ភ្នំពេញ ថ្ងៃទី១៧ ខែ វិច្ឆិកា ឆ្នាំ ២០២១-- ឯកឧត្តម សូរ វ៉ិចទ័រ រដ្ឋលេខាធិការក្រសួងសាធារណការ និងដឹកជញ្ជូន តំណាងឯកឧត្តមទេសរដ្ឋមន្ត្រី ស៊ុន ចាន់ថុល បានអញ្ជើញជាអធិបតីក្នុងពិធីប្រគល់-ទទួលកំណល់ទ្រទំនិញ ដែលជាជំនួយអភិវឌ្ឍន៍ផ្លូវការរបស់រដ្ឋាភិបាល នៃសាធារណរដ្ឋកូរ៉េ តាមរយៈក្រសួងដែនដី ហេដ្ឋារចនាសម្ព័ន្ធ និងដឹកជញ្ជូន ជូនក្រសួងសាធារណការ និងដឹកជញ្ជូន នៃព្រះរាជាណាចក្រកម្ពុជា កាលពី ថ្ងៃ១២កើត ខែកត្តិក ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃអង្គារ ទី១៦ ខែវិច្ឆិកា ឆ្នាំ២០២១ នៅទីស្តីការក្រសួង។ នៅក្នុង ឱកាសនោះ ឯកឧត្តមរដ្ឋលេខាធិកា របានមានប្រសាសន៍ថា កំណល់ទ្រ ទំនិញចំនួន ២ ០០០ឈុត ដែលត្រូវប្រគល់ជូនក្រសួងសាធារណការ និងដឹកជញ្ជូន នាពេលនេះ គឺជាជំនួយអភិវឌ្ឍន៍ផ្លូវការ សម្រាប់គម្រោងផែនការមេ ភ័ស្តុភារកម្ម ស្តីពីការធ្វើទំនើបកម្មប្រព័ន្ធភ័ស្តុភារកម្ម និងប្រព័ន្ធកុំព្យូទ័រភ័ស្តុភារកម្ម និងត្រូវផ្ដល់ជូនទៅអង្គភាពពាក់ព័ន្ធក្រោមឱវាទក្រសួងដែលរួមមាន៖ កំពង់ផែស្វយ័តក្រុងព្រះសីហនុ, កំពង់ផែស្វយ័តភ្នំពេញ, និងតំបន់សេដ្ឋកិច្ចពិសេសប៉ោយប៉ែត-អូរនាង ដើម្បីប្រើប្រាស់នៅក្នុងឃ្លាំង ក៏ដូចជាដើម្បីចូលរួមក្នុងការសិក្សាអំពីការប្រើប្រាស់កំណល់ទ្រទំនិញស្តង់ដារ ក្រោមការត្រួតពិនិត្យរបស់ក្រសួង។ ជាមួយគ្នានេះដែរ ឯកឧត្តមរដ្ឋលេខាធិការបានគូសបញ្ជាក់ថា ការផ្ដល់កំណល់ទ្រទំនិញពីភាគីកូរ៉េនេះ គឺជាផ្នែកមួយនៃការសិក្សានៃគម្រោងផែនការមេកម្ពុជាឆ្នាំទី១ ស្តីពីការទំនើបកម្មប្រព័ន្ធភ័ស្តុភារកម្ម និងគម្រោងសាកល្បងនៃប្រព័ន្ធកុំព្យូទ័រភ័ស្តុភារកម្ម ដែលកំពុងត្រូវបានអនុវត្តន៍ដោយអគ្គនាយកដ្ឋានភ័ស្តុភារកម្ម ក្រសួងសាធារណការ និងដឹកជញ្ជូន ក្រោមការគាំទ្រពីក្រសួងដែនដី ហេដ្ឋារចនាសម្ព័ន្ធ និងដឹកជញ្ជូន នៃសាធារណរដ្ឋកូរ៉េ និងវិទ្យាស្ថានស្រាវជ្រាវកូរ៉េ KRIHS។ ទន្ទឹមនឹងនេះ ឯកឧត្តមរដ្ឋលេខាធិការ បានមាន ប្រសាសន៍ថ្លែងអំណរគុណ និងកោតសរសើរចំពោះក្រសួងដែនដី ហេដ្ឋារចនាសម្ព័ន្ធ នៃសាធារណរដ្ឋកូរ៉េ និងវិទ្យាស្ថានស្រាវជ្រាវកូរ៉េ KRIHS ដែលបានផ្ដល់កិច្ចសហប្រតិបត្តិការ និងការគាំទ្រយ៉ាងសកម្ម និងអគ្គនាយកដ្ឋានភស្តុភារកម្ម នៃក្រសួងសាធារណការ និងដឹកជញ្ជូន ដែលបានខិតខំប្រឹងប្រែងសម្រេចបានលទ្ធផលតាមរយៈគម្រោងនេះ។ សូមជម្រាបថា ពិធីប្រគល់-ទទួលកំណល់ទ្រទំនិញនេះតំណាងឱ្យកិច្ចសហប្រតិបត្តិការកំពុងបន្ត រវាងសាធារណរដ្ឋកូរ៉េ និងព្រះរាជាណាចក្រកម្ពុជា លើការអភិវឌ្ឍវិស័យពាក់ព័ន្ធ ជាពិសេសវិស័យភ័ស្តុភារកម្មនៅកម្ពុជា និងបញ្ហាប្រឈមជាសកលមិនធ្លាប់កើតមាននៃការរាតត្បាតជំងឺកូវីដ-១៩៕