ពិធីចែកមួកសុវត្ថិភាពដល់លោកគ្រូ អ្នកគ្រូ នៃសាលាបឋមសិក្សា ហាំងង៉ោ ស្រះចក ក្រោមអធិបតីភាព លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋានគណៈកម្មាធិការសុវត្ថិភាពចរាចរណ៍ផ្លូវគោក (គ.ស.ច.គ) ភ្នំពេញ៖ រសៀលថ្ងៃព្រហស្បតិ៍ ១៤រោច ខែផល្គុន ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី៣១ ខែមីនា ឆ្នាំ ២០២២ លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការនៃអគ្គលេខាធិការដ្ឋានគ.ស.ច.គ បានអញ្ជើញជាអធិបតីភាពក្នុងពិធីចែកមួកសុវត្ថិភាពដល់ លោកគ្រូ អ្នកគ្រូនៃសាលាបឋមសិក្សា ហាំងង៉ោ ស្រះចក ដោយការមានការចូលរួមពីលោកស្រី ហុង សុវត្ថារី នាយិកានៃសាលាបឋមសិក្សាហាំងង៉ោ ស្រះចក មន្ត្រីអគ្គលេខាធិការដ្ឋានគ.ស.ច.គ លោកគ្រូ អ្នកគ្រូ សរុបប្រមាណ២៥នាក់។ ថ្លែងក្នុងរបាយការណ៍ស្វាគមន៍ទៅកាន់អង្គពិធីនាឱកាសនោះ លោកស្រីនាយិកាសាលាបឋមសិក្សាហាំងង៉ោ ស្រះចក បានជម្រាបជូនថា៖ បច្ចុប្បន្នសាលាមានលោកគ្រូ អ្នកគ្រូសរុបទាំងអស់ចំនួន ២៣ នាក់ (ស្រី១៨នាក់) និងសិស្សមានចំនួន៤២២នាក់ (ស្រី ២១៣នាក់) ក្នុងនោះសិស្សានុសិស្សដែលបានចាក់វ៉ាក់សាំងបង្ការជំងឺកូវីដ-១៩សម្រាប់ដូសទី២មានចំនួន ៩៨% និងដូសទី៣ចំនួន៤៥%។ ទន្ទឹមជាមួយគ្នានោះដែរ មានប្រសាសន៍សំណេះសំណាលទៅកាន់អង្គពិធី លោកជំទាវរដ្ឋលេខាធិការ បានគូសបញ្ជាក់ថា៖ គ្រោះថ្នាក់ចរាចរណ៍ផ្លូវគោកគឺជាឃាតករលាក់មុខនៅលើដងផ្លូវ ហើយក៏ជាបញ្ហាប្រឈមដ៏ធំមួយដែលប្រទេសយើងកំពុងជួបប្រទះនាពេលបច្ចុប្បន្ន។ លោកជំទាវបានបន្ថែមទៀតថា៖ មូលហេតុបង្កចម្បងធំៗដែលបង្កឱ្យមានគ្រោះថ្នាក់ចរាចរណ៍នាពេលកន្លងមករួមមាន៖ ការបើកបរលើសល្បឿនកំណត់ដោយច្បាប់ ការមិនគោរពសិទ្ធិអាទិភាព ការបត់មិនប្រុងប្រយ័ត្ន និងការមិនប្រកាន់ស្តាំ ជាដើម។ ឆ្លៀតក្នុងឱកាសនោះដែរ លោកជំទាវរដ្ឋលេខាធិការ បានសំណូមឱ្យលោកគ្រូ អ្នកគ្រូទាំងអស់ដែលបាន ចូលរួមកម្មវិធីនេះចូលរួមអប់រំផ្សព្វផ្សាយបន្តដល់សិស្សានុសិស្សរបស់ខ្លួនឱ្យបានយល់ដឹងគ្រប់ៗគ្នាអំពីសុវត្ថិភាពចរាចរណ៍ដើម្បីចូលរួមគោរពច្បាប់ចរាចរណ៍ផ្លូវគោកឱ្យបានខ្ជាប់ខ្ជួន និងកុំឱ្យកើតមានគ្រោះថ្នាក់ចរាចរណ៍ដល់ខ្លួនឯង និងសាច់ញាតិរបស់ខ្លួន៕