[Phnom Penh Post] - ២ ខែ អគ្គនាយកដ្ឋានពន្ធដារទទួលបានប្រាក់ពន្ធពីយានយន្តចំនួន ៣ ៨៩៣,៣ លានរៀល
2022-04-07
ទៅកាន់ទំព័រចុះផ្សាយក្នុង Phnom Penh Post
ភ្នំពេញៈ នៅក្នុងរយៈពេល ២ ខែគឺខែកុម្ភៈ និងខែមីនាឆ្នាំ ២០២២ នេះ អគ្គនាយកដ្ឋានពន្ធដារបានធ្វើការត្រួតពិនិត្យយានយន្តបានចំនួន ៨ ៥២៩ គ្រឿង ទទួលបានប្រាក់ពន្ធចំនួន ៣ ៨៩៣,៣ លានរៀលនិងពិន័យបានយានយន្តចំនួន ៨ ១៣៨ គ្រឿង។ នេះបើតាមលោក មាស សុខសេនសាន អគ្គលេខាធិការ និងជាអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ។
លោក មាស សុខសេនសាន ប្រាប់ ភ្នំពេញ ប៉ុស្តិ៍ នៅថ្ងៃទី ៥ ខែមេសាថា រយៈពេល ២ ខែចាប់ពីខែកុម្ភៈដល់ខែមីនាមន្ត្រីពន្ធដារនៃអគ្គនាយកដ្ឋានពន្ធដារ បានចុះត្រួតពិនិត្យយានយន្តជាង ៨ ០០០ គ្រឿង និងក៏បានធ្វើការអប់រំណែនាំក្រើនរំឭកពលរដ្ឋកុំឱ្យភ្លេចទៅបង់ពន្ធផងដែរ។
លោកថ្លែងថា៖ «ការត្រួតពិនិត្យការប្រកាសបង់ពន្ធលើមធ្យោបាយដឹកជញ្ជូនឆ្នាំ ២០២១ គិតចាប់ពីថ្ងៃទី ១ ខែកុម្ភៈ ដល់ថ្ងៃទី ៣១ ខែមីនា ឆ្នាំ ២០២២ អគ្គនាយកដ្ឋានពន្ធដារ ត្រួតពិនិត្យយានយន្តបានចំនួន ៨ ៥២៩ គ្រឿង ប្រាក់ពន្ធចំនួន ៣ ៨៩៣,៣ លានរៀល និងពិន័យបានយានយន្តចំនួន ៨ ១៣៨ គ្រឿង ប្រាក់ពិន័យចំនួន ៣ ៦៦២,៥ លានរៀល»។
ជាមួយគ្នានេះ លោក ចាន់ ប៊ន អនុប្រធានសាខាពន្ធដារ ខេត្តតាកែវ ថ្លែងប្រាប់ ភ្នំពេញ ប៉ុស្តិ៍ នៅថ្ងៃទី ៥ ខែមេសាថា ក្នុងរយៈពេល ២ ខែ ចាប់ពីខែកុម្ភៈដល់ ខែមីនា កម្លាំងសមត្ថកិច្ចចម្រុះដឹកនាំដោយមន្ត្រីសាខាពន្ធដារខេត្តតាកែវ បានចុះអនុវត្តកិច្ចការងារត្រួតពិនិត្យលើការបង់ពន្ធ និងផាកពិន័យរថយន្តគ្រប់ប្រភេទលើមធ្យោបាយដឹកជញ្ជូនជាច្រើនគោលដៅក្នុងនោះជាលទ្ធផលមន្ត្រីពន្ធដារសាខាខេត្តតាកែវបានត្រួតពិនិត្យ និងផាកពិន័យរថយន្តចំនួនជាង ៤០០ គ្រឿង ដោយទទួលបានប្រាក់បង់ពន្ធជាង ១៦០ លានរៀល និងប្រាក់ពិន័យជាង ១៦០ លានរៀល។
លោកថ្លែងថា៖ «រថយន្តដែលត្រូវបានពិនិត្យ និងផាកពិន័យគឺរថយន្តគ្រប់ប្រភេទ ក្នុងនោះមានដូចជា រថយន្តដឹកទំនិញ រថយន្តដឹកអ្នកដំណើរ និងរថយន្តទេសចរណ៍ ៣ ប្រភេទហ្នឹង។ រថយន្តទេសចរណ៍ហ្នឹងបានន័យថា រថយន្តគ្រួសារ រថយន្តដឹកអ្នកដំណើរ និងរថយន្តដឹកទំនិញគ្រប់ប្រភេទ»។
លោកបន្តថា ការចុះអនុវត្តការត្រួតពិនិត្យ ការបង់ពន្ធលើមធ្យោបាយដឹកជញ្ជូន និងផាកពិន័យនេះ ធ្វើឡើងជាច្រើនទីតាំងទាំងនៅតាមផ្លូវជាតិ និងតាមបណ្តាផ្លូវខេត្តនានាក្នុងខេត្តតាកែវ។ លោកបញ្ជាក់ថា៖ «ការចុះពិនិត្យនេះយើងធ្វើការប្តូរទីតាំងរហូត ហើយការប្តូរនេះ គឺជាគោលការណ៍របស់អគ្គនាយកដ្ឋានពន្ធដារ ចង់ឱ្យអ្នកមានរថយន្តដឹងថា ពេលដែលយើងបង់ពន្ធហើយគឺ ភ្នាក់ងារពន្ធដារតែងចុះត្រួតពិនិត្យ បើមិនចុះទេ ឆ្នាំក្រោយៗទៀតប្រហែលជាគ្មានអ្នកចូលបង់ទេ»។
