត្តម លោកជំទាវ លោក លោកស្រី ជាសមាជិក សមាជិកា នៃអគ្គលេខាធិដ្ឋាន គ.ស.ច.គ និងសមាជិកមកពីសភាពាណិជ្ជកម្មអន្តរជាតិនៃកម្ពុជា លោក Paul Dodd ជាសមាជិក​ក្រុមប្រឹក្សាភិបាលនៃសភាពាណិជ្ជកម្ម​អន្តរជាតិនៃកម្ពុជា ប្រធានក្រុមការងារ​សុវត្ថិភាពចរាចរណ៍នៃសភាពាណិជ្ជកម្ម​អន្តរជាតិ​នៃកម្ពុជា និងជា​នាយកគ្រប់គ្រង​ប្រចាំ​ប្រទេស​នៃ Infinity Financial Solutions និងតំណាងក្រុមហ៊ុនជាសមាជិករបស់​ IBC ផងដែរ។ លោក Paul Dodd បានលើកឡើងពីសាវតានៃការបង្កើតក្រុមការងារសុវត្ថិភាពចរាចរណ៍របស់​សភាពាណិជ្ជកម្មអន្តរជាតិនៃកម្ពុជាថា ការបង្កើតក្រុមការងារនេះគឺតាម​អនុសាសន៍ដ៏ខ្ពង់ខ្ពស់របស់ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និង​ដឹកជញ្ជូន។ ដូច្នេះហើយ ទើបសភាពាណិជ្ជកម្មអន្តរជាតិនៃកម្ពុជា​ បង្កើតក្រុមការងារនេះ ដោយមាន​សមាសភាពមកពី​ក្រុមហ៊ុនអាកាសចរណ៍កម្ពុជា ក្រុមហ៊ុន Pernod Ricard ក្រុមហ៊ុន Total Energy ក្រុមហ៊ុន​ Mitsubishi និងក្រុមហ៊ុនធានារ៉ាប់រង Prudential Cambodia និងបណ្តាក្រុមហ៊ុនឯកជនដទៃទៀត។ ក្នុងនោះដែរ ក្រុមការងារ​បាន​បង្កើត​យុទ្ធនាការសង្គមស្តីពី “អំណាចនៃពាក្យថាទេ”​ ជាផ្នែកមួយនៃយុទ្ធនាការពិសាគ្រឿងស្រវឹង កុំបើកបរ ដើម្បី​ផ្សព្វផ្សាយដល់សមាជិក និងក្រុមគ្រួសាររបស់​សមាជិកពីយុទ្ធនាការនេះ។ លើសពីនេះ លោកបាន​លើកឡើងថា ចរាចរណ៍មានការផ្លាស់ប្តូរលឿនខ្លាំងណាស់ ហេតុដូច្នេះហើយ គ្រោះថ្នាក់ចរាចរណ៍ក៏អាចនឹងកើតមាន​ដោយជៀសមិនផុត។​ ដូច្នេះហើយ ក្រុមការងារសុវត្ថិភាពចរាចរណ៍គ្រោងនឹងរៀបចំសិក្ខាសាលា ស្តីពីសុវត្ថិភាពចរាចរណ៍ផ្លូវគោកនៅត្រីមាសទី៣ នៃឆ្នាំ​២០២២នេះ ដែលជាផ្នែកមួយចូលរួមចំណែក​ក្នុងការផ្លាស់ប្តូរឥរិយាបថសង្គម ស្តីពីសុវត្ថិភាពចរាចរណ៍ផ្លូវគោក។​ លោក​បាន​ប្តេជ្ញាចិត្ត​ក្នុងការចួលរួមចំណែកជាមួយរាជរដ្ឋាភិបាលកម្ពុជាក្នុងការផ្លាស់ប្តូរឥរិយាបថ​របស់អ្នក​ប្រើ​ប្រាស់ផ្លូវ​តាម​រយៈការរៀបចំយុទ្ធនាការអប់រំសុវត្ថិភាពនានា។​ លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជា​អគ្គលេខាធិការនៃគណៈកម្មាធិការជាតិសុវត្ថិភាពចរាចរណ៍ផ្លូវគោក បានធ្វើការថ្លែងអំណរគុណដល់​ IBC ដែលមានក្រុមហ៊ុនឯកជនជាសមាជិក បានចូលរួមជាមួយរាជរដ្ឋាភិបាលក្នុងការទប់ស្កាត់ កាត់បន្ថយគ្រោះថ្នាក់ចរាចរណ៍ផ្លូវគោកតាមគ្រប់រូបភាព។ លោកជំទាវបានបន្ថែមថា ស្ថានភាពជំងឺកូវីដ-១៩នៅកម្ពុជារយៈពេល ១០ថ្ងៃមកនេះ គឺមិនមានចំនួនឆ្លង បានបាត់បង់ជីវិតឡើយ ដោយឡែក ក្រឡេកមកមើលស្ថានភាពគ្រោះថ្នាក់ចរាចរណ៍វិញ មានអ្នកស្លាប់យ៉ាងហោចណាស់ ៥នាក់ក្នុងមួយថ្ងៃ និងរបួសធ្ងន់ស្រាលជាច្រើននាក់ទៀត។ លោកជំទាវបានអំពាវនាវដល់អ្នកប្រើប្រាស់ផ្លូវគ្រប់រូប គួរណាស់តែផ្លាស់ប្តូរឥរិយាបថ និងត្រូវមានស្មារតីប្រុងប្រយ័ត្ន និងគោរពច្បាប់ចរាចរណ៍គ្រប់ពេលវេលា។