[Rasmei Kampuchea Daily News] - ទេសរដ្ឋមន្ត្រី ស៊ុន ចាន់ថុល៖មានយានជំនិះចំនួន៤៩ម៉ឺនគ្រឿងនៅទូទាំងប្រទេស មិនទាន់បានយកមកត្រួតពិនិត្យលក្ខណៈបច្ចេកទេសនៅឡើយ
ដោយៈសុផល/ភ្នំពេញ: លោក ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន ក្នុងពិធីសម្ពោធដាក់ឱ្យដំណើរការជាផ្លូវការមជ្ឈមណ្ឌលត្រួតពិនិត្យលក្ខណៈបច្ចេកទេសយានជំនិះ សាខាពោធិ៍សែនជ័យ-អូរដឹម នៅថ្ងៃទី២៨ខែមីនា បានជម្រាបឱ្យដឹងថា៖ មានយានជំនិះចំនួន៤៩០ពាន់គ្រឿងនៅទូទាំងប្រទេស មិនទាន់បានយកមកត្រួតពិនិត្យលក្ខណៈបច្ចេកទេសនៅឡើយ។
ទន្ទឹមនឹងនេះ លោកទេសរដ្ឋមន្ត្រីបានអំពាវនាវដល់ប្រជាពលរដ្ឋដែលជាម្ចាស់យានជំនិះទាំងនោះប្រញាប់យកយានជំនិះមកត្រួតពិនិត្យលក្ខណៈបច្ចេកទេសឱ្យបានទៀងទាត់ និងទាន់ពេលវេលាដើម្បីសុវត្ថិភាពរបស់លោកអ្នក និងអ្នករួមដំណើរ តាមដងផ្លូវផងដែរ។
ឆ្លៀតក្នុងឱកាសនោះដែរ លោកទេសរដ្ឋមន្ត្រី ក៏បានសំណូមពរទៅបងប្អូនប្រជាពលរដ្ឋជាអ្នកបើកបរ ដែលមានបណ្ណបើកបរផុតសុពលភាព មិនទាន់យកមកប្តូរ ឬពន្យារបណ្ណបើកបរ សូមមកប្ដូរ ឬពន្យារ បណ្ណបើកបររបស់ខ្លួនឱ្យស្របច្បាប់ដើម្បីជៀសវាងការផាកពិន័យនៅពេលបើកបរនៅតាមផ្លូវ។ ម្យ៉ាងវិញ ទៀត ក្រសួងសាធារណការ និងដឹកជញ្ជូនបានបង្កើតមជ្ឈមណ្ឌលផ្ដល់សេវាប្រភេទនេះនៅក្នុងទីស្តីការក្រសួង និងតាមផ្សារទំនើបនានា ដោយបងប្អូនគ្រាន់តែចំណាយពេលត្រឹមតែ១៥នាទីប៉ុណ្ណោះ នឹងទទួលបាន សេវានេះដោយការពេញចិត្ត។
លោករដ្ឋមន្ត្រី ស៊ុន ចាន់ថុល ក៏បានបញ្ជាក់ដែរថា ការឆៀកយានយន្តវាពិតជាមានសារៈសំខាន់ណាស់ ព្រោះទី១គឺជាការតម្រូវដោយច្បាប់ និងទី២ បើឡានរបស់យើងវាមិនបានស្របតាមស្តង់ដារលក្ខណៈបច្ចេកទេសវានឹងបង្កឱ្យកើតមានគ្រោះថា្នក់ចរាចរណ៍ ខណៈបច្ចុប្បន្នបញ្ហាគ្រោះថ្នាក់ចរាចរណ៍កើតឡើងច្រើនកត្តា ដែលមានកត្តាមនុស្ស និងកត្តាផ្សេងទៀត ដែលក្នុងនោះក៏មានកត្តាយានយន្តមួយដែរ។
គួររំលឹកថា បើយោងតាមច្បាប់នៃព្រះរាជាណាចក្រកម្ពុជា គ្រប់បណ្តាយានយន្តដែលបានហួសសុពលភាពនៃការត្រួតពិនិត្យបច្ចេកទេសយានយន្ត នឹងត្រូវរងការផាកពិន័យដែលគិតជាចំនួនថ្ងៃដោយគិតយ៉ាងតិច៥០០រៀលនិងលើពីនេះក្នុងមួយថ្ងៃៗទៅតាមប្រភេទឡានតូចឬឡានធំខណៈដែលការពិន័យនេះនៅមិនទាន់រាប់បញ្ចូលចំពោះការផាកពិន័យនៅតាមដងផ្លូវដោយប៉ូលិសចរាចរណ៍លើបទល្មើសតាមច្បាប់ចរាចរណ៍ផ្លូវគោកនៅឡើយទេ៕