លោក ប៉ែត ចក់ អនុប្រធានសាខាពន្ធដារ ខេត្តព្រះសីហនុថ្លែងនៅថ្ងៃទី ៥ ខែមេសាថា ការចុះត្រួតពិនិត្យយានយន្តដែលមិនបានបង់ពន្ធលើមធ្យោបាយដឹកជញ្ជូន ក្នុងខេត្តព្រះសីហនុរយៈពេល ២ ខែ ចាប់ពីខែកុម្ភៈ ដល់ ខែមីនា មន្ត្រីសាខាពន្ធដារខេត្តព្រះសីហនុបានពិនិត្យរថយន្តចំនួន ៦៣៨ គ្រឿង និងផាកពិន័យរថយន្តបានចំនួន ៣៦៤ គ្រឿងក្នុងនោះប្រាក់ពន្ធមានចំនួនជាង ៣៦៥ លានរៀល ប្រាក់ពិន័យចំនួនជាង ៣៥៧ លានរៀល។
លោកថ្លែងថា៖ «ចំនួនរថយន្ត ៦៣៨ គ្រឿងហ្នឹង បង់ពន្ធធម្មតា (និងពិន័យ) មាន ៤ គ្រឿង (មិនពិន័យ)។ អ៊ីចឹងយើងពិន័យបាន ៦៣៤ គ្រឿង ហើយប្រាក់ពន្ធប្រាក់ពិន័យទៅតាមហ្នឹង ហើយអាហ្នឹងគឺសរុប ២ ខែ គឺខែ ២ និងខែ ៣ ហើយបញ្ចប់ត្រឹមខែ ៣ ហ្នឹងហើយ»។
លោកបានបញ្ជាក់ថា រថយន្តចំនួន ៤ គ្រឿង ដែលមិនត្រូវបានពិន័យនោះ គឺដោយសារតែគេបានចេញបណ្ណសម្គាល់យានយន្តនៅក្នុងខែធ្នូ ឆ្នាំ ២០២១ ដែលករណីនេះ អគ្គនាយកដ្ឋានពន្ធដារ មិនតម្រូវឱ្យបង់ប្រាក់ពិន័យទេ គឺគ្រាន់តែបង់ប្រាក់ពន្ធធម្មតាឆ្នាំ ២០២១ តែប៉ុណ្ណោះ។
លោកឱ្យដឹងទៀតថា ទន្ទឹមនឹងការត្រួតពិនិត្យការបង់ពន្ធ មន្ត្រីសាខាពន្ធដារក៏បានធ្វើការក្រើនរំឭកផ្សព្វផ្សាយបន្ថែមដល់ប្រជាពលរដ្ឋដែលមានកាតព្វកិច្ចបង់ពន្ធ កុំភ្លេចទៅបង់ពន្ធ។ អ្នកជាប់ពន្ធអាចធ្វើការបង់ពន្ធដោយផ្ទាល់ជាមួយសាខាពន្ធដារខេត្ត-ខណ្ឌ ឬធនាគារ ដែលបានចុះអនុស្សរណៈនៃការយោគយល់គ្នាជាមួយក្រសួងសេដ្ឋកិច្ច និងហិរញ្ញវត្ថុ ចាប់ពីថ្ងៃទី ១ ខែមិថុនា រហូតដល់ថ្ងៃទី ៣១ ខែវិច្ឆិកានៃឆ្នាំនីមួយៗ។
លោកឱ្យដឹងថាពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ ត្រូវបានលើកលែងចំពោះរថយន្តគិលានសង្គ្រោះ រថយន្តពន្លត់អគ្គិភ័យជាកម្មសិទ្ធិរបស់រដ្ឋ យានយន្តដែលជាកម្មសិទ្ធិរបស់អង្គភាពកងយោធពលខេមរភូមិន្ទ កងរាជអាវុធហត្ថ នគរបាលជាតិ ដែលបម្រើការងារសម្រាប់កិច្ចការការពារជាតិ សន្តិសុខ និងសណ្តាប់ធ្នាប់។
ក្រៅពីនេះ យានយន្តដែលជាកម្មសិទ្ធិរបស់ស្ថានទូត ឬស្ថានកុងស៊ុលបរទេសអង្គការអន្តរជាតិ ឬទីភ្នាក់ងារសហប្រតិបត្តិការបច្ចេកទេសរបស់រដ្ឋាភិបាលនានាក៏មិនតម្រូវឱ្យបង់ពន្ធដែរ។ លោក ប៉ែត ចក់ បានបញ្ជាក់ថា មធ្យោបាយដឹកជញ្ជូន និងយានជំនិះគ្រប់ប្រភេទដែលខកខាន ឬមិនបានបង់ពន្ធលើមធ្យោបាយដឹកជញ្ជូន សម្រាប់បណ្តាឆ្នាំកន្លងមកគឺត្រូវបង់ប្រាក់ពន្ធ និងប្រាក់ពិន័យឱ្យបានរួចរាល់នៅតាមឆ្នាំទាំងនោះជាមុនសិន ទើបអនុញ្ញាតឱ្យប្រកាសបង់ពន្ធសម្រាប់ឆ្នាំបច្ចុប្បន្ន។ ប្រាក់ដែលពិន័យនៃការខកខានគឺស្មើនឹង ១០០% នៃប្រាក់ពន្ធត្រូវបង់៕
