កិច្ចប្រជុំតាមរយៈប្រព័ន្ធវីដេអូពីចម្ងាយ បើកវគ្គចុះប្រមូលព័ត៌មានដើម្បីរៀបចំផែនការសវនកម្ម និងធ្វើ សវនកម្មលើរបាយការណ៍ហិរញ្ញវត្ថុ របស់ក្រសួងសាធារណការ និងដឹកជញ្ជូន សម្រាប់ការិយបរិច្ឆេទ ២០២១ ដឹកនាំដោយឯកឧត្តម ប៉េង ពោធិ៍នា រដ្ឋលេខាធិការ ថ្ងៃសុក្រ ៣កើត ខែមាឃ ឆ្នាំឆ្លូវ ត្រីស័ក ព.ស. ២៥៦៥ ត្រូវនិងថ្ងៃទី៤ ខែកុម្ភៈ ឆ្នាំ២០២២ នៅទីស្ដីការ ក្រសួង ឯកឧត្តម ប៉េង ពោធិ៍នា រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំ កិច្ចប្រជុំតាមរយៈប្រព័ន្ធវីដេអូពីចម្ងាយ បើកវគ្គចុះប្រមូលព័ត៌មានដើម្បីរៀបចំផែនការសវនកម្ម និងធ្វើ សវនកម្មលើរបាយការណ៍ហិរញ្ញវត្ថុ របស់ក្រសួងសាធារណការ និងដឹកជញ្ជូន សម្រាប់ការិយបរិច្ឆេទ ២០២១ ដោយមានការចូលរួមពីថ្នាក់ដឹកនាំក្រសួងទទួលបន្ទុក ប្រតិភូអាជ្ញាធរសវនកម្មជាតិ ក្រុមការងារជំនាញ មន្ត្រីអង្គភាពក្រោមឱវាទក្រសួង និងភាគីពាក់ព័ន្ធផងដែរ។ កិច្ចប្រជុំនេះរៀបចំឡើងដើម្បីពិភាក្សាលើការរៀបចំការធ្វើសវនកម្ម ការរៀបចំកម្មវិធីចុះធ្វើសវនកម្មរបាយ ការណ៍ហិរញ្ញវត្ថុ និងកំណែទម្រង់ហិរញ្ញវត្ថុសាធារណៈនៅក្រសួងសាធារណការ និងដឹកជញ្ជូន រួមមាន៖ របាយការណ៍ចំណូល របាយការណ៍ចំណាយ របាយការណ៍ផ្គូផ្គងថវិកាជាតិ សំដៅធ្វើឱ្យប្រព័ន្ធគ្រប់គ្រង ក្រសួងទាំងមូលប្រព្រឹត្តទៅតាមនិយាម និងបទដ្ឋានគតិយុត្តជាតិ ក៏ដូចជាដើម្បីធានាឱ្យបាននូវប្រសិទ្ធ ភាពការងារខ្ពស់តាមគោលនយោបាយ និងចក្ខុវិស័យរបស់រាជរដ្ឋាភិបាលដែលបានកំណត់។ ជាកិច្ចចាប់ផ្តើម ឯកឧត្តមរដ្ឋលេខាធិការមានមតិស្វាគមន៍ចំពោះគណៈប្រតិភូអាជ្ញាធរសវនកម្មជាតិក្នុង ការចុះធ្វើសវនកម្ម និងរបាយការណ៏ហិរញ្ញវត្ថុរបស់ក្រសួងសាធារណការ និងដឹកជញ្ជូន និងបានមាន ប្រសាសន៍ថា៖ ការធ្វើសវនកម្មសម្រាប់ក្រសួងសាធារណការ និងដឹកជញ្ជូន ជាកិច្ចការមួយដ៏សំខាន់ ដែលអាជ្ញាធរសវនកម្មជាតិត្រូវធ្វើរបាយការណ៍ជូនដល់រាជរដ្ឋាភិបាល រដ្ឋសភា និងព្រឹទ្ធសភា។ ឯកឧត្តមរដ្ឋលេខាធិការ បានបន្ថែមថា៖ ការចុះធ្វើសវនកម្មជាតិនេះស្របទៅនឹងគោលដៅរបស់រាជរដ្ឋាភិបាលដែលបានដាក់ចេញនៅក្នុងឆ្នាំ២០២២នេះ និងជាការធ្វើកំណែទម្រង់ហិរញ្ញវត្ថុសាធារណៈ ដើម្បី ធានាប្រសិទ្ធភាពនៃការប្រើប្រាស់ថវិកាជាតិ ស្របតាមយុទ្ធសាស្រ្តចតុកោណទីបួនរបស់រាជរដ្ឋាភិបាល ផងដែរ។ ឯកឧត្តមរដ្ឋលេខាធិការ បានថ្លែងអំណរគុណយ៉ាងជ្រាលជ្រៅដល់គណៈប្រតិភូអាជ្ញាធរសវនកម្មជាតិ ដែលបានចំណាយពេលវេលាដ៏មមាញឹក ដើម្បីមកធ្វើសវនកម្មនៅក្រសួង និងជួយបំពេញចំណុចខ្វះខាតមួយចំនួន ក៏ដូចជាផ្ដល់អនុសាសន៍ល្អៗ ដែលជាឈ្នាន់ក្នុងការអភិវឌ្ឍខ្លួនឱ្យកាន់តែល្អប្រពៃថែមទៀត៕