ឯ.ឧ ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណ ការ និងដឹកជញ្ជូន ស្នើឲ្យមន្ត្រីរាជការទាំងអស់ ឱ្យធ្វើជាគំរូគោរពច្បាប់ចរាចរណ៍ ក្នុងការបើកបរ និងជួយអប់រំសាច់ ញាតិ ដើម្បីឆ្ពោះទៅការកាត់បន្ថយអត្រាគ្រោះថ្នាក់ចរាចរណ៍។ ក្នុងពិធីសំណេះសំណាល និងប្រគល់មួកសុវត្ថិភាពជាងមួយពាន់មួកជូនមន្ត្រីរាជការក្រសួងសាធារណការ និងដឹកជញ្ជូន ដែលធ្វើដំណើរដោយម៉ូតូ នៅព្រឹកថ្ងៃទី០២ ខែកុម្ភៈនេះ ឯ.ឧ ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូន បានណែនាំឱ្យមន្ត្រីរាជការក្រសួង ត្រូវគោរព ច្បាប់ចរាចរណ៍ឱ្យបានខ្ជាប់ខ្ជួន ពាក់មួកសុវត្ថិភាពឱ្យ បានត្រឹមត្រូវ វ៉ាជែងដោយប្រុងប្រយ័ត្ន និងកុំបើកបរលើសល្បឿនកំណត់ដោយច្បាប់ និងជួយផ្សព្វផ្សាយ បន្តច្បាប់ចរាចរណ៍ផ្លូវគោកទៅកាន់ប្រជាពលរដ្ឋឱ្យបានយល់ដឹងទូលំទូលាយថែមទៀត។ ឯកឧត្តមទេសរដ្ឋមន្ត្រី បានកត់សម្គាល់ថា តាមការសិក្សារបស់កម្មវិធី អភិវឌ្ឍន៍សហប្រជាជាតិ (UNDP) បង្ហាញថាផលប៉ះពាល់និងការខាតបង់ផ្នែកសេដ្ឋកិច្ចក្នុងមួយឆ្នាំ ដោយសារគ្រោះថ្នាក់ចរាចរណ៍រួមមាន ចំណាយលើមន្ទីរពេទ្យ ទ្រព្យសម្បត្តិឯកជន ទ្រព្យសម្បត្តិជាតិ បានកើនឡើងដល់៤៥០លានដុល្លារអាមេរិកហើយ ដែលបញ្ហានេះជាការខាតបង់ដ៏ធំធេងសម្រាប់ប្រទេស ជាតិ ។ លោកជំទាវ មឹន មាណវី រដ្ឋលេខាធិការក្រសួងសាធារណការ និង ដឹកជញ្ជូន និងជាអគ្គលេខាធិការ គណៈកម្មាធិការជាតិសុវត្ថិភាពចរាចរណ៍ផ្លូវគោក បានគូសបញ្ជាក់ថា ក្នុងអត្រាគ្រោះថ្នាក់ចរាចរណ៍១០០ករណី មានអ្នកជិះម៉ូតូ៧០ភាគ រយ ហើយអ្នកអត់ពាក់មួកសុវត្ថិភាពរហូតដល់ទៅ៧៥ ករណី។ មូលហេតុដែលនាំឱ្យកើតគ្រោះថ្នាក់ចរាចរណ៍ គឺបណ្តាលមកពីការបើកបរលើសល្បឿនកំណត់ ការមិនគោរពសិទ្ធិអាទិភាព ការបត់ និងវ៉ាជែងដោយប្រថុយប្រថាន ការមិនប្រកាន់ស្តាំ ស្រវឹង បច្ចេកទេសយានយន្ត និងងងុយ។ របាយការណ៍បានបង្ហាញថា ពេញមួយឆ្នាំ២០២១ គ្រោះ ថ្នាក់ចរាចរណ៍កើតមាន ២,៦៧០លើក។ គ្រោះថ្នាក់នេះថយចុះប្រមាណ១៦ភាគរយ បើប្រៀបធៀបនឹងឆ្នាំ២០២០ ដែលមានចំនួន៣,១៧៦លើក។ ក្នងនោះ អ្នកស្លាប់បាត់ បង់ជីវិតមានចំនួន ១,៤៩៧ នាក់ ថយចុះប្រមាណ៩ ភាគ រយ បើប្រៀបធៀបនឹងឆ្នាំ២០២០ ដែលមានអ្នកស្លាប់ចំនួន ១,៦៤៦នាក់៕ អត្ថបទ សំ វណ្ណា