កិច្ចប្រជុំពិភាក្សាស្តីពីវឌ្ឍនភាពការងារ របស់គណៈកម្មការអន្តរក្រសួងគ្រប់គ្រងការលក់លេខចុះបញ្ជី រថយន្ត សម្រាប់រៀបចំរបាយការណ៍សន្និបាតឆ្នាំ២០២១ និងលើកទិសដៅការងារបន្តឆ្នាំ២០២២ ត្រូវបានដឹកនាំដោយលោកជំទាវរដ្ឋលេខាធិការ កុយ សុដានី ប្រធានគណៈកម្មការរអន្តរក្រសួង ថៃ្ងអង្គារ ៣កើត ខែមិគសិរ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី៧ ខែធ្នូ ឆ្នាំ២០២១ នៅទីស្តីការ ក្រសួង លោកជំទាវ កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន និងជាប្រធាន គណៈកម្មការអន្តរក្រសួងគ្រប់គ្រងការលក់លេខចុះបញ្ជីរថយន្ត បានអញ្ជើញដឹកនាំកិច្ចប្រជុំពិភាក្សាស្តីពី វឌ្ឍនភាពការងាររបស់គណៈកម្មការអន្តរក្រសួងគ្រប់គ្រងការលក់លេខចុះបញ្ជីរថយន្តសម្រាប់រៀបចំរបាយការណ៍សន្និបាតឆ្នាំ២០២១ និងលើកទិសដៅការងារបន្តឆ្នាំ២០២២ ដោយមានការចូលរួមពីសមាជិក សមាជិកានៃគណៈកម្មការអន្តរក្រសួង។ កិច្ចប្រជុំនេះផ្តោតការពិភាក្សាលើរបៀបវារៈសំខាន់ៗរួមមាន៖ ការពិនិត្យកែសម្រួល ក៏ដូចជាផ្តល់ធាតុចូល បន្ថែមលើរបាយការណ៍វឌ្ឍនភាពការងាររបស់គណៈកម្មការអន្តរក្រសួងស្តីពីការគ្រប់គ្រងការចុះបញ្ជីរថយន្ត មុននឹងលើកយកទៅបង្ហាញជូនក្នុងសន្និបាតបូកសរុបការងារប្រចាំឆ្នាំ២០២១ និងលើកទិសដៅ ការងារឆ្នាំ២០២២របស់ក្រសួង ដែលគ្រោងនឹងប្រព្រឹត្តទៅនៅថ្ងៃទី២៦-២៧ ខែមករា ឆ្នាំ២០២២ និងការ ពិនិត្យពិភាក្សាលើការរៀបចំអនុស្សរណ:យោគយល់រវាងក្រសួងសាធារណការ និងដឹកជញ្ជូន និងក្រសួង ពាណិជ្ជកម្មស្តីពីការតភ្ជាប់ប្រព័ន្ធចុះបញ្ជីលេខពិសេសផ្ទាល់ខ្លួន។ ថ្លែងទៅកាន់អង្គប្រជុំនាឱកាសនោះ លោកជំទាវប្រធានអង្គប្រជុំ បានគូសបញ្ជាក់ពីនិន្នាការកើនឡើងនៃ ការទិញផ្លាកលេខពិសេស និងលេខពិសេសផ្ទាល់ខ្លួនពីសំណាក់បងប្អូនប្រជាពលរដ្ឋ ទោះបីស្ថិតក្នុង ស្ថានភាពនៃជំងឺកូវីដ-១៩ ក៏ដោយ និងបានប្តេជ្ញាបន្តធ្វើយ៉ាងណាជំរុញឱ្យការលក់លេខចុះបញ្ជីយានយន្តកាន់តែមានភាពល្អប្រសើរ និងកើនឡើងជាងមុន តាមរយៈការផ្សព្វផ្សាយនៅតាមបណ្ដាក្រុមហ៊ុនឯកជន។ លោកជំទាវរដ្ឋលេខាធិការ បានថ្លែងអំណរគុណ និងកោតសរសើរដល់សមាជិកសមាជិកាគណៈកម្មការអន្តរក្រសួងទាំងអស់ ដែលខិតខំប្រឹងប្រែង ក៏ដូចជាបានចូលរួមយកចិត្តទុកដាក់ធ្វើយ៉ាងណាឱ្យប្រព័ន្ធ លក់ផ្លាកលេខពិសេសរបស់យើងមានភាពរលូន ប្រសិទ្ធភាពខ្ពស់ និងបានទទួលការពេញចិត្តពីប្រជា ពលរដ្ឋ ជាពិសេសអនុគណៈកម្មការជំនាញទាំងពីរ ដែលបានខិតខំប្រឹងប្រែងឆ្លើយតបបានទាន់ពេល វេលាទៅនឹងបញ្ហាផ្សេងៗដែលប្រជាពលរដ្ឋបានលើកឡើង ប្រកបដោយស្មារតីទទួលខុសត្រូវខ្ពស់។ លោកជំទាវរដ្ឋលេខាធិការ ក៏បានស្នើផងដែរឱ្យក្រុមការងារពាក់ព័ន្ធរបស់គណៈកម្មការអន្តរក្រសួងពិនិត្យ និងជួយណែនាំបន្ថែមដល់មន្ត្រីក្រោមឱវាទរបស់ខ្លួន ជាពិសេស មន្ត្រីឈានមុខដែលកំពុងបម្រើសេវា ដោយផ្ទាល់ជាមួយប្រជាពលរដ្ឋ ធ្វើយ៉ាងណាឱ្យពួកគាត់បំពេញការងាររបស់ខ្លួនប្រកបដោយការទទួល ខុសត្រូវខ្ពស់ មានតម្លាភាព ប្រសិទ្ធភាព ច្បាស់លាស់ ឆាប់រហ័ស និងគ្មានការចំណាយក្រៅផ្លូវការ តាម អនុសាសន៍ណែនាំដ៏ខ្ពង់ខ្ពស់ពីឯកឧត្តមទេសរដ្ឋមន្ត្រី។ ជាមួយគ្នានោះផងដែរ លោកជំទាវប្រធានអង្គប្រជុំ បានណែនាំឱ្យអនុគណៈកម្មការផ្សព្វផ្សាយ និងផ្តល់ ជំនួយបច្ចេកទេស សហការជាមួយវិទ្យាស្ថានតេជោ សែន សាធារណការ និងដឹកជញ្ជូន ទាក់ទងនឹងការ បណ្តុះបណ្តាលក្រុមការងារបច្ចេកទេស ដេីម្បី ឱ្យកាន់ការងារ លេខពិសេស និងលេខពិសេសផ្ទាល់ខ្លួន កាន់តែមានប្រសិទ្ធភាព ក្នុងការឆ្លើយ តបនឹងទំហំការងារកាន់តែធំ ជាពិសេសអាចដោះស្រាយបញ្ហាប្រឈមនានាបានកាន់ តែប្រសើរឡើង ថែមទៀត។ សូមជម្រាបជូនថា៖ យោងតាមរបាយការណ៍របស់គណៈកម្មការអន្តរក្រសួងគ្រប់គ្រងការលក់លេខចុះ បញ្ជីរថយន្តបានឱ្យដឹងថា៖ ក្នុងរយៈពេល១១ខែ (កុម្ភៈ ដល់ វិច្ឆិកា) ឆ្នាំ២០២១ ក្រសួងសាធារណការ និងដឹកជញ្ជូន បានលក់ផ្លាកលេខពិសេសផ្ទាល់ខ្លួនបានចំនួន ៤៨០២ លេខ ទទួលបានចំណូល ថវិកាប្រមាណ ៣៤ ៥៦៧ ៣៥៣ ៣០០ រៀល និងលក់ផ្លាកលេខពិសេសរាជធានី-ខេត្តបាន ២៥៣៦៤ លេខ ទទួលបានចំណូលថវិកាប្រមាណ ២៧ ៣៥៨ ១៩៧ ២០០ រៀល ក្នុងរយៈពេល១១ខែ (មករា-វិច្ឆិកា) ឆ្នាំ២០២១៕