កិច្ចប្រជុំពិនិត្យវឌ្ឍនភាពប្រចាំខែធ្នូ នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យក្រោមហិរញ្ញប្បទានឥណទានរបស់ធនាគារពិភពលោក (World Bank) ត្រូវបានដឹកនាំដោយឯកឧត្តម កឹម បូរី អនុរដ្ឋលេខាធិការ ថ្ងៃព្រហស្បតិ៍ ១១រោច ខែមិគសិរ ឆ្នាំឆ្លូវ ត្រីស័ក ព.ស. ២៥៦៥ ត្រូវថ្ងៃទី៣០ ខែធ្នូ ឆ្នាំ២០២១ នៅទីស្ដីការ ក្រសួង ឯកឧត្តម កឹម បូរី អនុរដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញដឹកនាំកិច្ច ប្រជុំពិនិត្យវឌ្ឍនភាពប្រចាំខែ នៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យក្រោមហិរញ្ញប្បទានឥណទានរបស់ធនាគារពិភពលោក (World Bank) ដោយមានការអញ្ជើញចូលរួមពីថ្នាក់ដឹកនាំ ក្រសួងទទួលបន្ទុក មន្ត្រីជំនាញ ក្រុមការងារបច្ចេកទេស ទីប្រឹក្សាគម្រោង និងភាគីពាក់ព័ន្ធផងដែរ។ អង្គប្រជុំបានពិភាក្សាលម្អិតទៅលើវឌ្ឈនភាពការងារស៊ីវិល (MPWT-CWs) ការងារទីប្រឹក្សាជាលក្ខណៈ បុគ្គល និងការងារទីប្រឹក្សាជាលក្ខណៈក្រុមហ៊ុន (MPWT-CSs) ការផ្គត់ផ្គង់សម្ភារៈឧបករណ៍បម្រើឱ្យ គម្រោង (MPWT-Gs) ។ ចំពោះកញ្ចប់គម្រោងកែលម្អស្ថានីយប្រព្រឹត្តិកម្មទឹកកខ្វក់ហៅកាត់ថា៖ MPWT-CW4 និងកញ្ចប់ការងារទីប្រឹក្សាគម្រោងហៅកាត់ថា៖ MPWT-CS5 លើការរៀបចំគោលនយោ បាយជាយុទ្ធសាស្ត្រ ដើម្បីកំណត់តម្លៃទឹកកខ្វក់បញ្ចូលគ្នាជាមួយនឹងវិក័យបត្រទឹកស្អាត ទទួលបានគោលការណ៍ឯកភាពពីថ្នាក់ដឹកនាំក្រសួងរួចហើយ និងកំពុងតែអនុវត្តនូវកិច្ចសន្យា។ ជាមួយគ្នានោះផងដែរ អង្គប្រជុំបានពិភាក្សាលើកញ្ចប់ការងារមួយចំនួនផ្សេងទៀតទាក់ទងនឹងការជ្រើសរើសក្រុមហ៊ុនសម្រាប់ការសិក្សា-ត្រួតពិនិត្យ (MPWT-CS1A) និងក្រុមហ៊ុនសាងសង់បណ្តាញលូខ្នែង ខ្នែងរង (MPWT-CW1A) ហើយសង្ឃឹមថានៅដើមខែមីនា ឆ្នាំ២០២២ ខាងមុខ ក្រសួងនឹងចាប់ ផ្ដើមអនុវត្តគម្រោងសាងសង់បណ្តាញលូតភ្ជាប់ចេញពីលំនៅដ្ឋាន ហាងអាជីវកម្ម របស់បងប្អូនប្រជាពលរដ្ឋ អាជីវករនៅក្រុងសៀមរាប ខេត្តសៀមរាប។ ជាមួយគ្នានោះផងដែរ ឯកឧត្តមអនុរដ្ឋលេខាធិការ បានគូសបញ្ជាក់អំពីការបង្វែរទិសដៅនៃគម្រោងនៅបណ្តាញខ្សែផ្លូវមួយចំនួនឋិតក្នុងគម្រោងសាងសង់ផ្លូវ៣៨ខ្សែ ដោយសារការយកចិត្តទុកដាក់គិតគូរ និងទឹកចិត្តដ៏ថ្លៃថ្លាពីសំណាក់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការជួយសម្រួលដល់ការតភ្ជាប់ប្រព័ន្ធលូទឹកភ្លៀង និងទឹកកខ្វក់ពីខ្នងផ្ទះរបស់ប្រជាពលរដ្ឋមកកាន់ប្រព័ន្ធលូមេដោយឥតគិតថ្លៃ៕