​ភ្នំពេញ៖ រដ្ឋមន្ត្រីក្រសួងសាធារណការ​​ ជំរុញដល់​ម្ចាស់យានយន្តទាំងអស់ដែលបានហួសសុពលភាពនៃការត្រូតពិនិត្យបច្ចេកទេសយានយន្ត(ឆៀក) ឱ្យរួសរាន់យកយានយន្តរបស់ខ្លួនមកធ្វើការត្រួតពិនិត្យឡើងវិញឱ្យបានឆាប់រហ័ស ជៀសវាងត្រូវបងខាត់ថវិកាផ្ទាល់ខ្លួនលើការផាកពិន័យដោយច្បាប់ ខណៈបច្ចុប្បន្នមានឡានជិតកន្លះលានគ្រឿង​ផុតសុពលភាពឆៀក។ ការថ្លែងបែបនេះរបស់លោកទេសរដ្ឋមន្ដ្រី ស៊ុន ចាន់ថុល និងជារដ្ឋមន្ត្រីក្រសួងសាធារណការ និងដឹកជញ្ជូននៅក្នុងពិធីសម្ពោធបើកឱ្យប្រើប្រាស់ជាផ្លូវការមណ្ឌលត្រួតពិនិត្យលក្ខណៈបច្ចេកទេសយានយន្ត(ឆៀក) សាខាពោធិ៍សែនជ័យ-អូរដឹម និងប្រព័ន្ធស្វ័យប្រវត្តិកម្មត្រួតពិនិត្យលក្ខណៈបច្ចេកទេសយានជំនិះ (ឆៀក) ជំនាន់ទី២ នៅរាជធានីភ្នំពេញនៅថ្ងៃទី ២៨ ខែមីនានេះ។ ទាក់ទិននឹងបញ្ហាឆៀកយានយន្តនេះ លោករដ្ឋមន្ត្រី​ ស៊ុន ចាន់ថុល ក៏បានបញ្ជាក់ដែរថា ការឆៀកយានយន្តវាពិតជាមានសារៈសំខាន់ណាស់ ព្រោះទី១គឺជាការតម្រូវដោយច្បាប់ និងទី២ បើឡានរបស់យើងវាមិនបានស្របតាមស្តង់ដារលក្ខណៈបច្ចេកទេសវានឹងបង្កឱ្យកើតមានគ្រោះថា្នក់ចរាចរណ៍ ខណៈបច្ចុប្បន្នបញ្ហាគ្រោះថ្នាក់ចរាចរណ៍កើតឡើងច្រើនកត្តា ដែលមានកត្តាមនុស្ស និងកត្តាផ្សេងទៀត ដែលក្នុងនោះក៏មានកត្តាយានយន្តមួយដែរ។ គួររំលឹកថា បើយោងតាមច្បាប់នៃព្រះរាជាណាចក្រកម្ពុជា គ្រប់បណ្តាយានយន្តដែលបានហួសសុពលភាពនៃការត្រួតពិនិត្យបច្ចេកទេសយានយន្ត ​ នឹងត្រូវរងការផាកពិន័យដែលគិតជាចំនួនថ្ងៃ ដោយគិតយ៉ាងតិច ៥០០រៀល និងលើពីនេះក្នុងមួយថ្ងៃៗទៅតាមប្រភេទឡានតូច ឬឡានធំ ខណៈដែលការពិន័យនេះនៅមិនទាន់រាប់បញ្ចូលចំពោះការផាកពិន័យនៅតាមដងផ្លូវដោយប៉ូលិសចរាចរណ៍ លើបទល្មើសតាមច្បាប់ចរាចរណ៍ផ្លូវគោកនៅឡើយទេ៕