នាព្រឹកថ្ងៃអង្គារ ១០កើត ខែកក្តិត ឆ្នាំឆ្លូវ ត្រីស័ក ពស ២៥៦៥ ត្រូវនឹងថ្ងៃទី១៤ ខែធ្នូ ឆ្នាំ២០២១ នាវិទ្យាល័យមិត្តភាពកម្ពុជា-ជប៉ុន កំពតក្រុង ខេត្តកំពត ដោយមានការចាត់តាំងពី ឯកឧត្តម ហឿន សំនៀង នាយកវិទ្យាស្ថាន, លោក ប្រាងហង្ស សេរីរិទ្ធ នាយករងវិទ្យាស្ថានតេជោសែន សាធារណការ និងដឹកជញ្ជូន និង លោកស្រី ប្រសើរ ម៉ូលីកា ប្រធាននាយកដ្ឋានបណ្តុះបណ្តាល និងវិក្រឹតការ តំណាងរបស់ឯកឧត្តមនាយកវិទ្យាស្ថានផ្ទាល់ បានអញ្ជើញជាអធិបតី ក្នុងសិក្ខាសាលាតម្រង់ទិសជំនាញសិក្សារបស់វិទ្យាស្ថានតេជោសែន សាធារណការ និងដឹកជញ្ជូន សម្រាប់សិស្សានុសិស្ស ថ្នាក់ទី១២ នៃវិទ្យាល័យ មិត្តភាពកម្ពុជា-ជប៉ុន កំពតក្រុង និងវិទ្យាល័យព្រះរាជសម្ភារ នៅខេត្តកំពត និងមានការអញ្ជើញចូលរួមពី លោកតំណាងមន្ទីរអប់រំ យុវជន និងកីឡាខេត្តកំពត, ក្រុមការងារវិទ្យាស្ថានតេជោសែន លោក លោកស្រី នាយកវិទ្យាល័យទាំងពីរ លោកគ្រូ អ្នកគ្រូ សិស្សានុសិស្សមួយចំនួនទៀត។ កម្មវិធីនេះមានគោលបំណង ផ្សព្វផ្សាយ ចែករំលែកព័ត៌មាន តម្រង់ទិសជំនាញសិក្សា អត្ថប្រយោជន៍ ឱកាសការងារ ក្នុុងវិស័យសាធារណការ និងដឹកជញ្ជូន ជូនដល់សិស្សានុសិស្សនៅវិទ្យាល័យ ទាំង២ នៅ ខេត្តកំពត ដែលជានិស្សិតគោលដៅសម្រាប់ការចុះឈ្មោះប្រឡងចូលរៀននៅវិទ្យាស្ថានសម្រាប់ឆ្នាំសិក្សាថ្មី។ គួរបញ្ជាក់ផងដែរថា ជំនាញទាំង៦របស់វិទ្យាស្ថានសុទ្ធសឹងជាជំនាញចាំបាច់ ដែលនឹងបណ្តុះបណ្តាលនិស្សិតឱ្យមានជំនាញច្បាស់លាស់ក្លាយជាធនធានមនុស្សពោរពេញដោយសក្តានុពល នឹងអាចទទួលបានឱកាសការងារជាច្រើនក្នុងតំបន់សមុទ្រនៃទិសនីរតី ដែលរួមមានឱកាសការងារនៅកំពង់ផែ និងតំបន់សេដ្ឋកិច្ចពិសេស ដើម្បីរួមចំណែកអភិវឌ្ឍសេដ្ឋកិច្ចជាតិ។ វិទ្យាស្ថានតេជោសែន សាធារណការ និងដឹកជញ្ជូន គ្រោងនឹងបើកទទួលនិស្សិតជំនាន់ទី២ នាខែមករា ឆ្នាំ២០២២ ខាងមុននេះលើជំនាញឯកទេសទាំង៦ ក្នុងនោះរួមមាន៖ ១) ជំនាញសំណង់ផ្លូវថ្នល់ ផ្លូវល្បឿនលឿន ស្ពាន ផ្លូវដែក និងកំពង់ផែ ២) ជំនាញប្រព័ន្ធចម្រោះទឹកកខ្វក់ ៣) ជំនាញសេដ្ឋកិច្ច និងគ្រប់គ្រងដឹកជញ្ជូនផ្លូវគោក ៤) ជំនាញគ្រប់គ្រងភស្តុភារកម្ម និងខ្សែច្រវ៉ាក់ផ្គត់ផ្គង់ ៥) ជំនាញបើកបរនាវា ៦) ជំនាញម៉ាស៊ីននាវា