កណ្ដាល ថ្ងៃទី១៧ ខែវិច្ឆិកា ឆ្នាំ២០២១ -- លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកញ្ជូន និងជាអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោកបានអំពាវនាវដល់ប្រជាពលរដ្ឋ ពិសេសអ្នកប្រើប្រាស់ផ្លូវទាំងអស់ ត្រូវយកចិត្តទុកដាក់ចំពោះបញ្ហាគ្រោះថ្នាក់ចរាចរណ៍ ដូចករណីឆ្លងរាលដាលជំងឺកូវីដ១៩ ផងដែរ ដើម្បីធ្វើយ៉ាងណាកាត់បន្ថយការស្លាប់ដោយគ្រោះថ្នាក់ចរាចរណ៍នៅក្នុងប្រទេស។ ការអំពាវនាវនេះ ធ្វើឡើងក្នុងយុទ្ធនាការអប់រំផ្សព្វផ្សាយច្បាប់ និងសុវត្ថិភាពស្តីពីចរាចរណ៍ផ្លូវគោក មុនឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅតាមបណ្តោយផ្លូវជាតិលេខ ១ ក្បែរផ្សារគគីរ ស្ថិតក្នុងស្រុកកៀនស្វាយ ខេត្តកណ្តាល នាព្រឹកថ្ងៃទី១៧ ខែវិច្ឆិកា ឆ្នាំ២០២១។ លោកជំទាវ មឹន មាណវី បានថ្លែងថា គ្រោះថ្នាក់ចរាចរណ៍គ្មានថ្នាំបង្ការដូចជាជំងឺកូវីដ១៩នោះទេ ហើយប្រជាពលរដ្ឋ និងអ្នកប្រើប្រាស់ផ្លូវទាំងអស់ត្រូវយកចិត្តទុកដាក់ឱ្យបានខ្ពស់ ដើម្បីធ្វើយ៉ាងណា កាត់បន្ថយការស្លាប់ដោយសារគ្រោះថ្នាក់ចរាចរណ៍នៅក្នុងប្រទេសកម្ពុជា ខណៈជំងឺកូវីដ១៩ បានកាត់បន្ថយជាបន្តបន្ទាប់។ លោកជំទាវបានគូសបញ្ជាក់ថា ស្របពេលដែលស្ថានភាពជំងឺកូវីដ ១៩ នៅកម្ពុជា បាននិងកំពុងធូរស្បើយនោះ ចំនួនគ្រោះថ្នាក់ចរាចរណ៍ផ្លូវគោកមានកំណើនឡើងវិញ។ លោកជំទាវបានឱ្យដឹងថា ដើម្បីចូលរួមកាត់បន្ថយគ្រោះថ្នាក់ចរាចរណ៍ ក្នុងឱកាសបុណ្យព្រះរាជពិធីបុណ្យអុំទូកខាងមុខនេះ គណៈកម្មាធិការជាតិសុវត្ថិភាពចរាចរណ៍ផ្លូវគោក នឹងខិតខំធ្វើការផ្សព្វផ្សាយអប់រំអំពីសុវត្ថិភាពចរាចរណ៍នៅទូទាំងប្រទេស។ លោកជំទាវបានថ្លែងបញ្ជាក់ថា “យើងខិតខំផ្សព្វផ្សាយនៅតាមបណ្តាដងផ្លូវ ហើយការចែកមួកនឹងធ្វើតាមលទ្ធភាព ដែលមកដល់ពេលនេះ យើងបានធ្វើការចែកមួកនៅក្នុងមួយខេត្តបានប្រមាណ ១ ០០០ មួក ដែលនៅទូទាំងប្រទេសបានចែកមួកប្រមាណជាង២ម៉ឺនមួកហើយ”។ ជាមួយគ្នានេះដែរ លោកជំទាវបានលើកឡើងថា ការផ្សព្វផ្សាយសុវត្ថិភាពចរាចរណ៍នេះដោយសារតែការបើកដំណើរការប្រទេសឡើងវិញរបស់រាជរដ្ឋាភិបាល បន្ទាប់ពីជំងឺកូវីដ១៩បានធូរស្រាល ហើយក៏ធ្វើឱ្យមានការមមាញឹកចំពោះចរាចរណ៍នេះផងដែរ។ លោកជំទាវរដ្ឋលេខាធិការក៏បានអំពាវនាវដល់អ្នកធ្វើដំណើរទាំងម៉ូតូ រថយន្ដ កង់ និងអ្នកថ្មើរជើង ត្រូវមានការប្រុងប្រយ័ត្នក្នុងការបើកបរនាឱកាសបុណ្យអុំទូកនេះ ជាពិសេសបើកបរសូមកុំបើកបរលើសល្បឿនកំណត់ ក្នុងនោះត្រូវឈ្វេងយល់ពីសិទ្ធិអាទិភាពជាចាំបាច់ផងផដែរ។ លោកជំទាវបានបញ្ជាក់បន្ថែមថា “សូមមេត្តាយល់ថាផ្លូវណាឆ្វេង ផ្លូវណាស្តាំ ហើយយើងត្រូវប្រកាន់ស្តាំជានិច្ច កុំបត់ និងវ៉ាជែងក្នុងស្ថានភាពគ្រោះថ្នាក់ ហើយកុំពិសារ គ្រឿងស្រវឹងហើយទៅបើកបរ”។ លោកជំទាវរដ្ឋលេខាធិការក៏បានបានណែនាំសូមប្រុងប្រយ័ត្នទាំងកូវីដ១៩ ដោយត្រូវចងចាំថាពេលនិយាយថាកូវីដ១៩គឺត្រូវគិតដល់គ្រោះថ្នាក់ចរាចរណ៍ ហើយកូវីដ១៩ និងចរាចរណ៍គឺទៅជាមួយគ្នាពីព្រោះថាវាស្លាប់ដូចគ្នា។ លោកជំទាវបានសង្កត់ធ្ងន់ថា “កូវីដ១៩មានវ៉ាក់សាំងបង្ការ ប៉ុន្តែចរាចរណ៍គ្មានវ៉ាក់សាំង បង្ការទេមានតែខ្លួនយើងម្នាក់ៗប្រុងប្រយ័ត្នក្នុងពេលធ្វើចរាចរណ៍តាមដងផ្លូវ”។ លោកជំទាវក៏បានសំណូមពរឱ្យអ្នកប្រើប្រាស់យានជំនិះគ្រប់ប្រភេទត្រូវចូលរួមគោ រពច្បាប់ចរាចរណ៍ផ្លូវគោក មិនត្រូវបើកបរលើសល្បឿនកំណត់ ត្រូវគោរពសិទ្ធិអាទិភាពក្នុងពេលធ្វើដំណើរ ជាពិសេសត្រូវបើកបរយានទៅតាមគន្លងផ្លូវរបស់ខ្លួន ត្រូវពាក់មួកសុវត្ថិភាពនៅពេលធ្វើដំណើរតាមម៉ូតូដោយមិនគិតទីជិត ឬទីឆ្ងាយឡើយ។ ក្នុងឱកាសនោះដែរ លោកជំទាវ មឹន មាណវី ក៏បានឱ្យដឹងបន្ថែមថា នៅក្នុងឆ្នាំ២០២២ខាងមុខនេះ ក្រសួងសាធារណការ និងដឹកជញ្ជូនមានមួកសុវត្ថិភាពនៅសល់ ជាង១ម៉ឺនមួកទៀត ហើយក្រសួងបានណែនាំដល់មូលដ្ឋានទាំងអស់ធ្វើការផ្សព្វផ្សាយពីសុវត្ថិភាពចរាចរណ៍ដោយមានចែកមួកសុវត្ថិភាពតាមលទ្ធភាព។ លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក នៃអគ្គនាយកដ្ឋានដឹកជញ្ជូនផ្លូវគោក ក្រសួងសាធារណការ និងដឹកជញ្ជូន និងជាប្រធានផ្នែកអប់រំផ្សព្វផ្សាយ និងបណ្តុះបណ្តាល នៃអគ្គលេខាធិការដ្ឋាន គណៈកម្មាធិការជាតិសុវត្ថិភាពចរាចរណ៍ផ្លូវគោកបានឱ្យដឹងថា យុទ្ធនាការផ្សព្វផ្សាយសុវត្ថិភាពចរាចរណ៍នេះ នឹងធ្វើនៅទូទាំងរាជធានី ខេត្ដ ហើយធ្វើការផ្សព្វផ្សាយ អប់រំនៅតាមសាលារៀន តាមដងផ្លូវ និងផ្សារជាដើម។ លោកបានលើកឡើងថា គិតមកដល់ពេលនេះក្រសួងសាធារណការ និងដឹកជញ្ជូនបានចែកមួកសុវត្ថិភាពចរាចរណ៍បានប្រមាណជិត៩ម៉ឺនមួក ដែលតាមគម្រោង ត្រូវចែកប្រមាណ១០ម៉ឺនមួក៕