អគារមន្ទីរពេទ្យតេជោ សែន កោះធំ ដែលបានប្រារព្វពិធីក្រុងពាលីបុកគ្រឹះសាងសង់កាលថ្ងៃទី៧ ខែមករា ឆ្នាំ២០២២ ក្រោមវត្តមានលោក ស៊ុន ចាន់ថុល គិតត្រឹមថ្ងៃទី៤ ខែកុម្ភៈ ឆ្នាំ ២០២២កន្លងទៅ សម្រេចវឌ្ឍនភាពការងារសាងសង់បាន១១,៨៨%ហើយ។នេះបើតាមការឲ្យដឹងពីក្រសួងសាធារណការ និងដឹកជញ្ជូន កាលពីពេលថ្មីៗនេះ។ គិតត្រឹមថ្ងៃ ទី៤ ខែកុម្ភៈ ឆ្នាំ២០២២ សម្រេចវឌ្ឍនភាពការងារសាងសង់បាន១១,៨៨% ហើយនៃការងារសាង សង់អគារធំ (អគារ A)កម្ពស់២ជាន់ ការងារសាងសង់អគារឆ្វេង(អគារ B)កម្ពស់១ជាន់ ការងារសាងសង់ អគារឆ្វេង (អគារ C)កម្ពស់១ជាន់ និងការងារសាងសង់របងមន្ទីរពេទ្យ។ គម្រោងសាងសង់អគារថ្មីនៃមន្ទីរពេទ្យតេជោសែនកោះធំនេះ ដើម្បីឆ្លើយតបទៅនឹងតម្រូវការជាក់ស្តែង និងសម ស្របតាមកម្មវិធីនយោបាយរបស់រាជរដ្ឋាភិបាល និងចក្ខុវិស័យសម្រាប់អភិវឌ្ឍជាតិ និងសុខុមាលភាពរបស់ប្រជាពលរដ្ឋ។ មន្ទីរពេទ្យនេះនឹងក្លាយជាទីតាំងផ្តល់សេវាសុខាភិបាលសាធារណៈជូនដល់ប្រជាពលរដ្ឋប្រមាណជាង ៦០ម៉ឺននាក់ដែលរស់នៅក្នុងស្រុកស្អាង ស្រុកកោះធំ ស្រុកលើកដែក នៃខេត្ត កណ្តាល និងស្រុកព្រៃ កប្បាស នៃខេត្តតាកែវផងដែរ។ គួរបញ្ជាក់ថា គម្រោងសាងសង់មន្ទីរពេទ្យនេះរួមមាន៖ ការសាងសង់អគារថ្មីចំនួន ០៣ខ្នង ១)អគារមន្ទីរពេទ្យ ចំនួន ០១ខ្នង មាន ០៣ជាន់ ដែលជាន់ផ្ទាល់ដីមានទំហំ ៣ ៥១៤,៨ ម៉ែត្រការ៉េ ជាន់ទី១មានទំហំ ៣ ៥១៤,៨ ម៉ែត្រការ៉េ និងជាន់ទី២ មានទំហំ ៣ ៥១៤,៨ ម៉ែត្រការ៉េ ស្មើនឹងទំហំសរុប ១០ ៥៤៤,៤ ម៉ែត្រការ៉េ ២) អគារខាងឆ្វេង ចំនួន ០១ខ្នង មាន០២ជាន់ ដែលជាន់ផ្ទាល់ដីមានទំហំ ៥០០ម៉ែត្រការ៉េ និងជាន់ទី១មាន ទំហំ ៥០០ ម៉ែត្រការ៉េ ស្មើនឹងទំហំសរុប ១ ០០០ ម៉ែត្រការ៉េ ៣) អគារខាងស្តាំចំនួន០១ខ្នង មាន០២ជាន់ ដែលជាន់ផ្ទាល់ដីមានទំហំ៥០០ម៉ែត្រការ៉េ និងជាន់ទី១ មានទំហំ៥០០ម៉ែត្រការ៉េ ស្មើនឹងទំហំសរុប ១ ០០០ ម៉ែត្រការ៉េ។ មន្ទីរពេទ្យដែលសាងសង់លើផ្ទៃដីប្រមាណ ១,៣ហិចតា នេះ ដែលអាចផ្ទុកគ្រែអ្នកជំងឺបាន ចំនួន ១៥០ គ្រែ បំពាក់ដោយម៉ាស៊ីនត្រជាក់ សម្ភារបរិក្ខារពេទ្យ និងឧបករណ៍បច្ចេកទេសទំនើបៗបម្រើឱ្យការព្យាបាល ។មន្ទីរពេទ្យនេះ គ្រោងចំណាយថវិកាសរុបទាំងអស់ប្រមាណ១០លានដុល្លារសហរដ្ឋអាមេរិកក្នុងនោះការសាងសង់រចនាសម្ព័ន្ធអគារមន្ទីរពេទ្យគ្រោងចំណាយទឹកប្រាក់ប្រមាណ៦លាន២សែនដុល្លារសហរដ្ឋអាមេរិក និងការបំពាក់សម្ភារបរិក្ខារពេទ្យគ្រោងចំណាយទឹកប្រាក់ពី៤ទៅ ៥លានដុល្លារសហរដ្ឋអាមេរិកថែមទៀត។ មន្ទីរពេទ្យនេះ គ្រោងប្រើពេលសាងសង់ចំនួន១២ខែ ចាប់ផ្តើមពីខែមករា ឆ្នាំ២០២២ និងគ្រោងបញ្ចប់ ការសាងសង់នៅខែធ្នូ ឆ្នាំ២០២២៕