ផ្លូវក្រវ៉ាត់ក្រុងទី៤ ត្រូវបានសិក្សាចប់សព្វគ្រប់នៅក្នុងឆ្នាំ២០២០ បន្ទាប់ពីការសិក្សានេះបានដំណើរអស់រយៈពេលប្រមាណ ២ ឆ្នាំ ពោលគឺបានចាប់ផ្ដើមតាំងពីឆ្នាំ២០១៨ មកម្ល៉េះ។ យ៉ាងណាតាមការសិក្សាគម្រោងផ្លូវក្រវ៉ាត់ក្រុងទី៤ នេះគឺនឹងត្រូវសាងសង់ឆ្លងកាត់ខេត្ដចំនួន ៤ ដែលមានដូចជា កណ្ដាល កំពង់ស្ពឺ តាកែវ និងខេត្តព្រៃវែង ដោយក្នុងនោះកាត់ខេត្តកំពង់ស្ពីចំនួន៣ស្រុក ខេត្តតាកែវចំនួន១ស្រុក ខេត្តកណ្តាល៨ស្រុក និងខេត្តព្រៃវែង២ស្រុកផងដែរ។ ចំណុចដែលសំខាន់ នៃការសាងសង់ផ្លូវក្រវាត់ក្រុងទី៤នេះ គឺដើម្បីចូលរួមចំណែកកាត់បន្ថយការកក់ស្ទះចរាចរណ៍ និងជួយសម្រួលដល់ការដឹកជញ្ជូនទំនិញរបស់បងប្អូនប្រជាពលរដ្ឋ ទៅកាន់ផ្លូវជាតិផ្សេងៗ និងទៅកាន់ព្រំដែនប្រទេសវៀតណាម និងប្រទេសថៃ បានកាន់តែលឿន ចំណេញពេលវេលា កាត់បន្ថយការចំណាយបានមួយកំរិតទៀត។ សូមជម្រាបថាមកដល់ពេលនេះកម្ពុជាមានក្រវ៉ាក់ក្រុងសំខាន់ៗរួមមាន៖១. ផ្លូវក្រវ៉ាត់ក្រុងទី១ ផ្លូវក្រវ៉ាត់ក្រុងទី១ ជាផ្លូវក្រវ៉ាត់ដំបូងគេនៅរាជធានីភ្នំពេញ បានសាងសង់ឡើងតាំងពីសម័យសង្គមរាស្រ្តនិយម នៅក្នុងទីតាំងខណ្ឌចំនួន៤ មានខណ្ឌដូនពេញ ខណ្ឌ៧មករា ខណ្ឌចំការមន និងខណ្ឌទួលគោក។ ផ្លូវនេះតភ្ជាប់ពីគីឡូម៉ែត្រលេខ៩ (ផ្លូវជាតិលេខ៥) ភ្ជាប់ផ្លូវសុផារ៉ា និងផ្លូវ ៥៩៨ ត្រលោកបែក ទៅផ្លូវ ២៧១ រហូតដល់គល់ស្ពានច្បារអំពៅ តភ្ជាប់ជាមួយផ្លូវជាតិលេខ១។ ២. ក្រវ៉ាត់ក្រុងទី២ ផ្លូវក្រវ៉ាត់ក្រុងទី២ បានសាងសង់កាលពីឆ្នាំ ២០១៦ ដោយមាន២កំណាត់ ប្រវែងសរុបជាង ២៧គីឡូម៉ែត្រ។ កំណាត់ទី១ មានប្រវែង ១០គីឡូម៉ែត្រ តភ្ជាប់ពីផ្លូវទំនប់កប់ស្រូវ (ឬផ្លូវ១២០K) ឆ្ពោះទៅកាន់មហាវិថីសហព័ន្ធរុស្សី។ កំណាត់ទី២ ប្រវែង ១៧គីឡូម៉ែត្រ តភ្ជាប់ពីមហាវិថីសហព័ន្ធរុស្ស៊ី (ត្រង់ស្តុបផ្សារដីហុយ) ទៅផ្លូវលេខ ១០១៩ កាត់តាមផ្លូវណ័រប្រ៊ីត ផ្លូវទ្រុងមាន់ ផ្លូវមុខរោងចក្រអគ្គិសនី ផ្លូវមុខសហគមន៍អន្លង់គង ផ្លូវទំនប់ ៧មករា ផ្លូវ ៦០ម៉ែត្រ ហៅមហាវិថីតេជោ តភ្ជាប់ទៅផ្លូវជាតិលេខ២ ត្រង់ចំណុចគល់ស្ពានព្រែកហូរផ្នែកខាងជើង ភ្ជាប់ស្ពានព្រែកសំរោងតាខ្មៅ។ ៣. ក្រវ៉ាត់ក្រុងទី៣ ក្រវ៉ាត់ក្រុងទី៣ ជាផ្លូវថ្មីដែលតភ្ជាប់ផ្លូវជាតិសំខាន់ៗរបស់ប្រទេសកម្ពុជា ដោយចាប់ពីស្ពានព្រែកព្នៅ នៅផ្លូវជាតិលេខ៥ ឆ្លងមកផ្លូវជាតិលេខ៤ (កំណាត់ផ្លូវនេះបានសាងសង់រួចរាល់ហើយ ដោយសាលារាជធានីភ្នំពេញ) ភ្ជាប់មកផ្លូវជាតិលេខ៣ ផ្លូវជាតិលេខ២ ផ្លូវជាតិលេខ២១ និងផ្លូវជាតិលេខ១ ភ្ជាប់មកកំពង់ផែភ្នំពេញថ្មី។ ខណៈបច្ចុប្បន្នផ្លូវក្រវ៉ាត់ក្រុងនេះបានសាងសង់រួចជាងពាក់កណ្ដាលហើយ។ ក្នុងនោះតាមការបញ្ជាក់ពីឯកឧត្ដម ស៊ុន ចាន់ថុល បានឱ្យដឹងក្នុងកម្មវិធីផ្សាយផ្ទាល់ពិសេសកាលថ្ងៃទី ៣០ ខែសីហា ឆ្នាំ២០២១ កន្លងទៅនេះថា៖ ផ្លូវក្រវាត់ក្រុងទី ៣ ដែលបានសាងសង់សម្រេចបានពាក់កណ្តាលទៅហើយនោះ ចាំបាច់ត្រូវតែមានការសាងសង់ស្ពានកាត់ទន្លេពីរទៀត ដើម្បីតភ្ជាប់កំណាត់ផ្លូវនេះឲ្យបានពេញលេញ។ ដើម្បីឲ្យផ្លូវក្រវាត់នេះពេញលេញ ត្រូវសិក្សាក្នុងការសាងសង់ស្ពានកាត់ទន្លេពីរទៀត នៅត្រើយខាងកើតទន្លេមេគង្គគឺនៅក្តីតាកុយ និងនៅកោះដាច់ ដើម្បីតភ្ជាប់ចរាចរណ៍ឲ្យក្លាយជាផ្លូវក្រវាត់ក្រុងពេញលេញ៕