[Khmer times] - កំពង់ផែខេត្តកំពតតម្លៃ ១,៣ ពាន់លានដុល្លារនឹងចាប់ផ្តើមការសាងសង់ក្នុងសប្តាហ៍នេះ
2022-05-03
ទៅកាន់ទំព័រចុះផ្សាយក្នុង Khmer times
ដោយមានការពង្រឹងវិស័យដឹកជញ្ជូន និងភស្តុភាររបស់កម្ពុជា កំពង់ផែពហុបំណងដែលមានការវិនិយោគ ១,៣ ពាន់លានដុល្លារពីវិស័យឯកជននេះ នឹងចាប់ផ្តើមសាងសង់នៅខេត្តកំពតក្នុងសប្តាហ៍នេះ។
កាលពីសប្តាហ៍មុន លោក ស៊ុន ចាន់ថុល មានប្រសាសន៍ថា ការអភិវឌ្ឍហេដ្ឋារចនាសម្ព័ន្ធ ផ្លូវថ្នល់ ផ្លូវដែក និងកំពង់ផែ គឺឆ្លើយតបទៅនឹងកំណើននៃការដឹកជញ្ជូនទំនិញ បន្ទាប់ពីមានកំណើនសេដ្ឋកិច្ចរបស់ប្រទេស។
លោក ស៊ុន ចាន់ថុល បន្តថា៖«បើនិយាយពីការអភិវឌ្ឍកំពង់ផែ មានកំពង់ផែនៅខេត្តកោះកុង មួយនៅតារាសាគរ។ នៅថ្ងៃទី៥ ខែឧសភា កំពង់ផែកំពតនឹងចាប់ផ្តើមសាងសង់។ វានឹងជួយបំពេញកំពង់ផែក្រុងព្រះសីហនុបន្ថែមទៀត»។
កាលពីខែមករា ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគដ៏ធំមួយដើម្បីអភិវឌ្ឍកំពង់ផែភស្តុភារ និងពហុបំណងក្នុងខេត្តកំពត។
ស្ថិតនៅក្នុងក្រុងបូកគោ ខេត្តកំពត ការវិនិយោគនេះត្រូវបានចុះបញ្ជីក្រោមឈ្មោះក្រុមហ៊ុន Kampot Logistics and Port Company Limited ។
ការវិនិយោគនេះ ជួយលើកកំពស់វិស័យភ័ស្តុភារ ជាពិសេសខ្សែសង្វាក់ផលិតកម្ម និងការប្រកួតប្រជែងទីផ្សារ។
លោក ម៉ក់ ស៊ីដេត អគ្គនាយកនៃអគ្គនាយកដ្ឋានដឹកជញ្ជូនផ្លូវទឹក-សមុទ្រ មានប្រសាសន៍ថា កំពង់ផែដែលវិនិយោគដោយឯកជននៅខេត្តកំពតនេះ នឹងចូលរួមចំណែកក្នុងសកម្មភាពដឹកជញ្ជូននៅកម្ពុជា។
លោកបានថ្លែងថា៖«កំពង់ផែឯកជនបានរួមចំណែកដល់កំណើនសេដ្ឋកិច្ចរបស់ប្រទេស ដោយសារការកើនឡើងនៃតម្រូវការសម្រាប់ការដឹកជញ្ជូន»។
លោកបានបន្តឱ្យដឹងដែរថា មន្ត្រីជាន់ខ្ពស់របស់ក្រសួងត្រូវបានអញ្ជើញឱ្យចូលរួមក្នុងពិធីបើកការដ្ឋានសាងសង់កំពង់ផែនេះផងដែរ។
លោក ស៊ិន ចន្ធី ប្រធានសមាគមភស្តុភារកម្ពុជាបានថ្លែងកាលពីម្សិលមិញថា ការវិនិយោគកំពង់ផែ និង ភស្តុភារបន្ថែមទៀត នឹងជួយដល់វិស័យភស្តុភារនៅកម្ពុជា ក៏ដូចជាជំរុញការនាំចេញ និងនាំចូលទំនិញ ជាពិសេសជួយកម្ពុជាកាត់បន្ថយថ្លៃដឹកជញ្ជូន និងអាចប្រកួតប្រជែងជាមួយប្រទេសជិតខាង។
លោកបានបន្ថែមថា ការសាងសង់មជ្ឈមណ្ឌលភស្តុភារនៅខេត្តកំពត គឺជាដំណើរការល្អក្នុងទិសដៅត្រឹមត្រូវ ព្រោះកម្ពុជាត្រូវការមជ្ឈមណ្ឌលបែបនេះនៅតាមខេត្តមួយចំនួន។
លោកបានថ្លែងថា៖«ប្រសិនបើយើងមានមជ្ឈមណ្ឌលភស្តុភារនៅខេត្តកំពត វានឹងជួយជំរុញវិស័យនេះឱ្យកាន់តែមានប្រសិទ្ធភាព និងប្រាក់ចំណេញ។ សព្វថ្ងៃនេះ ការវិនិយោគបែបនេះនៅតាមតំបន់ព្រំដែន ជាពិសេសតំបន់សេដ្ឋកិច្ចពិសេស គឺជាការចាំបាច់។ យើងត្រូវការមជ្ឈមណ្ឌលដឹកជញ្ជូនបែបនេះបន្ថែមទៀត»។
យោងតាមស្ថិតិនៃការដឹកជញ្ជូនទំនិញនៅកំពង់ផែស្វយ័តក្រុងព្រះសីហនុបានឲ្យដឹងថា ចំនួនកុងតឺន័រឆ្លងកាត់កំពង់ផែមានចំនួន១៩៨១៨២គ្រឿង ស្មើនឹង២០ ហ្វីតក្នុងត្រីមាសទី១ ឆ្នាំ២០២២ កើនឡើង១៦ ភាគរយ បើធៀបនឹងរយៈពេលដូចគ្នាក្នុងឆ្នាំ២០២១។
ដោយឡែក កំពង់ផែនេះ បានបម្រើការជាកន្លែងឆ្លងកាត់ និងដឹកជញ្ជូនទំនិញទៅកាន់ប្រទេសមួយចំនួនដូចជា ប្រទេសជប៉ុន កូរ៉េខាងត្បូង និង សិង្ហបុរី៕
