កិច្ចប្រជុំក្រុមប្រតិបត្តិការងារគណៈកម្មការគ្រប់គ្រងគម្រោងធ្វើឱ្យប្រសើរឡើងប្រព័ន្ធភស្តុភារកម្មកម្ពុជា ត្រូវបានដឹកនាំដោយលោកជំទាវរដ្ឋលេខាធិការ កុយ សុដានី ប្រធានក្រុមការងារ ដើម្បីពិនិត្យមើលវឌ្ឍនភាពការងារប្រចាំខែ ថ្ងៃពុធ ១៣កើត ខែកត្តិក ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី១៧ ខែវិច្ឆិកា ឆ្នាំ២០២១ នៅទីស្តីការក្រសួង លោកជំទាវ កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានក្រុមការងារ បានអញ្ជើញដឹកនាំកិច្ចប្រជុំក្រុមប្រតិបត្តិការងារគណៈកម្មការគ្រប់គ្រងគម្រោង (PMU) ដើម្បីពិនិត្យវឌ្ឍនភាពប្រចាំខែទាក់ទងនឹងការអនុវត្តគម្រោងធ្វើឱ្យប្រសើរឡើងប្រព័ន្ធភស្តុភារកម្មកម្ពុជា ដោយមានការចូលរួមពីថ្នាក់ដឹកនាំក្រសួងទទួលបន្ទុក ជំនាញការជប៉ុន និងភាគីពាក់ព័ន្ធតាមប្រព័ន្ធវីដេអូពីចម្ងាយ។ កិច្ចប្រជុំនេះធ្វើឡើងក្នុងគោលបំណង ដើម្បីស្ដាប់របាយការណ៍វឌ្ឍនភាពនៃការរៀបចំ (១) គោលនយោបាយភស្តុភារកម្ម (២) របាយការណ៍ប្រចាំឆ្នាំស្តីពីវឌ្ឍនភាពវិស័យភស្តុភារកម្ម និង(៣) ការអនុវត្តគម្រោងមួយចំនួនទាក់ទងនឹងការធ្វើឱ្យប្រសើរឡើងនូវប្រព័ន្ធភស្តុភារកម្មកម្ពុជានៅតាមច្រកទ្វារព្រំដែនអន្តរជាតិនានារវាង កម្ពុជា-ថៃ កម្ពុជា-វៀតណាម ពីក្រុមប្រតិបត្តិការងារគណៈកម្មការគ្រប់គ្រងគម្រោង (PMU)។ ថ្លែងក្នុងសន្ទរកថាបើកកិច្ចប្រជុំនាឱកាសនោះ លោកជំទាវរដ្ឋលេខាធិការ បានជំរុញលើកទឹកចិត្តឱ្យក្រុមប្រតិបត្តិការងារគណៈកម្មការគ្រប់គ្រងគម្រោង (PMU) ខិតខំប្រឹងប្រែងពន្លឿនការរៀបចំតាក់តែងគោលនយោបាយពាក់ព័ន្ធនឹងការដឹកជញ្ជូន និងភស្ភុភារកម្មឱ្យបានចប់សព្វគ្រប់នៅចុងឆ្នាំនេះ ដើម្បីដាក់ឆ្លងយោបល់ ក៏ដូចជាដើម្បីប្រមូលធាតុពីក្រសួង-ស្ថាប័នពាក់ព័ន្ធ សំដៅធ្វើយ៉ាងណាជំរុញឱ្យការអនុវត្តគម្រោងប្រព្រឹត្តទៅដោយរលូន បញ្ចប់តាមផែនការគ្រោងទុក និងបង្កលក្ខណៈងាយស្រួលដល់ការដឹកជញ្ជូនទំនិញឆ្លងកាត់ព្រំដែនបានឆាប់រហ័សគ្មានការកកស្ទះ៕