ពិធីបុណ្យបញ្ចុះខណ្ឌសីមាព្រះវិហារថ្មី នៃវត្តពុទ្ធពរត្រៃនិគម ស្ថិតនៅក្នុងឃុំកោះធំ ខ ស្រុកកោះធំ ខេត្តកណ្តាល បានប្រព្រឹត្តទៅក្រោមអធិបតីភាពដ៏ខ្ពង់ខ្ពស់ឯកឧត្តមទេសរដ្ឋមន្ត្រី ស៊ុន ចាន់ថុល កោះធំ៖ ថ្ងៃព្រហស្បតិ៍ ១៥កើត ខែផល្គុន ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី១៧ ខែមីនា ឆ្នាំ២០២២ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីដ៏ខ្ពង់ខ្ពស់ក្នុងពិធីបុណ្យបញ្ចុះខណ្ឌសីមាសម្ពោធឆ្លងព្រះវិហារថ្មី នៃវត្តពុទ្ធពរត្រៃនិគម ស្ថិតនៅក្នុងភូមិព្រែកបិ ឃុំកោះធំ ខ ស្រុកកោះធំ ដោយមានការចូលរួមពីថ្នាក់ដឹកនាំ និងមន្រ្តីរាជការក្រោមឱវាទក្រសួង ព្រមទាំងប្រជាពលរដ្ឋចំណុះជើងវត្តសរុបប្រមាណ៤២៣នាក់។ ថ្លែងក្នុងពិធីសំណេះសំណាលជាមួយបងប្អូនប្រជាពលរដ្ឋនាឱកាសនោះ ឯកឧត្តមទេសរដ្ឋមន្ត្រីគូសបញ្ជាក់ពីសារសំខាន់នៃកត្តាសុខសន្តិភាព និងស្ថិរភាពនយោបាយមិនអាចខ្វះបាន ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃ ព្រះរាជាណាចក្រកម្ពុជា ក្នុងការទាក់ទាញវិនិយោគិនពីបរទេសបង្កើតការងារជូនប្រជាពលរដ្ឋ ទាក់ទាញអ្នកទេសចរ ស្វែងរកទីផ្សារលក់កសិផល រួមចំណែកដល់ការរីកចម្រើនសេដ្ឋកិច្ចជាតិ និងកាត់បន្ថយភាពក្រីក្ររបស់ប្រជាពលរដ្ឋ។ លើសពីនេះទៀត ឯកឧត្ដមទេសរដ្ឋមន្ត្រី បានធ្វើបច្ចុប្បន្នភាពអំពីសមិទ្ធផលសម្រេចបាននៅក្នុងស្រុកកោះ ធំ ដែលក្នុងនោះរួមមាន៖ ស្ពានឆ្លងទន្លេបាសាក់ស្រុកកោះធំ ស្ពានជ្រៃធំកម្ពុជា-វៀតណាម ប្រវែង៤២៨ ម៉ែត្រ ផ្លូវជាតិលេខ២១ ផ្លូវលេខ១១០ ផ្លូវលំ១៩ខ្សែ ប្រវែងសរុប១០៣២៨ម៉្រែត និងសមិទ្ធផលនានាជាច្រើនទៀតក្នុងវិស័យសាសនា ដែលឆ្លុះបញ្ចាំងពីកិច្ចខិតខំប្រឹងប្រែងរបស់រាជរដ្ឋាភិបាល។ ដោយឡែកទាក់ទងនឹងសុខុមាលភាពសាធារណៈរវាងឆ្នាំ១៩៩៨ និងពេលបច្ចុប្បន្ន ឯកឧត្តមទេសរដ្ឋមន្ត្រី បានជម្រាបជូនថា៖ អាយុសង្ឃឹមរស់របស់ប្រជាពលរដ្ឋកម្ពុជា (Life Expectancy) មានការកើន ឡើងគួរឱ្យកត់សម្គាល់ពោលគឺ៖ កើនឡើងពី៥៦ឆ្នាំ រហូតដល់ជាង៧០ឆ្នាំ ដោយសារកម្ពុជាមានការរីកចម្រើនលើវិស័យហេដ្ឋារចនាសម្ព័ន្ធរូបវន្ត ជាពិសេសមធ្យោបោយ និងផ្លូវធ្វើដំណើរឆ្ពោះទៅកាន់មន្ទីរពេទ្យ ដើម្បីស្វែងរកសេវាថែទាំ និងព្យាបាលសុខភាព រួមជាមួយនឹងបរិស្ថានរស់នៅស្អាត អាហារបរិភោគគ្រប់ គ្រាន់ និងទឹកស្អាតជាដើម។ ឆ្លៀតក្នុងឱកានោះផងដែរ ឯកឧត្តមទេសរដ្ឋមន្ត្រី បានជម្រាបជូនអំពីបច្ចុប្បន្នភាពនៃគម្រោងសាងសង់ មន្ទីរពេទ្យតេជោសែន កោះធំ ដែលជាមន្ទីរពេទ្យធំ និងទំនើបជាងបណ្តាមន្ទីរពេទ្យស្រុកទាំងអស់នៅក្នុងប្រទេស ដោយគិតមកទល់បច្ចុប្បន្ននេះសម្រេចវឌ្ឍនភាពសាងសង់បានប្រមាណ២២,៩៦% ហើយ។ បន្ថែមពីលើនេះឯកឧត្តមទេសរដ្ឋមន្ត្រី បានបញ្ជាក់ថា៖ មន្ទីរពេទ្យនេះអាចផ្តល់សេវាសាធារណៈជូនដល់ បងប្អូនប្រជាពលរដ្ឋប្រមាណជាង៦០ម៉ឺននាក់មកពីស្រុកកោះធំ ស្រុកស្អាង ស្រុកលើកដែក នៃខេត្តកណ្តាល និងស្រុកព្រៃកប្បាស នៃខេត្តតាកែវ ដោយសហការជាមួយមន្ទីរពេទ្យកាល់ម៉ែត។ សូមជម្រាបជូនផងដែរថា៖ វត្តពុទ្ធពរត្រៃនិគម គឺជាវត្តមួយក្នុងចំណោមវត្តទាំង៤១នៅក្នុងស្រុកកោះធំ វត្តនេះត្រូវបានកសាងឡើងនៅក្នុងឆ្នាំ២០០៣ តាមគំនិតផ្តួចផ្តើមរបស់សម្តេចព្រះអភិសិរីសុគន្ធាមហា សង្ឃរាជាធិបតីកិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជាណាចក្រកម្ពុជា ក្នុងនោះព្រះវិហារនៃវត្តនេះកសាងអស់ទឹកប្រាក់ចំនួន ២៣២ ៨០០០ ដុល្លារអាមេរិកនៅក្នុងឆ្នាំ២០០៤៕