កំពត៖ អ្នកជំនាញក្នុងវិស័យដឹកជញ្ជូន និងអ្នកនាំចេញនៅកម្ពុជា បានលើកឡើងថា គម្រោងវិនិយោគអភិវឌ្ឍន៍មជ្ឈមណ្ឌលភស្តុភារកម្ម និងកំពង់ផែពហុបំណងថ្មីនៅខេត្តកំពត នឹងចូលរួមជំរុញវិស័យដឹកជញ្ជូនកាន់តែមានប្រសិទ្ធិភាព និងជាដែកឆក់យកសេដ្ឋកិច្ចដ៏សំខាន់ សម្រាប់ប្រទេសកម្ពុជាក្នុងការនាំចេញ។ លោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជា នៅព្រឹកថ្ងៃទី ៦ឧសភា ឆ្នាំ២០២២នេះ មានប្រសាសន៍ប្រាប់ទូរទស្សន៍ព័ត៌មាន ប៊ីធីវីថា ការអភិវឌ្ឍគម្រោងហេដ្ឋារចនាសម្ព័ន្ធកំពង់ផែ​ទឹកជ្រៅខេត្តកំពត​ អាចនឹងទាញយកផលចំណេញបានកម្រិតពី ​៣០ទៅ៣៥ភាគរយ ដែលនឹង​ជំរុញ​សេដ្ឋកិច្ចជាតិមានដំណើរការល្អ ​លើការតភ្ជាប់ក្នុងការដឹកជញ្ជូនពីកម្ពុជាទៅអន្តរជាតិ និងពិភពលោក។ លោក លុន យ៉េង អគ្គលេខាធិការ នៃសហព័ន្ធស្រូវអង្ករកម្ពុជា បានឲ្យ ប៊ីធីវី ដឹងដែរថា គម្រោងនេះ នឹងធ្វើឲ្យមានសកម្មភាពសេដ្ឋកិច្ចកាន់តែល្អ ​ជាពិសេសវិស័យកសិកម្មដែលជាផ្នែកមួយសំខាន់ដែល​យើងកំពុង​មានបញ្ហាប្រឈមខ្លាំងលើការដឹកជញ្ជូន និងការរៀបចំហេដ្ឋារចនាសម្ព័ន្ធ​សម្រាប់​នាំចេញ។ នៅក្នុងពិធីប្រកាសបើកការដ្ឋានសាងសង់មជ្ឈមណ្ឌលភស្តុភារកម្ម និងកំពង់ផែពហុបំណងនៅ​ខេត្តកំពត ​កាលពីថ្ងៃទី៥ ខែឧសភាកន្លងទៅនេះ ឯកឧត្ដម ស៊ុន ចាន់ថុល ​ទេសរដ្ឋមន្រ្តី រដ្ឋមន្ដ្រី​ក្រសួងសាធារណការ និងដឹកជញ្ជូន​ បានគូសបញ្ជាក់ពីតួនាទីយ៉ាង​សំខាន់នៃ​មជ្ឈមណ្ឌល​ភស្តុភារកម្ម ​និងកំពង់ផែពហុបំណងកំពត ក្នុងការលើកដាក់ ផ្ទេរ ទំនិញចេញ-ចូល ទៅកាន់ទីផ្សារ​អន្តរជាតិ ដែលនឹងនាំមកនូវភាពងាយស្រួល​ និងប្រសិទ្ធភាពខ្ពស់ ​ដល់ពាណិជ្ជករ និងអ្នកវិនិយោគ នៅក្នុងការនាំចេញផលិតផលកសិកម្ម ​ឧស្សាហកម្ម ​និងនេសាទ ​ទៅលក់នៅទីផ្សារនៅក្នុងតំបន់ និងពិភពលោក។ កំពង់ផែនេះ នឹងចូលរួមចំណែកដល់ការអភិវឌ្ឍវិស័យភស្តុភាកម្ម និងកំពង់ផែនៅកម្ពុជា សំដៅជួយ​លើកកម្ពស់ជីវភាពរស់នៅជូនប្រជាពលរដ្ឋ និងការអភិវឌ្ឍសេដ្ឋកិច្ចជាតិ ដើម្បីសម្រេចបាននូវ​ទិសដៅ​កំណើន​សេដ្ឋកិច្ចតាមការរំពឹងទុក។ ​គម្រោងវិនិយោគអភិវឌ្ឍន៍មជ្ឈមណ្ឌលនេះ នឹងក្លាយ​ជាកំពង់​ផែទឹកជ្រៅ និងធំមួយទៀតនៅកម្ពុជា ​និងដ៏ទំនើបលំដាប់អន្តរជាតិនៅក្នុងតំបន់អាស៊ាន៕ អត្ថបទ៖ បូរ៉ាវី