ក្រសួងសាធារណការនិងដឹកជញ្ជូន មានគម្រោងដំឡើងស្ថានីយ៍សាកអាគុយរថយន្ត ដើរដោយប្រព័ន្ធអគ្គិសនីដំបូងគេ នៅខេត្តសៀមរាប និងបាត់ដំបង ក្នុងពេលឆាប់ៗ បន្ទាប់ពីមានការចុះសិក្សាពីទីតាំងនៅក្នុងខេត្តទាំងពីរនេះ។ កាលពីពាក់កណ្ដាលខែវិច្ឆិកា លោក ឈួន វ៉ន់ អគ្គនាយកនៃអគ្គនាយក ដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូន បានចុះសិក្សាលទ្ធភាពដំឡើងទីតាំងស្ថានីយសាករថយន្តអគ្គិសនីនៅខេត្តបាត់ដំបង និងសៀមរាប។ លោក ហ៊ាង សុទ្ធាយុត្តិ មន្រ្តីនាំពាក្យក្រសួងសាធារណការ បានប្រាប់សារព័ត៌មានខ្មែរណាស់នៅថ្ងៃទី១៨ធ្នូនេះថា គម្រោងដំឡើងស្ថានីយ៍នេះ មិនទាន់អាចកំណត់ពេលបាននៅឡើយ ដោយរង់ចាំការពិភាក្សាពីគ្រប់ក្រសួងដែលពាក់ព័ន្ធសិន ហើយតាមគម្រោង នឹងអាចដំឡើង ក្នុងមួយខេត្តពី ២ទៅ៣ស្ថានីយ៍។ លោកបន្តថា ចំពោះការប្រើប្រាស់ឬសាករថយន្តនេះ អាចនឹងត្រូវគិតប្រាក់ ប៉ុន្តែមិនគិតក្នុងតម្លៃខ្ពស់ខ្លាំងនោះទេ ព្រោះរដ្ឋក៏ត្រូវចំណាយលើថ្លៃអគ្គិសនីដែរ។ លោកបន្តថា៖«ធម្មតា ការសាកយើងត្រូវតែគិត ប៉ុន្តែអាចគិត បើសិនជា សា្ថនីយ៍ដែលរដ្ឋជាអ្នកគ្រប់គ្រងជាការសាកល្បង យើងនឹងគិតតម្លៃមួយ ធូរថ្លៃ អានេះជាទស្សនៈខ្ញុំផ្ទាល់។ ប៉ុន្តែ ការសម្រេចរបស់ថ្នាក់ដឹកនាំយ៉ាងណា យើងមិនទាន់ដឹងទេ។ ព្រោះអីអគ្គិសនីវាជារបស់មួយដែលត្រូវចំណាយថវិកា វាមិនមែនជារបស់មួយដែលយើងយកមកបំពាក់ហើយ អស់តែថ្លៃដើមនោះទេ វាត្រូវមានថ្លៃOperation របស់វា»។ អ្នកនាំពាក្យដដែលក៏បានលើកទឹកចិត្តឱ្យពលរដ្ឋ ជាពិសេសអ្នកដែលមានធនធាន គួរងាកមកប្រើប្រាស់រថយន្តដើរដោយអគ្គិសនីនេះវិញ ដើម្បីជាចំណែកក្នុងការកាត់បន្ថយផ្សែងកាបូនចូលទៅក្នុងបរិយាកាស និងជាការចូលរួមមួយផ្នែកនៃការកាត់បន្ថយកម្ដៅផែនដី។ កាលពីថ្ងៃទី០៤ វិច្ឆិកាកន្លងទៅ លោក Pablo Kang ឯកអគ្គរដ្ឋទូតអូស្ត្រាលីប្រចាំកម្ពុជា លោកស្រី Tina Redshaw ឯកអគ្គរដ្ឋទូតអង់គ្លេសប្រចាំកម្ពុជា លោកកែវ រតនៈ អគ្គនាយកអគ្គិសនីកម្ពុជា បានជួបពិភាក្សាលើសារៈប្រយោជន៍នៃការប្រើប្រាស់រថយន្តដើរដោយថាមពលអគ្គិសនី និងស្តីអំពីអនាគតនៃយានយន្តអគ្គិសនីនៅប្រទេសកម្ពុជា ដើម្បីចូលរួមជួយកាត់បន្ថយការបំភាយឧស្ម័នកាបូនិចក្នុងទៅបរិយាកាសផែនដី៕