ភ្នំពេញ៖ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ ឯកឧត្តមទេសរដ្ឋមន្ត្រី ស៊ុន ចាន់ថុល នាថ្ងៃចន្ទ ទី១៤ ខែមីនា ឆ្នាំ២០២២នេះ បានអញ្ជើញជាអធិបតីក្នុងពិធីបើកវគ្គបណ្តុះបណ្តាលស្តីពីវគ្គ បណ្ដុះបណ្ដាល Six Sigma ដោយមានការចូលរួមពីសិក្ខាកាមដែលជាថ្នាក់ដឹកនាំ សរុបចំនួន ១៧០នាក់ ក្នុងនោះរួមមាន៖ ឯកឧត្តម លោកជំទាវ រដ្ឋលេខាធិការ ឯកឧត្តម លោកជំទាវ អនុរដ្ឋលេខាធិការ ឯកឧត្តមអគ្គនាយក លោក លោកស្រីអគ្គនាយករង លោក លោកស្រី ប្រធាននាយកដ្ឋាន និងប្រធានមន្ទីរសាធារណការ និងដឹកជញ្ជូន ២៥រាជធានី-ខេត្ត។ វគ្គបណ្ដុះបណ្ដាលនេះរៀបចំឡើងដោយវិទ្យាស្ថានតេជោ សែន សាធារណការ និងដឹកជញ្ជូនក្នុងគោល បំណងពង្រឹងប្រសិទ្ធភាពលើការងារ ដឹកនាំគ្រប់គ្រងស្ថាប័ន-អង្គភាព បង្កើនសមត្ថភាពលើការងារដឹកនាំនិងគ្រប់គ្រងស្ថាប័ន បង្កើនប្រាក់ចំណូល និងប្រាក់ចំណេញតាមរយ:កាត់បន្ថយពេលវេលា និងការចំណាយខ្ជីខ្ជាយ និងបង្កើនជំនាញដោះស្រាយបញ្ហានៅតាមអង្គភាពនីមួយៗឱ្យកាន់តែប្រសើរឡើង ដោយមានការចូលរួមជាគ្រូបង្គោលឧទ្ទេសនាមផ្ទាល ពីឯកឧត្តមរដ្ឋលេខាធិការ រស់ វណ្ណា។ នាឱកាសនោះ ឯកឧត្តម ហឿន សំនៀង នាយកវិទ្យាស្ថាន បានគូសបញ្ជាក់ពីលទ្ធផល រំពឹងទុកក្រោយពេលបញ្ចប់វគ្គបណ្តុះបណ្តាលនេះ ពោលគឺ៖ សិក្ខាកាមនឹងយល់ដឹងពីរបៀបនៃការបំពេញការងារតាមរបៀបទស្សនវិជ្ជា Six Sigma មានការផ្លាស់ប្តូរផ្នត់គំនិតនិងឥរិយាបទក្នុងការបំពេញការងារ ឱ្យបានល្អប្រសើរ រកឱ្យឃើញឬសគល់នៃបញ្ហា ចំណុចខ្វះខាត និងនីតិវិធីការងារដែលមិនសូវមាន គុណភាព និងចំណាយពេលវេលា និងធនធានច្រើនដែលមិនចាំបាច់ ហើយមិនបំពេញចិត្តសេចក្តីត្រូវការរបស់អតិថិជនដែលមកទទួលសេវា បង្កើតនីតិវិធីរបៀបរបបការងារ និងមានលទ្ធភាពកែលម្អ ចំណុចខ្វះខាត អនុវត្ដការងារឱ្យកាន់តែប្រសើរ និងកាត់បន្ថយវដ្តនៃនីតិវិធីការងារជាដើម។ ទន្ទឹមគ្នានោះដែរ ឯកឧត្តម រស់ វណ្ណា រដ្ឋលេខាធិការបានគូសបញ្ជាក់ពី សារសំខាន់នៃការគាំទ្រ និងការប្តេជ្ញាចិត្តខ្ពស់ពីថ្នាក់ដឹកនាំ ជាពិសេសការចូលរួមពីគ្រប់ភាគីពាក់ព័ន្ធ ទាំងអស់នៅក្នុងអង្គភាព-ស្ថាប័ន រាប់តាំងពីមន្ត្រីថ្នាក់ក្រោមបំផុតរហូតទៅដល់ថ្នាក់ដឹកនាំអង្គភាព-ស្ថាប័ននោះ ដើម្បីអនុវត្តទ្រឹស្តីទស្សនវិជ្ជា Six Sigma បានជោគជ័យ ក៏ដូចជាដើម្បីបញ្រ្ជៀបទ្រឹស្តីនេះឱ្យ ក្លាយជាវប្បធម៌របស់អង្គភាព-ស្ថាប័ននោះ។ ឯកឧត្តមរដ្ឋលេខាធិការបានសំណូមពរឱ្យសិក្ខាកាមទាំងអស់យកចិត្តទុកដាក់ ប្រកបដោយការប្ដេជ្ញាចិត្តខ្ពស់ដើម្បីក្រេបជញ្ជក់យកចំណេះដឹង និងបទពិសោធន៍ពីកម្មវិធីនេះយកទៅ អនុវត្តនៅក្នុងអង្គភាពរបស់ខ្លួនឱ្យមានប្រសិទ្ធភាពខ្ពស់ និងបានបញ្ជាក់បន្ថែមថាឯកឧត្តមនឹងខិតខំប្រឹង ប្រែងធ្វើបទបង្ហាញ ពន្យល់ឱ្យបានក្បោះក្បាយអំពីទ្រឹស្តីសំខាន់ៗជូនដល់សិក្ខាកាមទាំងអស់ ដើម្បីឱ្យ វគ្គបណ្តុះបណ្តាលនេះអាចសម្រេចបានជោគជ័យតាមការគ្រោងទុក។ សូមជម្រាបជូនថា៖ វគ្គបណ្ដុះបណ្ដាលនេះ បែងចែកជា ៣ វគ្គ សម្រាប់ក្រុមគោលដៅផ្សេងៗគ្នាក្នុងនោះ៖ វគ្គទី១ រៀបចំសម្រាប់ថ្នាក់ដឹកនាំចាប់ពីប្រធានមន្ទីរ ប្រធាននាយកដ្ឋានដល់រដ្ឋលេខាធិការ វគ្គទី២ រៀបចំ សម្រាប់អនុប្រធានមន្ទីរ សាធារណការ និងដឹកជញ្ជូនទាំង២៥ រាជធានី-ខេត្ត និងវគ្គទី៣រៀបចំសម្រាប់ ថ្នាក់អនុប្រធាននាយកដ្ឋាន៕