[Rasmei Kampuchea Daily News] - ស្ពានអាកាសថ្មើរជើង សន្ធរម៉ុក គ្រោងនឹងសម្ពោធដាក់អោយប្រើប្រាស់ នៅពេលដ៏ខ្លីខាងមុខ
ដោយ: រ៉ាម៉ន / ភ្នំពេញ: ស្ពានអាកាសថ្មើរជើង សន្ធរម៉ុក ស្ថិតក្នុងខណ្ឌទួលគោក គ្រោងនឹងសម្ពោធដាក់អោយប្រើប្រាស់ នៅពេលដ៏ខ្លីខាងមុខនេះ ខណៈដែលការដ្ឋាន សាងសង់ស្ពានអាកាសថ្មើរជើងមួយនេះ បានស្ថាបនារួចរាល់ ១០០ ភាគរយហើយ ដើម្បីទុកអោយបងប្អូនប្រជាពលរដ្ឋ ពិសេសប្អូនៗ កូនក្មួយ សិស្សានុសិស្ស បានដើរឆ្លងកាត់ ដែលអាចកាត់បន្ថយបាន នូវគ្រោះថ្នាក់ចរាចរណ៍។
លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូន រាជធានីភ្នំពេញ បានអោយដឹង នៅព្រឹកថ្ងៃទី២៨ មេសានេះថាៈ ស្ពានអាកាសថ្មើរជើងសន្ធរម៉ុកនេះ ជាសមិទ្ធផលថ្មីមួយ ទៀតរបស់លោក ឃួង ស្រេង អភិបាលនៃគណៈអភិបាល រាជធានីភ្នំពេញ ។ ការដ្ឋាននេះ ស្ថាបនាបានរួចរាល់ ១០០ ភាគរយហើយ គ្រោងនឹងសម្ពោធដាក់អោយប្រើប្រាស់ នៅពេលដ៏ខ្លី ខាងមុខនេះ ក្រោមអធិបតីភាពលោក អភិបាលរាជធានីភ្នំពេញ ដើម្បីទុកអោយបងប្អូន ប្រជាពលរដ្ឋ ពិសេសប្អូនៗ កូនក្មួយ សិស្សានុសិស្ស បានដើរឆ្លងកាត់ ព្រោះថា ស្ពានថ្មើជើង មួយនេះ បានហោះលើមហាវិថីធំៗ ២ ខ្សែ និងនៅលើចំណុចប្រសព្វ ផ្លូវបែកជា ៤ ដែលត្រូវមានអ្នកដើរឆ្លងកាត់ច្រើន។ ដោយមើលឃើញពីបញ្ហានេះ ទើបលោក ឃួង ស្រេង ណែនាំអោយស្ថាបនា ស្ពានអាកាសថ្មើជើងថ្មីនេះឡើង។
ជួបជាមួយយុវជន ហ៊ុន ពេជ្រធនរៈ ដែលជាពលរដ្ឋ ដែលបានប្រើប្រាស់ស្ពានអាកាសថ្មើរជើង សន្ធរម៉ុក បានឲ្យដឹងថាៈ បន្ទាប់ពីមានស្ពានមួយនេះហើយ ពួកគេ មានភាពងាយស្រួល ក្នុងការធ្វើដំណើរឆ្លងកាត់ ដោយជួយកាត់បន្ថយនូវ គ្រោះថ្នាក់ជាយថាហេតុ និងមិនបាច់រង់ ចាំស្តុប មិនចំណាយពេលយូរ ដូចជាពេលដែលមិនទាន់មានស្ពានអាកាស ហើយជាមួយ គ្នានោះ ប្រជាពលរដ្ឋ បានថ្លែងអំណរគុណ ដល់រាជរដ្ឋាភិបាល និងលោក ឃួង ស្រេង អភិបាលរាជធានីភ្នំពេញ ដែលបានកសាងស្ពានអាកាសថ្មីនេះឡើង ដែលបានជួយសម្រួល ដល់ការធ្វើដំណើរ នៃពិធី នៅជុំវិញតំបន់នេះ ឲ្យកាន់តែមានភាពល្អប្រសើរ។
គួរបញ្ជាក់ថា ស្ពានអាកាសថ្មើរជើង នៅត្រង់មុខសាលាបឋមសិក្សាសន្ធរម៉ុក ត្រូវសាង់សង់ នៅលើចំណុចផ្លូវប្រសព្វទាំង ៤ ទិស គឺសាងសង់កាត់ទទឹងផ្លូវម៉ៅសេទុង ២ ខ្សែ និងកាត់ទទឹង ផ្លូវកម្ពុជាក្រោម ២ខ្សែ ដើម្បីបង្កលក្ខណៈងាយស្រួល ដល់សិស្សានុសិស្ស បានឆ្លងកាត់ ស្ពាននេះ ដោយសុវត្ថិភាព ទោះពួកគេ មកពីទិសខាងណាក៏ដោយ។
មកដល់ពេលនេះ រាជធានីភ្នំពេញ មានស្ពានអាកាសថ្មើរជើង ចំនួន ៤ កន្លែងហើយ ក្នុងនោះ រួមមាន នៅតំបន់ជម្ពូវ័ន្ត ខណ្ឌពោធិ៍សែនជ័យ មានចំនួន ២ កន្លែង និងនៅតំបន់ភ្លើងស្តុប នាងគង្ហីង មានចំនួន១ កន្លែង និងនៅផ្សារដើមគរ មានមួយកន្លែងទៀត ដែលបានបើកសម្ពោធ ដាក់អោយប្រើប្រាស់ ជាផ្លូវការ កាលពីការចុងខែកក្កដា ឆ្នាំ២០២០ កន្លងមកនេះ ក្រោមវត្តមាន លោក ឃួង ស្រេង អភិបាលរាជធានីភ្នំពេញ៕/V
